‘ಶೂ, ಸಾಕ್ಸ್‌ ಖರೀದಿಯಲ್ಲಿ ಲಕ್ಷಾಂತರ ಅಕ್ರಮ’

ಹಾವೇರಿ :ಹಿರೇಕೆರೂರ ತಾಲೂಕಿನಾದ್ಯಂತ ಶಾಲಾ ಮಕ್ಕಳ ಶೂ ಮತ್ತು ಸಾಕ್ಸ್‌ ಖರೀದಿಯಲ್ಲಿ ನಕಲಿ ದರ ಪಟ್ಟಿಗಳನ್ನು ಸೃಷ್ಟಿಸಿ ಅಕ್ರಮ ನಡೆಸಲಾಗಿದ್ದು, ಪ್ರಾಧಿಕಾರದಿಂದ ಸೂಕ್ತ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕೆಂದು ಮಾಜಿ ಶಾಸಕ ಯು.ಬಿ.ಬಣಕಾರ ಒತ್ತಾಯಿಸಿದರು.

ನಗರದಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ತಾಲೂಕಿನಲ್ಲಿ ಶೇ.90ರಷ್ಟು ಶೂ ಮತ್ತು ಸಾಕ್ಸ್‌ಗಳನ್ನು ವಿತರಿಸಿದ್ದು, ಇದರ ಹಿಂದೆ ದೊಡ್ಡ ಅಕ್ರಮ ನಡೆದಿದೆ. ಶಾಲೆಯ ಉನ್ನತ ಅಧಿಕಾರಿಗಳು, ಎಸ್‌ಡಿಎಂಸಿಯವರು, ಶಾಲಾ ಮುಖ್ಯೋಪಾಧ್ಯಾಯರಿಗೆ ಒಂದೇ ಕಡೆ ಖರೀದಿ ಮಾಡಬೇಕು ಎಂದು ಒತ್ತಡ ಹಾಕಿ, ಎಲ್ಲ ಶಾಲೆಗಳ ಮುಖ್ಯೋಪಾಧ್ಯಾಯರು ಒಂದೇ ಅಂಗಡಿಯಲ್ಲಿ ನಕಲಿ ದರ ಪಟ್ಟಿ ಸೃಷ್ಟಿಸಿ ಕಳಪೆ ಮಟ್ಟದ ಶೂ, ಸಾಕ್ಸ್‌ ಖರೀದಿಸಿದ್ದಾರೆ ಎಂದು ಆರೋಪಿಸಿದರು.

ಪ್ರತಿ ಶಾಲೆಯಿಂದ 3 ವ್ಯಕ್ತಿಗಳಿಂದ ದರ ಪಟ್ಟಿ ಪಡೆಯಬೇಕು. ಆದರೆ, ಇಲ್ಲಿ ಒಬ್ಬ ವ್ಯಕ್ತಿಯಿಂದ ಮಾತ್ರ ದರ ಪಟ್ಟಿ ಪಡೆದು, ಇಬ್ಬರ ವ್ಯಕ್ತಿಯ ನಕಲಿ ದರ ಪಟ್ಟಿ ಸೃಷ್ಟಿಸಿದ್ದಾರೆ. ಇದು ತಾಲೂಕಿನ ಎಲ್ಲ ಶಾಲೆಗಳಿಗೂ ಒಂದೇ ದರ ಪಟ್ಟಿಯಾಗಿದ್ದು, ಎಲ್ಲ ಶಾಲೆಗಳಿಗೂ ಒಂದೇ ದಿನಾಂಕದಂದು ದರ ಪಟ್ಟಿ ಸೃಷ್ಟಿಸಿದ್ದು, ಅಕ್ರಮ ನಡೆದಿದೆ ಎನ್ನುವುದಕ್ಕೆ ಸೂಕ್ತ ಉದಾಹರಣೆಯಾಗಿದೆ ಎಂದರು.

ತಾಲೂಕಿನಲ್ಲಿ 21 ಸಾವಿರ ವಿದ್ಯಾರ್ಥಿಗಳಿದ್ದು, 58 ಲಕ್ಷ ರೂ. ವೆಚ್ಚದಲ್ಲಿ ಶೂ ಮತ್ತು ಸಾಕ್ಸ್‌ ವಿತರಿಸಲಾಗಿದೆ. ಇದರಲ್ಲಿ ನಡೆದಿರುವ ಅಕ್ರಮದ ಬಗ್ಗೆ ಸೂಕ್ತ ತನಿಖೆ ನಡೆಸಿ, ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿ ಈ ಹಿಂದೆ ಬಿಇಒ ಕಚೇರಿ ಮುಂದೆ ಪ್ರತಿಭಟನೆ ನಡೆಸಲಾಗಿತ್ತು. ಆದರೆ ಇದುವರೆಗೂ ಕ್ರಮ ಕೈಗೊಂಡಿಲ್ಲ ಎಂದು ಆರೋಪಿಸಿದರು.

ಶಾಲೆಯಲ್ಲಿ ಗುಣಮಟ್ಟ ಕಾಪಾಡಲು ಜಿಲ್ಲೆಗೊಂದು ತನಿಖಾ ಸಮಿತಿ ರಚಿಸಿದ್ದರೂ, ಅದು ಇದುವರೆಗೂ ಯಾವ ಶಾಲೆಗೂ ಭೇಟಿ ನೀಡದೇ ಯಾವ ಶಾಲೆಯನ್ನೂ ತನಿಖೆ ನಡೆಸಿದ ಉದಾಹರಣೆ ಇಲ್ಲ. ಕೂಡಲೇ ತನಿಖಾ ಸಮಿತಿ ಎಚ್ಚೆತ್ತು ಎಲ್ಲಿ ಅಕ್ರಮ ನಡೆಯುತ್ತಿವೆ ಗಮನಿಸಿ ತನಿಖೆ ನಡೆಸಬೇಕು ಎಂದು ಒತ್ತಾಯಿಸಿದರು.

ಜಿಲ್ಲೆಯ ಉನ್ನತ ಶಿಕ್ಷಣ ಅಧಿಕಾರಿಗಳು ಕೂಡಲೇ ಕಳಪೆ ಶೂ ಬಗ್ಗೆ ಶೀಘ್ರವೇ ತನಿಖೆ ನಡೆಸಬೇಕು. ಅನ್ಯಾಯವಾದ ಮಕ್ಕಳಿಗೆ ನ್ಯಾಯ ಕೊಡಿಸಬೇಕು. ಇಲ್ಲವಾದರೆ ತಪ್ಪಿತಸ್ಥರಿಗೆ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.