ಗುಬ್ಬಚ್ಚಿ ಗೂಡಿನಲ್ಲಿ ಕದ್ದು-ಮುಚ್ಚಿ

ಹಾವೇರಿ : ಇಂದು ವಿಶ್ವದೆಲ್ಲೆಡೆ ಗುಬ್ಬಚ್ಚಿ ದಿನವನ್ನು ವಿಶಿಷ್ಟ ಮತ್ತು ವೈಶಿಷ್ಟ್ಯಪೂರ್ಣವಾಗಿ ಆಚರಿಸುತ್ತಾರೆ. ರೈತ ಮಿತ್ರ, ಪರಿಸರ ಪ್ರೇಮಿಗಳಿಗೆ ಒಡನಾಡಿಯಾಗಿರುವ ಈ ಗುಬ್ಬಚ್ಚಿ ಗೂಡಿನಲ್ಲಿ ಇತ್ತೀಚಿನ ದಿನಗಳಲ್ಲಿ ಗುಬ್ಬಚ್ಚಿಗಳು ಕಾಣುತ್ತಿಲ್ಲ. ಚುಮು ಚುಮು ಬೆಳಕಲ್ಲಿ ಚೀಂವ್‌ ಚಿಂವ್‌ ಕಲರವವೂ ಕೇಳುತ್ತಿಲ್ಲ. ಗುಬ್ಬಚ್ಚಿ ಗೂಡಲ್ಲಿ ಕದ್ದು-ಮುಚ್ಚಿ ನಡೆಯುವ ಸಂಸಾರ ಇಲ್ಲಿದೆ ನೋಡಿ.

ಗುಬ್ಬಚ್ಚಿಗಳು ಗೂಡು ಕಟ್ಟುತ್ತಿದ್ದ ಪಡಜಂತಿ ಮನೆಗಳ ಅವಶೇಷದಲ್ಲಿ ಕಾಂಕ್ರೀಟ್‌ ಕಟ್ಟಡಗಳು ತಲೆ ಎತ್ತಿವೆ. ಕೈಗಳಲ್ಲಿ ಹಸಿ-ಬಿಸಿ ಚಿತ್ರಗಳ ಮೂಲಕ ಮೈಕಾವೇರಿಸುವ ದೃಶ್ಯಗಳನ್ನು ಬಿತ್ತರಿಸುವ ಮೊಬೈಲ್‌ ಪ್ರಪಂಚಕ್ಕೆ 3ಜಿ, 4ಜಿ ಕಾಲಿಡುವ ಮೂಲಕ ಗುಬ್ಬಚ್ಚಿ ಕಲರವಕ್ಕೆ ಮಾರಕವಾಗಿವೆ. ಈ ಮನುಕುಲವೇ ತಮ್ಮ ಪ್ರಪಂಚವೆಂದು ನೆಚ್ಚಿದ್ದ ಗುಬ್ಬಚ್ಚಿಗಳಿಗೆ ಗೂಡು ಕಟ್ಟಲು ಸ್ಥಳವಿಲ್ಲದಂತಾಗಿದೆ. ತರಂಗಾಂತರಗಳ ವಿಕಿರಣಕ್ಕೆ ಸುಟ್ಟು ಕರಕಲಾಗುವ ಭಯದಲ್ಲಿ ಬೆಚ್ಚನೆಯ ಜಾಗೆ ಅರಸಿಕೊಂಡು ಹೋಗುವ ವಾತಾವರಣ ನಿರ್ಮಾಣವಾಗಿದೆ.

ಪಕ್ಷಿ ಪ್ರೇಮಿಗಳು ಹಾಗೂ ಜೀವಶಾಸ್ತ್ರಜ್ಞರ ಪ್ರಕಾರ, ಮನುಷ್ಯ ಸಂಕುಲದ ಜತೆಗೆ ಗುಬ್ಬಚ್ಚಿಗಳು ಅವಿನಾಭಾವ ಸಂಬಂಧ ಇಟ್ಟುಕೊಂಡಿರುವ ಒಡನಾಡಿ ಪಕ್ಷ ಸಂಕುಲವಾಗಿದೆ. ರೈತನ ಹೊಲಕ್ಕೆ ಬೇಡವಾದ ಕ್ರಿಮಿ-ಕೀಟಗಳನ್ನು ತಿಂದು ಬೆಳೆ ರಕ್ಷಿಸುವ ಅಪರೂಪದ ಬಾನಾಡಿಗಳಾಗಿವೆ. ಈ ಕಾರಣಕ್ಕೆ ನಮ್ಮ ಪೂರ್ವಜರು ತಿನ್ನುತ್ತಿದ್ದ ಧಾನ್ಯಗಳಲ್ಲಿ ಜೀವ ಸತ್ವ ಇರುತ್ತಿತ್ತು. ಈಗ ಗುಬ್ಬಚ್ಚಿಗಳ ಕಾಟಕ್ಕೆ ರೈತರು ಹೊಲಕ್ಕೆ ಔಷಧಿ ಸಿಂಪಡಿಸುತ್ತಿದ್ದಾರೆ. ಈ ಔಷಧ ತಿಂದ ಕೀಟಗಳನ್ನು ತಿನ್ನುವ ಗುಬ್ಬಚ್ಚಿ ಗಳು ನಾಶವಾಗುತ್ತಿವೆ.

ಪರಿಸರ ಸ್ನೇಹಿ : ಕಾಡು-ಮೇಡು ಅಲೆದು, ಹೊಲ-ಗದ್ದೆಗಳಲ್ಲಿ ಸಿಕ್ಕ ಬೀಜ-ಧಾನ್ಯಗಳನ್ನು ಸಂಗ್ರಹಿಸುವ ಅವ್ವ ಗುಬ್ಬಚ್ಚಿ ತನ್ನ ಮಕ್ಕಳಿಗೆ ತುತ್ತು ತಿನ್ನಿಸುವ ಭರದಲ್ಲಿ ಪರಿಸರ ಸಮೃದ್ಧಿಗೆ ಅವಶ್ಯಕವಿರುವ ಬೀಜ ಪ್ರಕಾರಗಳ ಪ್ರಸರಣಕ್ಕೆ ಸಾಕ್ಷಿಯಾಗಿವೆ. ಪರಿಸರ ವೃದ್ಧಿಗೆ ಪ್ರಾಕೃತಿ ದತ್ತವಾಗಿ ಕೈಜೋಡಿಸುವ ಈ ಗುಬ್ಬಚ್ಚಿಗಳು ಅಕ್ಷರಶಃ ಪರಿಸರ ಸ್ನೇಹಿ ಪಕ್ಷಿ ಸಂಕುಲವಾಗಿದೆ.

ಕಾಂಕ್ರೀಟ್‌ ನಾಡಿನ ಮಧ್ಯ ಯಾಂತ್ರಿಕ ಬದುಕು ಸಾಗಿಸುವ ಮೂಲಕ ಮನಸ್ಸಿನ ನೆಮ್ಮದಿ ಕಳೆದುಕೊಳ್ಳುತ್ತಿರುವ ಯುವ ಸಮುದಾಯಕ್ಕೆ ಕಾಡಲ್ಲಿರುವ ರಿಕ್ರಿಯೇಶನ್‌ (ಖುಷಿಗಳ ತಾಣ)ಗ ಳನ್ನು ಅರಸಿಕೊಂಡು ಹೋಗುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಈಗಲೂ ಕಾಲ ಮಿಂಚಿಲ್ಲ. ಗುಬ್ಬಚ್ಚಿ ಗೂಡು ಕಟ್ಟುವ ವಾತಾವರಣ ನಿರ್ಮಿಸುವ ನಿಟ್ಟಿನಲ್ಲಿ ಮನೆ ಆವರಣದಲ್ಲಿ ಗಿಡ-ಗಂಟೆಗಳನ್ನು ಬೆಳಸಿ ಪರಿಸರ ಸಂರಕ್ಷಿಸಿದಲ್ಲಿ ಪಕ್ಷಿ ಸಂಕುಲ ನಿಮ್ಮ ಬಳಿಗೇ ಧಾವಿಸುತ್ತವೆ. ಅವುಗಳ ಬಳಿ ಮೊಬೈಲ್‌ ಒಯ್ಯುವ ಬದಲು ಹಣ್ಣು-ಕಾಳು-ಕಡಿಗ ಳನ್ನು ಇಡಿ. ಚಿಕ್ಕ ಮೊನಚಿನ ಕೊಕ್ಕೆಗಳಿಂದ ಕಚ್ಚಿಕೊಂಡು ಗೂಡಿನತ್ತ ಪ್ರಯಾಣ ಬೆಳೆಸುವ ಗುಬ್ಬಚ್ಚಿಗಳನ್ನು ನೋಡಿ ಖುಷಿ ಪಡಿ.