ಸುಪ್ರೀಂ ಆದೇಶ ಸ್ವಾಗತಾರ್ಹ: ಕೋಳಿವಾಡ

ಹಾವೇರಿ: ಸಂವಿಧಾನದ ಆಶಯಗಳ ರಕ್ಷಕರಾಗಿ ಸುಪ್ರೀಂಕೋರ್ಟ್‌ ಪರಾಮರ್ಶೆ ಅಧಿಕಾರದ ಹಕ್ಕು ಇಟ್ಟುಕೊಂಡು ನೀಡಿರುವ ತೀರ್ಪು ಸ್ವಾಗತಾರ್ಹ ಎಂದು ಮಾಜಿ ಸ್ಪೀಕರ್‌ ಕೆ.ಬಿ. ಕೋಳಿವಾಡ ಹೇಳಿದ್ದಾರೆ.

ತೀರ್ಪು ಪ್ರಕಟಗೊಂಡ ಹಿನ್ನೆಲೆಯಲ್ಲಿ ಪತ್ರಿಕೆ ಜತೆ ಮಾತನಾಡಿದ ಅವರು, ಸಂವಿಧಾನದ ಪರಾಮರ್ಶೆ ಮಾಡುವ ಹಕ್ಕು ಶಾಸಕಾಂಗ ಮತ್ತು ಕಾರ್ಯಾಂಗಕ್ಕೆ ಇಲ್ಲ ಎನ್ನುವುದನ್ನು ಸೂಚ್ಯವಾಗಿ ಹೇಳಿದೆ. ಆದರೆ ಶಾಸಕರ ರಾಜೀನಾಮೆ ಅಂಗೀಕಾರ ಮತ್ತು ಅನರ್ಹಗೊಳಿಸುವುದು ಸ್ಪೀಕರ್‌ ಅವರ ವಿವೇಚನಾಧಿಕಾರ ಎಂದಿರುವ ಕೋರ್ಟ್‌, ಸ್ಪೀಕರ್‌ ನೀಡುವ ನಿರ್ಣಯ ಪ್ರತಿಯನ್ನು ಪುನಃ ಸುಪ್ರೀಂಕೋರ್ಟ್‌ಗೆ ಸಲ್ಲಿಸಬೇಕು. ರಾಜೀನಾಮೆ ಶಾಸಕರ ಮೂಲಭೂತ ಹಕ್ಕು. ನಿರ್ಣಯ ಕೈಗೊಳ್ಳುವುದು ಅವರಿಗೇ ಬಿಟ್ಟದ್ದು. ಅದನ್ನು ಸ್ಪೀಕರ್‌ ಪ್ರಶ್ನಿಸುವಂತಿಲ್ಲ ಎನ್ನುವುದನ್ನೂ ಸ್ಪಷ್ಟಪಡಿಸಲಾಗಿದೆ ಎಂದು ಹೇಳಿದ್ದಾರೆ.