ಸಂತ್ರಸ್ತರಿಗೆ ಧೈರ‍್ಯ ತುಂಬಿದ ಮಾನೆ

ಅಕ್ಕಿಆಲೂರು: ಭಾರಿ ಮಳೆ ಮತ್ತು ವರದಾ ಹಾಗೂ ಧರ್ಮಾ ನದಿ ಪ್ರವಾಹದಿಂದ ಸಂಕಷ್ಟಕ್ಕೀಡಾಗಿರುವ ಕೂಡಲ ಸೇರಿದಂತೆ ಹಲವು ಗ್ರಾಮಗಳಿಗೆ ಶನಿವಾರ ವಿಧಾನ ಪರಿಷತ್‌ ಸದಸ್ಯ ಶ್ರೀನಿವಾಸ್‌ ಮಾನೆ ಭೇಟಿ ನೀಡಿ, ಸಂತ್ರಸ್ತರ ಅಹವಾಲು ಆಲಿಸಿದರು.

ಕೂಡಲ ಗ್ರಾಮಸ್ಥರು ಗ್ರಾಮ ಜಲಾವೃತಗೊಂಡಿದ್ದರಿಂದ ಮನೆ ತೊರೆದಿದ್ದು, ಕಾಳಜಿ ಕೇಂದ್ರಗಳಲ್ಲಿ ಆಶ್ರಯ ಪಡೆದಿದ್ದಾರೆ. ಕೇಂದ್ರಗಳಿಗೆ ಮಾನೆ ತೆರಳಿ ಸಂತ್ರಸ್ತರಿಗೆ ಧೈರ್ಯ ತುಂಬಿದರು. ಸರಕಾರದ ಮೇಲೆ ಒತ್ತಡ ಹಾಕಿ ನೆರೆಪೀಡಿತ ಗ್ರಾಮಸ್ಥರ ನೆಮ್ಮದಿಯ ಜೀವನಕ್ಕೆ ಶಾಶ್ವತ ಪರಿಹಾರ ಕಲ್ಪಿಸಲು ಶ್ರಮಿಸುವ ಭರವಸೆ ನೀಡಿದರು.

ಇದೇ ಸಂದರ್ಭದಲ್ಲಿ ನೆರೆಯಿಂದ ಹಾನಿಗೀಡಾಗಿರುವ ಮನೆಗಳನ್ನು, ಜಲಾವೃತ ಕೃಷಿ ಭೂಮಿ ವೀಕ್ಷಿಸಿದರು. ಜಿಪಂ ಸದಸ್ಯ ಟಾಕನಗೌಡ ಪಾಟೀಲ, ತಾಪಂ ಅಧ್ಯಕ್ಷ ಸಿದ್ದಪ್ಪ ಹಿರಗಪ್ಪನವರ, ಪ್ರಕಾಶಗೌಡ ಪಾಟೀಲ, ಪುಟ್ಟಪ್ಪ ನರೇಗಲ್‌, ಉಮೇಶ ಗೌಳಿ, ಯಾಸೀರಖಾನ್‌ ಪಠಾಣ, ಭರಮಣ್ಣ ಶಿವೂರ, ಬಸವರಾಜ್‌ ಹೊಸಮನಿ, ಬಸಲಿಂಗಯ್ಯ ಕಂಬಾಳಿಮಠ, ಗೀತಾ ಪೂಜಾರ, ಸತ್ತಾರಸಾಬ ಅರಳೇಶ್ವರ, ಫಯಾಜ್‌ಅಹ್ಮದ್‌ ಲೋಹಾರ, ಬಸವರಾಜ್‌ ಹಾದಿಮನಿ ಸೇರಿದಂತೆ ಇನ್ನೂ ಹಲವರು ಈ ಸಂದರ್ಭದಲ್ಲಿ ಇದ್ದರು.