ಗುಡುಗು ಸಹಿತ ಧಾರಾಕಾರ ಮಳೆ

ಹಾವೇರಿ : ನಗರದಲ್ಲಿ ಶುಕ್ರವಾರ ಸಂಜೆ ಗಾಳಿಯೊಂದಿಗೆ ಆಲಿಕಲ್ಲು ಮಳೆ ಸುರಿಯಿತು. ಸುಮಾರು ಒಂದು ಗಂಟೆಗೂ ಹೆಚ್ಚು ಹೊತ್ತು ಧಾರಕಾರವಾಗಿ ಸುರಿಯಿತು.

ಹವಾಮಾನ ವೈಪರಿತ್ಯದಿಂದಾಗಿ ತಾಪಮಾನದಲ್ಲಿ ಏರಿಕೆಯಾಗಿತ್ತು. ಬಿಸಿಲಿನ ತಾಪಕ್ಕೆ ಕಾದು ಕಬ್ಬಣಿದಂತಾದ ಭೂಮಿಗೆ ಶುಕ್ರವಾರ ಸುರಿದ ಮಳೆ ಭೂಮಿಗೆ ತಂಪೆರೆಯಿತು.

ಕಳೆದ ಎರಡು ದಿನಗಳಿಂದ ಮೋಡಕವಿದ ವಾತಾವರಣ ನಿರ್ಮಾಣವಾಗಿದ್ದು, ಶುಕ್ರವಾರ ಸಂಜೆ 5-30 ಕ್ಕೆ ಭರ್ಜರಿ ಮಳೆ ಪ್ರಾರಂಭವಾಯಿತು. ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಗುಡುಗು ಸಹಿತ ಆಲಿಕಲ್ಲು ಮಳೆ ಸುರಿದ ಪರಿಣಾಮ ವಾತಾವರಣ ತಂಪಾಗಿ ನಗರದ ಜನತೆ ನೆಮ್ಮದಿಯ ನಿಟ್ಟುಸಿರು ಬಿಟ್ಟರು.

ನಗರ ಸೇರಿದಂತೆ ಬ್ಯಾಡಗಿ, ರಾಣೇಬೆನ್ನೂರ, ರಟ್ಟಿಹಳ್ಳಿ, ಶಿಗ್ಗಾವಿ, ಸವಣೂರ ತಾಲೂಕುಗಳ ಸುತ್ತಮುತ್ತ ಗ್ರಾಮಗಳಲ್ಲಿ ಗಾಳಿ ಸಮೇತ ಆಲಿಕಲ್ಲು ಮಳೆಯಾಗಿದೆ. ನಗರದ ಪಿ.ಬಿ.ರಸ್ತೆ, ಗೂಗುಕಟ್ಟಿ ಕಾಂಪ್ಲೆಕ್ಸ್‌, ಚರಂಡಿಗಳ ದುರಸ್ತಿಯಿಂದಾಗಿ ರಸ್ತೆಗಳು ಜಲಾವೃತಗೊಂಡಿದ್ದವು. ಪರಿಣಾಮ ವಾಹನ ಸವಾರರು, ಸಾರ್ವಜನಿಕರು ಸಂಚಾರಕ್ಕೆ ಪರದಾಡಬೇಕಾಯಿತು.

ನಗರದ ಕೆಳ ಹಂತದ ಮನೆಗಳಿಗೆ ನೀರು ನುಗ್ಗಿದ ಪರಿಣಾಮ ಜನ ತೊಂದರೆಗೆ ಸಿಲುಕಿದರು. ವರ್ಷದ ಮೊದಲ ಮಳೆ ಭರ್ಜರಿಯಾಗಿಯೇ ಆರಂಭವಾಗಿದೆ. ಇದೇ ರೀತಿ ಮಳೆ ಮುಂದುವರಿದರೆ ಬರದನಾಡು ಹಾವೇರಿಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ನಿವಾರಣೆಯಾಗಿ ಕೃಷಿ ಚಟುವಟಿಕೆಗಳಿಗೆ ಅನುಕೂಲವಾಗಲಿದೆ.

ಭರ್ಜರಿ ಆಲಿಕಲ್ಲು ಮಳೆ:

ನಗರದಲ್ಲಿ ಏಕಾಏಕಿ ಗಾಳಿ ಸಮೇತ ಆಲಿಕಲ್ಲು ಮಳೆ ಸುರಿದಿದ್ದು, ನಗರದ ಜನತೆಯೂ ಮಕ್ಕಳು, ಮಹಿಳೆಯರು, ಯುವಕರು ಮನೆಯಂಗಳದಲ್ಲಿ ಬೀಳುವ ಆಲಿಕಲ್ಲು ಆರಿಸಿಕೊಂಡು ಸಂಭ್ರಮಿಸಿದರು.