ಮತದಾನ ಜಾಗೃತಿ ಫ್ಲೆಕ್ಸ್‌ ಇನ್ನೂ ಇವೆ !

ರಾಣೇಬೆನ್ನೂರ: ಲೋಕಸಭಾ ಚುನಾವಣೆ ಮುಕ್ತಾಯಗೊಂಡು ಕೇಂದ್ರದಲ್ಲಿ ಸರಕಾರ ರಚನೆಯಾಗಿ ತಿಂಗಳು ಗತಿಸಿದರೂ, ನಗರದ ಕೆಲವು ಭಾಗಗಳಲ್ಲಿ ಇಂದಿಗೂ ಮತದಾನ ಜಾಗೃತಿ ಫ್ಲೆಕ್ಸ್‌ಗಳು ರಾರಾಜಿಸುತ್ತಿರುವುದು ಅಚ್ಚರಿಯ ಸಂಗತಿಯಾಗಿದೆ.

ಲೋಕಸಭಾ ಚುನಾವಣೆಯ ಮತದಾನ ರಾಜ್ಯದಲ್ಲಿ ಎರಡು ಹಂತಗಳಲ್ಲಿ ನಡೆದಿತ್ತು. ಹಾವೇರಿ ಲೋಕಸಭಾ ಕ್ಷೇತ್ರದ ಮತದಾನ ಏ.23ರಂದು ನಡೆದಿತ್ತು. ಆ ಸಮಯದಲ್ಲಿ ನಗರದ ಕೆಲವು ಭಾಗಗಳಲ್ಲಿ ಮತದಾನ ಜಾಗೃತಿ ಸಾರುವ ಫ್ಲೆಕ್ಸ್‌ಗಳನ್ನು ಅಳವಡಿಸಲಾಗಿತ್ತು. ಆದರೆ ಚುನಾವಣೆ ಮುಗಿದು ಇಷ್ಟು ದಿನಗಳಾದರೂ ಇಂದಿಗೂ ಇಲ್ಲಿನ ಕೆಇಬಿ ವಿನಾಯಕ ದೇವಸ್ಥಾನ, ದುರ್ಗಾ ಸರ್ಕಲ್‌, ಮಿನಿ ವಿಧಾನಸೌಧದ ಬಳಿ ಅಳವಡಿಸಿರುವ ಫ್ಲೆಕ್ಸ್‌ಗಳನ್ನು ತೆಗೆಯದೇ ಹಾಗೆ ಬಿಟ್ಟಿದ್ದಾರೆ. ಅವುಗಳ ಜಾಗದಲ್ಲಿ ಬೇರೆಯವರಿಗೆ ಫ್ಲೆಕ್ಸ್‌ ಅಳವಡಿಸಲು ಅವಕಾಶ ಮಾಡಿಕೊಟ್ಟರೆ ನಗರಸಭೆಗೆ ಆದಾಯವಾದರೂ ಬರುತ್ತದೆ. ಅದೇಕೋ ನಗರಸಭೆ ಅಧಿಕಾರಿಗಳು ಇತ್ತ ಗಮನ ಹರಿಸದಿರುವುದು ನಿಜಕ್ಕೂ ಅಚ್ಚರಿಯ ಸಂಗತಿಯಾಗಿದೆ ಎಂದು ಸಾರ್ವಜನಿಕರು ಪತ್ರಿಕೆಗೆ ತಿಳಿಸಿದ್ದಾರೆ.