ಯುವಕರು ದುಶ್ಚಟಗಳಿಂದ ದೂರವಿರಿ: ಶಿವಲಿಂಗ ಶಿವಾಚಾರ್ಯ

ರಟ್ಟೀಹಳ್ಳಿ : ಗ್ರಾಮೀಣ ಭಾಗದಲ್ಲಿ ನಡೆಯುವ ಜಾತ್ರೆ, ಉತ್ಸವ ಕಾರ್ಯಕ್ರಮಗಳಲ್ಲಿ ದೇಶಿಯ ಕ್ರೀಡೆಗಳನ್ನು ಆಯೋಜಿಸಿ ಅವುಗಳನ್ನು ಬೆಳೆಸುತ್ತಿರುವುದು ಶ್ಲಾಘನಿಯ ಕಾರ‍್ಯ. ಜೀವನದಲ್ಲಿ ಕ್ರೀಡೆ ಎಂಬುವುದು ಪ್ರತಿಯೊಬ್ಬರಿಗೂ ಅವಶ್ಯ. ಗ್ರಾಮೀಣ ಪ್ರತಿಭೆಗಳು ಕೇವಲ ಗ್ರಾಮೀಣ,ತಾಲೂಕು, ಜಿಲ್ಲಾ ಮಟ್ಟಕ್ಕೆ ಸೀಮಿತವಾಗಬಾರದು. ಕ್ರೀಡೆಗಳಲ್ಲಿ ದೇಶವನ್ನು ಪ್ರತಿನಿಧಿಸುವಂತಾಗಬೇಕೆಂದು ಮಾಜಿ ಶಾಸಕ ಯು.ಬಿ.ಬಣಕಾರ ಹೇಳಿದರು.

ಅವರು ತಾಲೂಕಿನ ಸಣ್ಣಗುಬ್ಬಿ ಗ್ರಾಮದ ಉದ್ಭವ ಮೂರ್ತಿ ಶ್ರೀ ಮಾಯಾಂಬಿಕಾದೇವಿ ಹಾಗೂ ಶ್ರೀ ದುರ್ಗಾದೇವಿ ಜಾತ್ರಾ ಪ್ರಯುಕ್ತ ಗ್ರಾಮದ ಶ್ರೀ ಜೈ ಹನುಮಾನ್‌ ಯುವಕರ ಸಂಘದಿಂದ ಆಯೋಜಿಸಿದ್ದ ಹೊನಲು ಬೆಳಕಿನ ಕಬಡ್ಡಿ ಪಂದ್ಯಾವಳಿ ಉದ್ಘಾಟಿಸಿ ಮಾತನಾಡಿದರು.

ಕ್ರೀಡೆ ಇಲ್ಲದ ಜೀವನವನ್ನು ರೂಪಿಸಿಕೊಳ್ಳುವುದು ಸಾಧ್ಯವಿಲ್ಲ. ಕ್ರೀಡೆಯಲ್ಲಿ ಸೋಲು ಗೆಲುವನ್ನು ಸಮಾನವಾಗಿ ಸ್ವೀಕರಿಸಬೇಕು ಅಂದಾಗ ಮಾತ್ರ ಜೀವನದಲ್ಲಿ ಯಶಸ್ವಿಯಾಗಲು ಸಾಧ್ಯ. ಯುವಕರು ಉತ್ತಮ ಗುಣಗಳನ್ನು ಬೆಳಸಿಕೊಂಡು ತಮ್ಮ ಜೀವನವನ್ನು ರೂಪಿಸಿಕೊಳ್ಳಬೇಕು ಎಂದರು.

ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿದ್ದ ರಟ್ಟೀಹಳ್ಳಿ ಕಬ್ಬಿಣಕಂಥಿಮಠದ ಶಿವಲಿಂಗ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿ, ಮನುಷ್ಯ ವರ್ಷವಿಡಿ ದುಡಿದು ಶಾಂತಿ,ನಮ್ಮದಿ ಸುಖಕ್ಕಾಗಿ ಹಬ್ಬ,ಹರಿದಿನಗಳನ್ನು ಆಚರಿಸುವುದು ನಡೆದುಕೊಂಡ ಬಂದ ಪದ್ದತಿ. ದುಡಿಮೆಯ ಪಾಲಿನಲ್ಲಿ ಸ್ವಲ್ಪ ಧರ್ಮಕಾರ‍್ಯಕ್ಕೂ ಬಳಸಬೇಕು. ಕ್ರೀಡೆಯಿಂದ ದೈಹಿಕ ಹಾಗೂ ಮಾನಸಿಕವಾಗಿ ಸದೃಢವಾಗಲು ಸಾಧ್ಯ. ಕ್ರೀಡೆಯನ್ನು ಆಯೋಜಿಸುವುದರಿಂದ ಬಂದ ಜನರಿಗೆ ಮನರಂಜನೆ ನೀಡುವುದರ ಜತೆ ಕ್ರೀಡೆಗಳನ್ನು ಉಳಿಸಿ ಬೆಳೆಸಿದಂತಾಗುತ್ತದೆ. ಕ್ರೀಡೆಯಲ್ಲಿ ರೋಚಕ ಕ್ಷ ಣಗಳನ್ನು ಆನಂದಿಸಬೇಕು. ಯುವಕರು ದುಶ್ಚಟಗಳಿಂದ ತಮ್ಮ ಆರೋಗ್ಯವನ್ನು ಹಾಳು ಮಾಡಿಕೊಳ್ಳುತ್ತಿದ್ದಾರೆ. ಮದ್ಯಪಾನವನ್ನು ಮಾಡುತ್ತಿರುವುದರಿಂದ ಆರೋಗ್ಯ ಹಾಳಾಗುತ್ತದೆ. ಮದ್ಯಪಾನವನ್ನು ಬಿಡಬೇಕು. ದುಡಿಮೆಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ಉತ್ತಮ ಜೀವನ ರೂಪಿಸಿಕೊಳ್ಳಬೇಕೆಂದು ಸಲಹೆ ನೀಡಿದರು.

ಗ್ರಾಪಂ ಸದಸ್ಯ ದೇವರಾಜ ನಾಗಣ್ಣನವರ, ಗಣೇಶ ಹಾದರಗೇರಿ, ನಾಗರಾಜ ಪೂಜಾರ, ಹನುಮಂತಪ್ಪ ಬಳಿಗಾರ, ಶಿವಾನಂದಪ್ಪ ಬಸಾಪುರ, ನಾರಾಯಣ ಪವಾರ, ಜಯಣ್ಣ ಆರಿಕಟ್ಟಿ, ಹನುಮಂತಪ್ಪ ದಾಸರ, ಸುರೇಶ ತಳವಾರ, ನಾಗರಾಜ ನಾಗಣ್ಣನವರ, ಕಮೀಟಿ ಯುವಕರು, ಮತ್ತಿತರರು ಇದ್ದರು. ದೇವರಾಜ ನಾಗಣ್ಣನವರ ವಂದಿಸಿದರು.