ಅಯೋಧ್ಯೆ ಭೂಮಿ ಪೂಜೆಯಲ್ಲಿ ಪ್ರಧಾನಿ ಭಾಗಿ: ಮೋದಿ ಒಂದು ಧರ್ಮಕ್ಕಷ್ಟೇ ಸಿಮೀತವೇ ಎಂದ ಒವೈಸಿ!

ಹೈದರಾಬಾದ್: ಪ್ರಧಾನಿ ಮೋದಿ ಇದೇ ಆಗಸ್ಟ್ 5 ರಂದು ಅಯೋಧ್ಯೆಯ ರಾಮ ಜನ್ಮಭೂಮಿಯಲ್ಲಿ ಭವ್ಯ ರಾಮ ಮಂದಿರದ ಭೂಮಿ ಪೂಜೆ ನೆರವೇರಿಸಲಿದ್ದಾರೆ. ಈ ಮೂಲಕ ಸಮಸ್ತ ಭಾರತೀಯರ ಕನಸೊಂದು ನನಸಾಗಲಿದೆ.

ಆದರೆ ಭೂಮಿ ಪೂಜೆ ಕಾರ್ಯಕ್ರಮದಲ್ಲಿ ಪ್ರಧಾನಿ ಭಾಗಿಯಾಗುವುದನ್ನು ಪ್ರತಿಪಕ್ಷಗಳು ವಿರೋಧಿಸುತ್ತಿವೆ. ಕೆಲವರು ಕೊರೊನಾ ವೈರಸ್ ಹಾವಳಿಯ ಸಮಯದಲ್ಲಿ ಭೂಮಿ ಪೂಜೆ ಏಕೆ ಎಂದು ಪ್ರಶ್ನಸಿದರೆ, ಮತ್ತೆ ಕೆಲವರು ಭೂಮಿ ಪೂಜೆಯಲ್ಲಿ ಪ್ರಧಾನಿ ಉಪಸ್ಥಿತಿ ಕುರಿತು ಚಕಾರ ಎತ್ತಿದ್ದಾರೆ.

ಅಯೋಧ್ಯೆ ಇ-ಭೂಮಿ ಪೂಜೆಗೆ ಕಾಂಗ್ರೆಸ್ ಆಗ್ರಹ!

ಅದರಂತೆ ಅಯೋಧ್ಯೆ ರಾಮ ಜನ್ಮಭೂಮಿಯ ಭೂಮಿ ಪೂಜೆಯಲ್ಲಿ ಪ್ರಧಾನಿ ಮೋದಿ ಭಾಗಿಯಾಗುವುದನ್ನು ತೀವ್ರವಾಗಿ ವಿರೋಧಿಸಿರುವ ಎಐಎಂಐಎಂ ಸಂಸದ ಅಸದುದ್ದೀನ್ ಒವೈಸಿ, ಭಾರತದ ಪ್ರಧಾನಿ ಕೇವಲ ಒಂದು ಧರ್ಮಕ್ಕಷ್ಟೇ ಸಿಮೀತವೇ ಎಂದು ಪ್ರಶ್ನಿಸಿದ್ದಾರೆ.

ಅಯೋಧ್ಯೆ ಭೂಮಿ ಪೂಜೆಯಲ್ಲಿ ಪ್ರಧಾನಿ ಭಾಗವಹಿಸುವುದರಿಂದ ಸರ್ಕಾರದ ಜಾತ್ಯಾತೀತ ಚಹೆರೆಗೆ ಧಕ್ಕೆ ಬರುತ್ತದೆ ಎಂದಿರುವ ಒವೈಸಿ, ದೇಶದ ಪ್ರಧಾನಿ ಎಲ್ಲಾ ಧರ್ಮೀಯರ ಪ್ರಧಾನಿಯೇ ಹೊರತು ಒಂದು ನಿರ್ದಿಷ್ಟ ಧರ್ಮದ ಪ್ರಧಾನಿ ಅಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ವಿಡಿಯೋ ಕಾನ್ಫರೆನ್ಸ್ ಮೂಲಕವೂ ಭೂಮಿ ಪೂಜೆ ಮಾಡಬಹುದು: ಉದ್ಧವ್ ಠಾಕ್ರೆ!

ಅಯೋಧ್ಯೆ ಭೂಮಿ ಪೂಜೆಯಲ್ಲಿ ಪ್ರಧಾನಿ ಮೋದಿ ಭಾಗವಹಿಸುವುದರಿಂದ ದೇಶಕ್ಕೆ ತಪ್ಪು ಸಂದೇಶ ರವಾನೆಯಾಗುತ್ತದೆ ಎಂದಿರುವ ಅಸದುದ್ದೀನ್ ಒವೈಸಿ, ಭೂಮಿ ಪೂಜೆಗೆ ಪ್ರಧಾನಿ ಹೋಗಬಾರದು ಎಂದು ಮನವಿ ಮಾಡಿದ್ದಾರೆ.