ಅಮೆರಿಕ ಮಹಿಳೆಯ ರೇಪ್: ಲುಧಿಯಾನದ ಟ್ರಕ್ ಡೈವರ್ ಅರೆಸ್ಟ್

ಚಂಡೀಗಢ: ಎರಡು ವರ್ಷಗಳ ಹಿಂದೆ ಖರಾರ್‌ನಲ್ಲಿ ಅಮೆರಿಕ ಮಹಿಳೆಯೊಬ್ಬರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಲುಧಿಯಾನ ಮೂಲದ ಟ್ರಕ್ ಚಾಲಕನನ್ನು ಪೊಲೀಸರು ಬಂಧಿಸಿದ್ದಾರೆ.

ಪ್ರಕರಣ ಸಂಬಂಧ ಲುಧಿಯಾನ ಮೂಲದ ಬಲದೇವ್ ಕುಮಾರ್ (32) ಎಂಬುವನನ್ನು ಬಂಧಿಸಲಾಗಿದ್ದು, ಮತ್ತೋರ್ವ ಆರೋಪಿ ಲಕ್ಕಿ (27) ತಲೆಮರೆಸಿಕೊಂಡಿದ್ದಾನೆ ಎಂದು ಚಂಡೀಗಢ ಡಿಸಿಪಿ ಅಂಜಿತಾ ಚೆಪಿಯಾಲ್ ತಿಳಿಸಿದ್ದಾರೆ. ಲಕ್ಕಿ ನಿವಾಸದಲ್ಲಿಯೇ ಈ ಅತ್ಯಾಚಾರ ಕೃತ್ಯ ನಡೆದಿದ್ದು, ಕಳೆದ ವರ್ಷದ ನವೆಂಬರ್ ತಿಂಗಳಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ಇದೊಂದು ಸೂಕ್ಷ್ಮ ವಿಷಯವಾಗಿದ್ದರಿಂದ ಪ್ರಕರಣವನ್ನು ಗೌಪ್ಯವಾಗಿಡಲಾಗಿತ್ತು ಎಂದು ಚೆಪಿಯಾಲ್ ಸ್ಪಷ್ಟಪಡಿಸಿದ್ದಾರೆ.

ಬಂಧಿತ ಆರೋಪಿ ಬಲದೇವ್‌, ಕೃತ್ಯ ನಡೆದ ಸಂದರ್ಭದಲ್ಲಿ ಚಂಡೀಗಢದಲ್ಲಿ ಬಾಡಿಗೆ ಆಟೋ ಚಾಲಕನಾಗಿದ್ದು, ಅಮೆರಿಕ ಮೂಲದ ಮಹಿಳೆ ಈತನ ಆಟೋದಲ್ಲಿ ಪ್ರಯಾಣ ಬೆಳೆಸಿದ್ದರು. ಆರೋಪಿ ಬಲದೇವ್‌ ಮಹಿಳೆಯನ್ನು ಹೊಟೇಲ್‌ಗಳಿಗೆ ಸುತ್ತಿಸಿ, ಹೋಟೆಲ್‌ಗಳು ದುಬಾರಿ ಎಂದು ಅರಿತ ಬಳಿಕ ಖರಾರ್‌ನಲ್ಲಿರುವ ಮತ್ತೋರ್ವ ಆರೋಪಿ ಲಕ್ಕಿಯ ಮನೆಗೆ ಕರೆತಂದಿದ್ದ. ಈ ವೇಳೆ ಇಬ್ಬರು ಆರೋಪಿಗಳು ಸೇರಿ ಮಹಿಳೆಯ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿದ್ದರು.

ಇಬ್ಬರು ಕಾಮುಕರು ಮದ್ಯ ಕುಡಿಯುವಂತೆ ಬಲವಂತ ಮಾಡಿದ್ದು, ಮೊಬೈಲ್ ಹಾಗೂ ಲ್ಯಾಪ್‌ಟಾಪ್ ಕದ್ದಿದ್ದಾರೆಂದು ಸಂತ್ರಸ್ತ ಮಹಿಳೆ ಆರೋಪಿಸಿದ್ದಾರೆ. ಘಟನೆ ಬಳಿಕ ದೂರು ದಾಖಲಿಸದೇ ಫ್ರಾನ್ಸ್‌ಗೆ ತೆರಳಿದ ಸಂತ್ರಸ್ತ ಮಹಿಳೆ, ಅಲ್ಲಿಂದಲೇ ಆನ್‌ಲೈನ್ ಮೂಲಕ ದೂರು ದಾಖಲಿಸಿದ್ದರು ಎಂದು ಡಿಸಿಪಿ ಚೆಪಿಯಾಲ್ ತಿಳಿಸಿದ್ದಾರೆ.