ವಾಷಿಂಗ್ಟನ್‌ಗಿಂತಲೂ ಇಂದೋರ್ ಸ್ವಚ್ಛ ನಗರ: ಚೌಹಾನ್

ಇಂದೋರ್: ಮಧ್ಯಪ್ರದೇಶದ ರಸ್ತೆಗಳು ಅಮೆರಿಕ (ಯುಎಸ್‌)ಕ್ಕಿಂತ ಉತ್ತಮವಾಗಿದೆ ಎಂದು ಹೇಳುವ ಮೂಲಕ ವಿವಾದಕ್ಕೆ ಕಾರಣರಾಗಿದ್ದ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾನ್ ಅವರು, ಈಗ ವಾಷಿಂಗ್ಟನ್‌ಗಿಂತಲೂ ಇಂದೋರ್ ಸ್ವಚ್ಛ ನಗರಿಯಾಗಿದೆ ಎಂದು ಹೇಳಿದ್ದಾರೆ.

ಕಳೆದ ವರ್ಷ ಭಾರತದ ಸ್ವಚ್ಛ ನಗರಿ ಎಂಬ ಖ್ಯಾತಿಗೆ ಮಧ್ಯ ಪ್ರದೇಶದ ಇಂದೋರ್ ಆಯ್ಕೆಯಾದ ಹಿನ್ನೆಲೆಯಲ್ಲಿ ಮಧ್ಯ ಪ್ರದೇಶ ಸರಕಾರ ಕಾರ್ಯಕ್ರಮ ಆಯೋಜಿಸಿತ್ತು.

ಬುಧವಾರ ನಡೆದ ಸಮಾರಂಭದಲ್ಲಿ ಮಾತನಾಡಿದ ಚೌಹಾನ್, ಮಧ್ಯಪ್ರದೇಶದ ಬೀದಿಗಳು ವಾಷಿಂಗ್ಟನ್‌ ಬೀದಿಗಳಿಗಿಂತ ಉತ್ತಮವಾಗಿವೆ ಎಂದು ಈ ಮೊದಲೇ ಹೇಳಿದ್ದೇನೆ. ವಾಷಿಂಗ್ಟನ್‌ಗಿಂತಲೂ ಇಂದೋರ್ ಉತ್ತಮವಾಗಿದೆಯೋ, ಇಲ್ಲವೋ ಎಂಬುದನ್ನು ಅಮೆರಿಕದಿಂದ ಬಂದಿರುವ ಪ್ರತಿನಿಧಿಗಳನ್ನು ಕೇಳಬಯಸುತ್ತೇನೆ' ಎಂದು ಹೇಳಿದರು.

ಮಧ್ಯಪ್ರದೇಶದ ಅಧಿಕಾರಿಗಳು ಇಂದೋರ್‌ನ್ನು ಉನ್ನತ ಮಟ್ಟಕ್ಕೆ ಒಯ್ಯಲು ಶ್ರಮಿಸಿದ್ದಾರೆ. ಅಮೆರಿಕ ಪ್ರತಿನಿಧಿಗಳು (ಇವರಲ್ಲಿ ಹೆಚ್ಚಿನ ಎನ್‌ಆರ್‌ಐಗಳು) ಇಂದೋರ್‌ ಹಲವು ಕಾರಣಗಳಿಂದ ಉತ್ತಮವಾಗಿವೆ ಎಂದು ಕಂಡುಕೊಳ್ಳಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಶಿವರಾಜ್ ಸಿಂಗ್ ಚೌಹಾನ್ ಹೇಳಿಕೆ ವಿವಾದಕ್ಕೆ ಕಾರಣವಾಗಿದ್ದು, ಕಾಂಗ್ರೆಸ್ ವ್ಯಂಗ್ಯವಾಡಿತ್ತು. ಆದರೆ, ಚೌಹಾನ್ ಮಾತ್ರ ತಮ್ಮ ನಿಲುವಿಗೆ ಬದ್ಧರಾಗಿದ್ದಾರೆ.