ಮಹಿಳೆಯಾಗುವ ಮೊದಲು ವೀರ್ಯ ಸಂರಕ್ಷಣೆಗೆ ಮುಂದಾದ

ಕೊಚ್ಚಿ: ಲಿಂಗ ಬದಲಿಸಿಕೊಳ್ಳಲು ಶಸ್ತ್ರಚಿಕಿತ್ಸೆಗೆ ಸಿದ್ಧವಾಗಿರುವ ವ್ಯಕ್ತಿ ವೀರ್ಯ ಬ್ಯಾಂಕ್‌ನಲ್ಲಿ ತನ್ನ ವೀರ್ಯ ಸಂರಕ್ಷಿಸಿಡಲು ನಿರ್ಧರಿಸಿದ್ದಾನೆ.

ಮಹಿಳೆಯಾಗಲು ಬಯಸಿರುವ ವ್ಯಕ್ತಿ (39) ಮುಂದೆ ಮಗು ಪಡೆಯಲು ತೊಂದರೆ ಆಗದಂತೆ ಮುನ್ನೆಚ್ಚರಿಕೆ ವಹಿಸಿ ಈ ನಿರ್ಧಾರ ಕೈಗೊಂಡಿದ್ದಾನೆ.

'ಗಂಡಸಿನ ದೇಹವಿದ್ದರೂ, ಈತನ ಮನಸ್ಸು, ಹಾವ ಭಾವ ಹೆಂಗಸಿನ ರೀತಿಯಲ್ಲಿದೆ. ಮಹಿಳೆಯಾಗಿ ಬದಲಾಗುವ ಪ್ರಕ್ರಿಯೆಯಲ್ಲಿ ಪಡೆಯುವ ಹಾರ್ಮೋನ್ ಚಿಕಿತ್ಸೆಯಿಂದ ವೀರ್ಯ ನಾಶವಾಗುವುದು. ಆದ್ದರಿಂದ ಈಗಲೇ ತನ್ನ ವೀರ್ಯ ಸಂರಕ್ಷಿಸಿಡುವಂತೆ ಆತ ಕೋರಿದ್ದಾನೆ. ಭವಿಷ್ಯದಲ್ಲಿ ಮಗು ಪಡೆಯುವ ಆಸೆಗೆ ಧಕ್ಕೆಯಾಗದಂತೆ ಮುನ್ನೆಚ್ಚರಿಕೆ ವಹಿಸಿದ್ದಾನೆ,'ಎಂದು ಕೊಚ್ಚಿನ ಸಿಐಎಂಎಆರ್‌ ಫಲವಂತಿಕೆ ಕೇಂದ್ರದ ನಿರ್ದೇಶಕ ಡಾ.ಪರಶುರಾಮ್‌ ಗೋಪಿನಾಥ್‌ ಹೇಳಿದ್ದಾರೆ.

ಕಣ್ಣೂರು ಮೂಲದ ರವೀಂದ್ರ (ಹೆಸರು ಬದಲಿಸಲಾಗಿದೆ) ಈಗಾಗಲೇ ವೀರ್ಯ ಬ್ಯಾಂಕ್‌ನಲ್ಲಿ ತನ್ನ ವೀರ್ಯ ಸಂರಕ್ಷಿಸಿದ್ದು, ಈಗ ಮತ್ತಷ್ಟು ವೀರ್ಯ ಸಂರಕ್ಷಿಸಿಡಲು ಬಯಸಿದ್ದಾನೆ. ಕೆಳದ ಕೆಲವು ತಿಂಗಳಿಂದ ರವೀಂದ್ರ ಹಾರ್ಮೋನ್‌ ಚಿಕಿತ್ಸೆ ಪಡೆಯುತ್ತಿದ್ದಾನೆ.

'ಹಣಕಾಸಿನ ಸಮಸ್ಯೆ, ಸಾಮಾಜಿಕ ಸಮಸ್ಯೆಗಳ ಕಾರಣದಿಂದ ಲಿಂಗಪರಿವರ್ತಿತರು ಮಗುವನ್ನು ಪಡೆಯುವ ಆಕಾಂಕ್ಷೆ ಹೊಂದಿರುವುದಿಲ್ಲ. ಆದರೆ, ಕೆಲವರಿಗೆ ಮಗು ಪಡೆಯುವ ಆಸೆ ಇರುತ್ತದೆ. ಮಕ್ಕಳನ್ನು ಬೆಳೆಸುವುದು ಕಷ್ಟವಾದರೂ, ನಾವು ಮನುಷ್ಯರಲ್ಲವೇ , ನಮಗೂ ಆಸೆಗಳಿರುತ್ತವೆ,'ಎಂದು ಎಲ್‌ಜಿಬಿಟಿ ಕಾರ್ಯಕರ್ತರಾದ ಶೀತಲ್‌ ಶ್ಯಾಂ ಹೇಳಿದ್ದಾರೆ.

ಅಮ್ಮ ಆಗಲಾರ:

'ತನ್ನದೇ ವೀರ್ಯದಿಂದ ರವೀಂದ್ರ ಗರ್ಭ ಧರಿಸಲಾರ. ಮಗು ಬೇಕಿದ್ದಲ್ಲಿ, ಬಾಡಿಗೆ ತಾಯಿ ಮೊರೆ ಹೋಗಬೇಕು. ( ಹೊಸ ವಿಧೇಯಕದನ್ವಯ ಇದು ಸಾಧ್ಯವಾಗದು) ಲಿಂಗ ಬದಲಾವಣೆ ಕೇವಲ ದೈಹಿಕ ಬದಲಾವಣೆ ಅಷ್ಟೇ. ಗರ್ಭಕೋಶ, ಅಂಡಾಶಯಗಳನ್ನು ಅಳವಡಿಸಲು ಸಾಧ್ಯವಾಗದ ಕಾರಣ ಎಂದಿಗೂ ಆತ ತಾಯಿ ಆಗಲಾರ,' ಎಂದು ಏಮ್ಸ್‌ನ ಪ್ಲಾಸ್ಟಿಕ್‌ ಸರ್ಜನ್‌ ಡಾ. ಸಂದೀಪ್‌ ವಿಜಯ ರಾಘವನ್‌ ಹೇಳಿದ್ದಾರೆ.