ಒಂದೇ ಕೊಠಡಿಯಲ್ಲಿ 114 ನಕಲಿ ಕಂಪನಿಗಳ ವಹಿವಾಟು: ಅಧಿಕಾರಿಗಳಿಗೆ ಶಾಕ್‌!

ಹೈದರಾಬಾದ್‌: ಟೋನಿ ಜ್ಯುಬಿಲಿ ಹಿಲ್ಸ್‌ನಲ್ಲಿ ಒಂದೇ ಒಂದು ಕೊಠಡಿಯಲ್ಲಿ 114 ಕಂಪನಿಗಳು ಕಾರ್ಯಾಚರಿಸುತ್ತಿರುವುದನ್ನು ರಿಜಿಸ್ಟ್ರಾರ್‌ ಆಫ್‌ ಕಂಪನೀಸ್‌ (ಆರ್‌ಒಸಿ) ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ.

ಇಲ್ಲಿ ಒಟ್ಟು 25 ಉದ್ಯೋಗಿಗಳಿದ್ದಾರೆ. ಹೆಚ್ಚಿನ ಕಂಪನಿಗಳ ಮಾಲೀಕತ್ವ ಹೊಂದಿರುವುದು ಸತ್ಯಂ ಹಗರಣದ ಪ್ರಮುಖ ಆರೋಪಿ ರಾಮಲಿಂಗ ರಾಜು ಕುಟುಂಬ ಸದಸ್ಯರು ಎಂಬುದು ಗಮನಾರ್ಹ.

ಚಿಕ್ಕದಾಗಿರುವ ಈ ಕಚೇರಿ ಕೊಠಡಿಯು ಫಾರ್ಚೂನ್‌ ಮೊನಾರ್ಕ್‌ ಮಾಲ್‌ನಲ್ಲಿ ಎಸ್‌ಆರ್‌ಎಸ್‌ಆರ್‌ ಅಡ್ವೈಸರಿ ಸರ್ವಿಸ್‌ ಪಬ್ಲಿಕ್‌ ಲಿಮಿಟೆಡ್‌ ಎಂಬ ಹೆಸರಿನ ಫೈನಾನ್ಶಿಯಲ್‌ ಸರ್ವಿಸ್‌ ಕಂಪನಿ ಇದಾಗಿದೆ.'

ತೆಲಂಗಾಣ ಮತ್ತು ಆಂಧ್ರಪ್ರದೇಶಗಳಲ್ಲಿ ಒಂದು ಕಂಪೆನಿಯಲ್ಲೇ ಈ ಹಲವು ಕಂಪನಿಗಳು ನೋಂದಣಿಗೊಂಡಿವೆ. ಮೇಲ್ನೋಟಕ್ಕೆ ಇಲ್ಲಿ ಆರ್ಥಿಕ ವಹಿವಾಟುಗಳನ್ನು ಸೂಕ್ತ ನಿಯಮಗಳಡಿ ನಡೆಸುತ್ತಿಲ್ಲವೆಂಬುದು ಕಂಡು ಬಂದಿದೆ. ಸಮಗ್ರ ಪರಿಶೀಲನೆ ಬಳಿಕ ವಿಷಯವನ್ನು ಖಚಿತಪಡಿಸುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಸತ್ಯಂ ಹಗರಣದ ಬಳಿಕ ಈ ಕಂಪನಿಗಳಿಗಳ ವಿರುದ್ಧ ಸಿಬಿಐ ಮತ್ತು ಇಡಿ ದೋಷಾರೋಪ ಪಟ್ಟಿ ಕೂಡ ಸಲ್ಲಿಸಿತ್ತು. ಈ ಕಂಪನಿಗಳು ಸಕ್ರಿಯವಾಗಿದ್ದರೂ ಕಾರ್ಯಾಚರಿಸುತ್ತಿಲ್ಲ. ಎಲ್ಲವೂ ಶೂನ್ಯ ಬ್ಯಾಲೆನ್ಸ್ ಶೀಟ್‌ ತೋರಿಸುತ್ತಿವೆ. ಪ್ರಕರಣದಲ್ಲಿ ಎದುರಿನವರಿಗೆ ಹಿನ್ನಡೆಯಾದರೆ ಜಪ್ತಿ ಆಗಿರುವ ಆಸ್ತಿಗಳು ಕಂಪನಿಗೆ ವಾಪಸಾಗಲಿವೆ. ಎಲ್ಲ ಕಂಪನಿಗಳು ಒಂದೇ ವಿಳಾಸದಲ್ಲಿರುವುದು ಅಪರಾಧವಲ್ಲ ಎಂದು ಕಂಪೆನಿಯ ಸಲಹಾ ಸೇವಾ ವಿಭಾಗದ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ.