ಮೇಲ್ವರ್ಗದ ಬಡವರಿಗೆ ಮೀಸಲು ಫೆ.1ರಿಂದ ಜಾರಿ

ಹೊಸದಿಲ್ಲಿ: ಕೇಂದ್ರ ಸರಕಾರದ ನೇಮಕಾತಿ ಪ್ರಕ್ರಿಯೆಗಳಲ್ಲಿ ಮೇಲ್ವರ್ಗದ ಬಡವರಿಗಾಗಿನ ಶೇಕಡ 10ರ ಮೀಸಲು ನೀತಿಯು ಫೆ.1ರಿಂದ ಜಾರಿಗೆ ಬರಲಿದೆ.

ಗುರುವಾರ ಈ ಕುರಿತು ಆದೇಶ ಹೊರಡಿಸಿರುವ ಸಿಬ್ಬಂದಿ ಸಚಿವಾಲಯವು, ಈ ಸಂಬಂಧ ವಿವರವಾದ ಪ್ರಕಟಣೆಯನ್ನು ಸದ್ಯದಲ್ಲೇ ಹೊರಡಿಸುವುದಾಗಿ ತಿಳಿಸಿದೆ.

ರೈಲ್ವೆಯಲ್ಲೂ ಮೀಸಲು: ಭಾರತೀಯ ರೈಲ್ವೆಯಲ್ಲಿ 2021ರ ಹೊತ್ತಿಗೆ 4 ಲಕ್ಷ ಹುದ್ದೆಗಳಿಗೆ ನೇಮಕಾತಿ ನಡೆಯಲಿದೆ. ಇದರಿಂದ ಮುಂದಿನ ದಿನಗಳಲ್ಲಿ ರೈಲ್ವೆ ನೇಮಕಾತಿಗಳಲ್ಲಿ ಮೇಲ್ವರ್ಗದ ಬಡವರಿಗೆ ಶೇ.10ರ ಮೀಸಲು ಸೌಲಭ್ಯ ಅನುಕೂಲ ತಂದುಕೊಡಲಿದೆ ಎಂದು ರೈಲ್ವೆ ಸಚಿವ ಪಿಯೂಶ್‌ ಗೋಯಲ್‌ ಹೇಳಿದ್ದಾರೆ.

ರೈಲ್ವೆ ಇಲಾಖೆ 15.06 ಲಕ್ಷ ನೌಕರರ ಸಾಮರ್ಥ್ಯ‌ಬಲ ಹೊಂದಿದೆ. ಸದ್ಯ 12.23 ಲಕ್ಷ ನೌಕರರು ಕೆಲಸ ಮಾಡುತ್ತಿದ್ದು, 2.82 ಲಕ್ಷ ಹುದ್ದೆಗಳು ಖಾಲಿ ಇವೆ. ಸಾಕಷ್ಟು ಸಂಖ್ಯೆಯಲ್ಲಿನ ನಿವೃತ್ತಿಯಿಂದ 2020ರ ಹೊತ್ತಿಗೆ ಖಾಲಿ ಹುದ್ದೆಗಳ ಪ್ರಮಾಣ 4 ಲಕ್ಷ ತಲುಪುವ ಅಂದಾಜಿದೆ. ಈ ಕೊರತೆಯನ್ನು ನಿಭಾಯಿಸುವ ನಿಟ್ಟಿನಲ್ಲಿ ಈಗಾಗಲೇ 1.50 ಲಕ್ಷ ಹುದ್ದೆಗಳಿಗೆ ನೇಮಕಾತಿ ಆರಂಭಿಸಲಾಗಿದೆ. ಇದರ ಜತೆಗೆ ಮುಂದಿನ ದಿನಗಳಲ್ಲಿ 2.50 ಹುದ್ದೆಗಳಿಗೆ ನೇಮಕಾತಿ ಪ್ರಕ್ರಿಯೆ ನಡೆಯಲಿದೆ. ಇನ್ಮುಂದೆ ನಡೆಯುವ ಎಲ್ಲ ನೇಮಕಾತಿ ಪ್ರಕ್ರಿಯೆಗಳಲ್ಲೂ ಶೇಕಡ 10ರ ಮೀಸಲು ಕೋಟಾ ಅನ್ವಯವಾಗಲಿದೆ ಎಂದು ಅವರು ತಿಳಿಸಿದ್ದಾರೆ.