ಆ್ಯಪ್ನಗರ

ಸಿಕ್ಕಿಂನಲ್ಲಿ ಎಸ್‌ಡಿಎಫ್‌ನ 10 ಶಾಸಕರು ಬಿಜೆಪಿ ಸೇರ್ಪಡೆ

ಸಿಕ್ಕಿಂ ಹೊರತುಪಡಿಸಿ ಈಶಾನ್ಯದ ಎಲ್ಲ ರಾಜ್ಯಗಳಲ್ಲಿ ಬಿಜೆಪಿ ಸ್ವಂತ ಬಲ ಅಥವಾ ಮೈತ್ರಿ ಮೂಲಕ ಸರಕಾರ ನಡೆಸುತ್ತಿದೆ.

PTI 14 Aug 2019, 5:00 am
ಹೊಸದಿಲ್ಲಿ: ಸಿಕ್ಕಿಂನಲ್ಲಿ ಘಟಿಸಿದ ಕ್ಷಿಪ್ರ ರಾಜಕೀಯ ಬೆಳವಣಿಗೆಯೊಂದರಲ್ಲಿ ಇದುವರೆಗೆ ಪ್ರತಿಪಕ್ಷವಾಗಿದ್ದ ಸಿಕ್ಕಿಂ ಡೆಮಾಕ್ರಟಿಕ್‌ ಫ್ರಂಟ್‌(ಎಸ್‌ಡಿಎಫ್‌)ನ 10 ಶಾಸಕರು ಮಂಗಳವಾರ ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ. ಇದರೊಂದಿಗೆ ಪ್ರಸಕ್ತ ವಿಧಾನಸಭೆಯಲ್ಲಿ ಒಬ್ಬ ಶಾಸಕನನ್ನೂ ಹೊಂದಿರದ ಬಿಜೆಪಿ ದಿಢೀರನೆ ಪ್ರಮುಖ ಪ್ರತಿಪಕ್ಷವಾಗಿ ಹೊರ ಹೊಮ್ಮಿದೆ.
Vijaya Karnataka Web 10 sdf mlas join bjp in sikkim
ಸಿಕ್ಕಿಂನಲ್ಲಿ ಎಸ್‌ಡಿಎಫ್‌ನ 10 ಶಾಸಕರು ಬಿಜೆಪಿ ಸೇರ್ಪಡೆ


ದಿಲ್ಲಿಯಲ್ಲಿ ಬಿಜೆಪಿ ಕಾರ್ಯಾಧ್ಯಕ್ಷ ಜೆ.ಪಿ.ನಡ್ಡಾ ಅವರನ್ನು ಭೇಟಿಯದ ಹತ್ತು ಶಾಸಕರು, ಸಿಕ್ಕಿಂ ರಾಜ್ಯದ ಬಿಜೆಪಿ ಉಸ್ತುವಾರಿ ರಾಮ್‌ ಮಾಧವ್‌ ಸಮ್ಮುಖದಲ್ಲಿ ಬಿಜೆಪಿ ಸೇರ್ಪಡೆಯಾದರು. ''ಎಸ್‌ಡಿಎಫ್‌ ಒಟ್ಟು 13 ಶಾಸಕರನ್ನು ಹೊಂದಿದೆ. ಆ ಪಕ್ಷದ 10 ಶಾಸಕರು ಬಿಜೆಪಿ ಸೇರಿವ ತೀರ್ಮಾನ ಮಾಡಿದ್ದರೆ. ಮೂರನೇ ಎರಡು ಭಾಗಕ್ಕಿಂತ ಹೆಚ್ಚಿನ ಸಂಖ್ಯೆಯ ಶಾಸಕರು ಬಿಜೆಪಿಗೆ ಸೇರಿರುವುದರಿಂದ ಇವರಿಗೆ ಪಕ್ಷಾಂತರ ನಿಷೇಧ ಕಾಯಿದೆಯ ನಿರ್ಬಂಧ ಅನ್ವಯಿಸುವುದಿಲ್ಲ,'' ಎಂದು ರಾಮ್‌ಮಾಧವ್‌ ಸುದ್ದಿಗಾರರಿಗೆ ತಿಳಿಸಿದರು.

ಸಿಕ್ಕಿಂ ಹೊರತುಪಡಿಸಿ ಈಶಾನ್ಯದ ಎಲ್ಲ ರಾಜ್ಯಗಳಲ್ಲಿ ಬಿಜೆಪಿ ಸ್ವಂತ ಬಲ ಅಥವಾ ಮೈತ್ರಿ ಮೂಲಕ ಸರಕಾರ ನಡೆಸುತ್ತಿದೆ. ಈಗ ಸಿಕ್ಕಿಂನಲ್ಲೂ ದೊಡ್ಡ ಸಂಖ್ಯೆಯ ಶಾಸಕರನ್ನು ತನ್ನತ್ತ ಸೆಳೆದಿರುವ ಕೇಸರಿ ಪಕ್ಷ, ಅಧಿಕಾರ ಸೂತ್ರ ಹಿಡಿಯುವ ಹೊಸ್ತಿಲಿಗೆ ಬಂದು ನಿಂತಿದೆ.

32 ಸದಸ್ಯಬಲದ ಸಿಕ್ಕಿಂ ವಿಧಾನಸಭೆಯಲ್ಲಿ ಆಡಳಿತಾರೂಢ ಸಿಕ್ಕಿಂ ಕ್ರಾಂತಿಕಾರಿ ಮೋರ್ಚಾ (ಎಸ್‌ಕೆಎಂ) 17 ಹಾಗೂ ಎಸ್‌ಡಿಎಫ್‌ 13 ಸ್ಥಾನ ಶಾಸಕರನ್ನು ಹೊಂದಿದ್ದವು. ಎರಡು ಸ್ಥಾನಗಳು ತೆರವಾಗಿವೆ.

ಸಿಕ್ಕಿಂ ವಿಧಾನಸಭೆ ಸದ್ಯದ ಬಲಾಬಲ

ಒಟ್ಟು ಸ್ಥಾನ 32
ಎಸ್‌ಕೆಎಂ 17
ಬಿಜೆಪಿ 10
ಎಸ್‌ಡಿಎಫ್‌ 3
ತೆರವು 2

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ