ಪರೀಕ್ಷೆಗೆ ಓದುವ ಬದಲು ಪಬ್‌ಜಿ ಗೇಮ್‌ ಆಡುತ್ತಿದ್ದ ಎಂದು ಪೋಷಕರು ಬೈದಿದ್ದಕ್ಕೆ ವಿದ್ಯಾರ್ಥಿ ಆತ್ಮಹತ್ಯೆ

ಹೈದರಾಬಾದ್: 10ನೇ ತರಗತಿ ಎಸ್‌ಎಸ್‌ಸಿ ಪರೀಕ್ಷೆಗೆ ತಯಾರಿ ಆಗುವ ಬದಲು ಪಬ್‌ಜೀ ವೀಡಿಯೋ ಗೇಮ್ ಆಡುತ್ತಿದ್ದ ಅಂತ ಪೋಷಕರು ಬೈಯ್ದಿದ್ದಕ್ಕೆ ಯುವಕ ಆತ್ಮಹತ್ಯ ಎಮಾಡಿಕೊಂಡಿರುವ ಘಟನೆ ತೆಲಂಗಾಣದಲ್ಲಿ ನಡೆದಿದೆ.

ತೆಲಂಗಾಣದ ಮಲ್ಕಾಜ್‌ಗಿರಿಯ ವಿಷ್ಣುಪುರಿ ಎಕ್ಸ್‌ಟೆನ್ಶನ್‌ ನಿವಾಸಿ 16 ವರ್ಷ ವಯಸ್ಸಿನ ಕಲ್ಲಕುರಿ ಸಾಂಬಶಿವ ಆತ್ಮಹತ್ಯೆ ಮಾಡಿಕೊಂಡಿರುವ ಯುವಕ. ಮಲ್ಕಾಜ್‌ಗಿರಿಯ ಗೌತಮಿ ಶಾಲೆಯ ವಿದ್ಯಾರ್ಥಿಯಾಗಿದ್ದ ಸಾಂಬಶಿವ ತನ್ನ ಮನೆಯಲ್ಲಿ ಸೋಮವಾರ ರಾತ್ರಿ ( ಏಪ್ರಿಲ್ 1, 2019) ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಈ ಸಂಬಂಧ ಆತ್ಮಹತ್ಯೆಗೀಡಾದ ವಿದ್ಯಾರ್ಥಿ ತಂದೆ ಪೊಲೀಸರಿಗೆ ದೂರು ನೀಡಿದ್ದಾರೆ. ಅರ್ಚಕರಾಗಿರುವ ಭರತ್ ರಾಜ್‌ (45) ತನ್ನ ಪುತ್ರ ತನ್ನ ಕೋಣೆಯಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಮಲ್ಕಾಜ್‌ಗಿರಿ ಪೊಲೀಸ್‌ ಠಾಣೆಯಲ್ಲಿ ತಿಳಿಸಿದ್ದಾರೆ. ಮೊಬೈಲ್‌ ಫೋನ್‌ನಲ್ಲಿ ಪಬ್‌ಜಿವೀಡಿಯೋ ಗೇಮ್‌ ಆಡುತ್ತಿದ್ದ ಕಾರಣ ಸಾಂಬಶಿವನ ತಾಯಿ ಉಮಾದೇವಿ ಬೈದಿದ್ದಕ್ಕೆ ನೊಂದು ಆತ್ಮಹತ್ಯೆಗೆ ಶರಣಾಗಿದ್ದಾನೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಇನ್ನು, ವಿದ್ಯಾರ್ಥಿ ಆತ್ಮಹತ್ಯೆ ಪ್ರಕರಣದ ಬಗ್ಗೆ ಮಾತನಾಡಿದ ಎಸ್‌ಐ, ''ಮೊಬೈಲ್‌ ಫೋನ್‌ನಲ್ಲಿ ಸಾಂಬಶಿವ ವೀಡಿಯೋ ಗೇಮ್‌ಗಳನ್ನು ಆಡುತ್ತಿದ್ದ ಬಗ್ಗೆ ಪೋಷಕರು ಹಲವು ಬಾರಿ ಎಚ್ಚರಿಕೆ ನೀಡಿದ್ದರು. ಇದೇ ರೀತಿ, ಮಂಗಳವಾರ ( ಏಪ್ರಿಲ್ 2,2019) ರಂದು ಇಂಗ್ಲೀಷ್‌ ಪರೀಕ್ಷೆ ಇತ್ತು. ಆದರೂ, ಅದನ್ನು ಬಿಟ್ಟು ಸೋಮವಾರ ( ಏಪ್ರಿಲ್ 1, 2019) ಆತ ಪಬ್‌ ಜಿ ಗೇಮ್‌ ಆಡುತ್ತಿದ್ದದ್ದಕ್ಕೆ ತಾಯಿ ಎಚ್ಚರಿಕೆ ನೀಡಿದ್ದರು.ಬಳಿಕ ತನ್ನ ಕೋಣೆಯೊಳಗೆ ಹೋದ ಸಾಂಬಶಿವ ಬಾಗಿಲಿಗೆ ಬೋಲ್ಟ್ ಹಾಕಿಕೊಂಡಿದ್ದ. ನಂತರ, ಎಷ್ಟು ಹೊತ್ತಾದರೂ ಬಾಗಿಲು ತೆಗೆಯಲಿಲ್ಲ ಎನ್ನುವ ಕಾರಣಕ್ಕೆ ಆತನ ಪೋಷಕರು ಬಾಗಿಲು ಮುರಿದು ನೋಡಿದಾಗ ಟವೆಲ್‌ ಸಹಾಯದಿಂದ ಸೀಲಿಂಗ್‌ ಫ್ಯಾನ್‌ಗೆ ನೇಣು ಹಾಕಿಕೊಂಡಿರುವುದನ್ನು ಆತನ ಪೋಷಕರು ನೋಡಿದ್ದಾರೆ'' ಎಂದು ಎಸ್‌ಐ ಮಾಹಿತಿ ನೀಡಿದ್ದಾರೆ.