11 ಮಂದಿ ಅಕ್ರಮ ಬಾಂಗ್ಲಾ ವಲಸಿಗರ ಬಂಧನ

ಶಿಲ್ಲಾಂಗ್‌: ಮೆಘಾಲಯದ ದಕ್ಷಿಣ ಗೆರೊ ಹಿಲ್ಸ್‌ ಜಿಲ್ಲೆಯ ಗ್ರಾಮವೊಂದಲ್ಲಿ ನಾಲ್ವರು ಮಕ್ಕಳು, ಒಬ್ಬ ಮಾನವ ಕಳ್ಳಸಾಗಣೆದಾರ ಸೇರಿದಂತೆ 11 ಮಂದಿ ಅಕ್ರಮ ಬಾಂಗ್ಲಾದೇಶಿ ವಲಸಿಗರನ್ನು ಬಿಎಸ್‌ಎಫ್‌ ಬಂಧಿಸಿದೆ.

ಇಂಡೋ-ಬಾಂಗ್ಲಾ ಗಡಿಯಲ್ಲಿ ಗಡಿ ಬೇಲಿಯ ಅನುಪಸ್ಥಿತಿಯ ಲಾಭ ಪಡೆದ ಅಕ್ರಮ ವಲಸಿಗರು, ಶಾಶ್ವತವಾಗಿ ಇಲ್ಲಿ ನೆಲೆಸುವ ಉದ್ದೇಶದಿಂದ ದೇಶವನ್ನು ಪ್ರವೇಶಿಸಿದರು. ಇವರನ್ನು ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ. 2ರಿಂದ 5 ವರ್ಷ ವಯಸ್ಸಿನ ನಾಲ್ವರು ಮಕ್ಕಳು ತಮ್ಮ ಪೋಷಕರೊಂದಿಗೆ ಬಂದಿದ್ದು, ಕಾನೂನು ಪ್ರಕಾರ ಕ್ರಮಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಗೆರೊ ಹಿಲ್ಸ್‌ ಜಿಲ್ಲೆಯ ರಾಷ್ಟ್ರೀಯ ಹೆದ್ದಾರಿ 62ರಲ್ಲಿ ವಾಹನಗಳ ವಾಡಿಕೆ ತಪಾಸಣೆ ವೇಳೆ 11 ಮಂದಿ ಅಕ್ರಮ ಬಾಂಗ್ಲಾ ವಲಸಿಗರನ್ನು ಬಿಎಸ್‌ಎಫ್‌ ಯೋಧರು ಪತ್ತೆಹಚ್ಚಿ ಬಂಧಿಸಿದರು. ಇವರೆಲ್ಲರೂ ಬಾಂಗ್ಲಾದೇಶದ ನೇತ್ರಕೊನಾ ಮತ್ತು ಸುನಮ್‌ಗಂಜ್‌ ಜಿಲ್ಲೆಯ ನಿವಾಸಿಗಳು. ಇವರೆಲ್ಲರೂ ಪಶ್ಚಿಮ ಬಂಗಾಳದ ಕೂಚ್‌ಬಿಹಾರ್‌ ಜಿಲ್ಲೆಯಲ್ಲಿ ನೆಲಸಲು ಯೋಜಿಸಿದ್ದರು. ಕೂಚ್‌ಬಿಹಾರ್‌ ಜಿಲ್ಲೆಯ ಕಲಾರಾಯೆಕುತಿ ಗ್ರಾಮದ ನಿವಾಸಿಯೊಬ್ಬ, ಅಕ್ರಮ ವಲಸಿಗರು ಗಡಿ ದಾಟಲು ಸಹಾಯ ಮಾಡಿದ್ದಾನೆ. ಬಂಧಿತ ಬಾಂಗ್ಲಾದೇಶಿಗಳ ಪ್ರಕಾರ, ಅವರ ಕುಟುಂಬ ಸದಸ್ಯರು ಈಗಾಗಲೇ ಕೂಚ್‌ಬಿಹಾರ್‌ಗೆ ವಲಸೆ ಹೋಗಿದ್ದು, ಅಲ್ಲೇ ನೆಲೆಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.