15 ಸಿಬಿಐ ಅಧಿಕಾರಿಗಳಿಗೆ ಗೃಹ ಇಲಾಖೆಯಿಂದ ಮೆಡಲ್‌, ಬೆಂಗಳೂರಿನ ಅಧಿಕಾರಿಯೊಬ್ಬರಿಗೆ ಗೌರವ!

ಹೊಸದಿಲ್ಲಿ: ಧಾರವಾಡದಲ್ಲಿ ನಡೆದ ಬಿಜೆಪಿ ಕಾರ‍್ಯಕರ್ತ ಯೋಗೇಶ್‌ ಗೌಡ ಹತ್ಯೆ ಪ್ರಕರಣ ಸೇರಿ ಹಲವು ಕೊಲೆ ಕೇಸ್‌ಗಳ ತನಿಖೆ ನಡೆಸಿದ 15 ನುರಿತ ಸಿಬಿಐ ಅಧಿಕಾರಿಗಳಿಗೆ 2020ನೇ ಸಾಲಿನ ಪ್ರತಿಷ್ಠಿತ ಕೇಂದ್ರ ಗೃಹ ಸಚಿವರ ಮೆಡಲ್‌ ಸಂದಿದೆ. ಅತ್ಯಂತ ವೃತ್ತಿ ಪರತೆಯೊಂದಿಗೆ ತನಿಖೆ ನಡೆಸಿ ಯಶಸ್ವಿಯಾದ ಒಟ್ಟು 121 ಪೊಲೀಸರು ಈ ಪದಕಕ್ಕೆ ಭಾಜನರಾಗಿದ್ದಾರೆಂದು ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

ಈ ಪುರಸ್ಕಾರ ಪಡೆದ 15 ಸಿಬಿಐ ಅಧಿಕಾರಿಗಳಲ್ಲಿ ಬೆಂಗಳೂರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಇನ್ಸ್‌ಪೆಕ್ಟರ್‌ ರಾಕೇಶ್‌ ರಂಜನ್‌ ಅವರಿದ್ದಾರೆ. ಇವರು ಧಾರವಾಡದಲ್ಲಿ ನಡೆದ ಬಿಜೆಪಿ ಕಾರ‍್ಯಕರ್ತ ಯೋಗೇಶ್‌ ಗೌಡ ಹತ್ಯೆ ಪ್ರಕರಣದ ತನಿಖೆ ನಡೆಸಿದ್ದರು. ವಿಚಾರವಾದಿ ನರೇಂದ್ರ ಧಾಬೋಲ್ಕರ್‌ ಹತ್ಯೆ ಕೇಸ್‌ ತನಿಖೆ ನಡೆಸಿದ ಮುಂಬಯಿ ಸ್ಪೆಷಲ್‌ ಕ್ರೈಂ ಬ್ರ್ಯಾಂಚ್‌ ಎಎಸ್‌ಪಿ ಸುಭಾಶ್‌ ಸಿಂಗ್‌ ಅವರಿಗೂ ಮೆಡಲ್‌ ಸಂದಿದೆ.