‘ಪಬ್‌ಜೀ’ ಆಡಲು ವಿಚ್ಛೇದನಕ್ಕಾಗಿ ಮಹಿಳಾ ಸಹಾಯವಾಣಿಗೆ ಕರೆ!

ಅಹಮದಾಬಾದ್‌ : ಪಬ್‌ಜೀ (ಪ್ಲೇಯರ್ಸ್‌ ಅನ್‌ನೌನ್‌ ಬ್ಯಾಟಲ್‌ಗ್ರೌಂಡ್‌) ಆನ್‌ಲೈನ್‌ ಗೇಮ್‌ ಆಡುವವರ ಹುಚ್ಚುತನ ದಿನೇದಿನೆ ಮಿತಿ ಮೀರುತ್ತಿದೆ ಎನ್ನುವುದಕ್ಕೆ ಗುಜರಾತಿನಲ್ಲಿ ಇತ್ತೀಚೆಗೆ ನಡೆದ ವಿಲಕ್ಷಣ ಪ್ರಕರಣವೇ ಸಾಕ್ಷಿ!

19 ವರ್ಷದ ಮಹಿಳೆಯೊಬ್ಬಳು ಪ್ರತಿ ದಿನ ಜತೆಗಾರನೊಂದಿಗೆ ಪಬ್‌ಜೀ ಆಡುತ್ತಿದ್ದಳು. ಒಂದು ಮಗುವಿನ ತಾಯಿಯಾಗಿದ್ದರೂ ಆಕೆಗೆ ಪಬ್‌ಜೀ ಆಡುವ ಅಭ್ಯಾಸ ದಿನೇದಿನೆ ಹೆಚ್ಚುತ್ತಿತ್ತು. ಹೀಗೆ ನಿರಂತರ ಗೇಮ್‌ ಆಡಿದ ಬಳಿಕ ಒಂದು ದಿನ ಮಹಿಳಾ ಸಹಾಯವಾಣಿಗೆ ಕರೆ ಮಾಡಿ, ಶೀಘ್ರವಾಗಿ ತನ್ನ ಪತಿಯಿಂದ ವಿಚ್ಛೇದನ ಕೊಡಿಸಿ ಎಂದು ದುಂಬಾಲು ಬಿದ್ದಿದ್ದಾಳೆ. ಕಾರಣ ವಿಚಾರಿಸಿದಾಗ ಪಬ್‌ಜೀ ಆಡಲು ಅಡಚಣೆಯಾಗುತ್ತಿದೆ ಎಂದಿದ್ದಾಳೆ.

ಇದನ್ನು ಕೇಳಿ ಗಾಬರಿಗೊಂಡ ಅಭಯಂ-181 ಸಹಾಯವಾಣಿ ತಂಡ, ಮಹಿಳೆಯ ವಿಳಾಸ ಪಡೆದು ಆಕೆಯ ಮನೆಗೆ ಭೇಟಿ ನೀಡಿ ವಿಚಾರಿಸಿತು.

ಮೊಬೈಲ್‌ನಲ್ಲಿ ನಿತ್ಯ ಪಬ್‌ಜೀ ಆಡುವ ಗೀಳು ಅಂಟಿಸಿಕೊಂಡಿರುವ ಮಹಿಳೆ ಕುಟುಂಬಸ್ಥರೊಂದಿಗೆ ಈ ವಿಚಾರವಾಗಿ ಹಲವು ಬಾರಿ ಜಗಳ ಮಾಡಿಕೊಂಡಿದ್ದಾಳೆ ಎಂಬ ವಿಷಯ ತಂಡಕ್ಕೆ ತಿಳಿಯಿತು. ಬಳಿಕ ಮಹಿಳೆಗೆ ಸಮಾಲೋಚಕರು ತಿಳಿವಳಿಕೆ ಹೇಳಿ ಹಿಂದಿರುಗಿದ್ದಾರೆ. ಪುನವರ್ಸತಿ ಕೇಂದ್ರಕ್ಕೆ ಬರುವಂತೆ ಮಹಿಳೆಗೆ ಸಹಾಯವಾಣಿ ತಂಡದ ಸಮಾಲೋಚಕರು ಸಲಹೆ ನೀಡಿದ್ದಾರೆ. ಅಲ್ಲಿ ಮೊಬೈಲ್‌ ಬಳಸಲು ಅವಕಾಶ ಇರದ ಕಾರಣ, ಬರುವುದಿಲ್ಲ ಎಂದು ಆಕೆ ಹೇಳಿದ್ದಾಗಿ ತಿಳಿದುಬಂದಿದೆ.

ಪ್ರತಿ ನಿತ್ಯ 550ಕ್ಕೂ ಹೆಚ್ಚು ಕರೆಗಳು ಸಹಾಯವಾಣಿಗೆ ಬರುತ್ತವೆ. ಆ ಪೈಕಿ ಮಕ್ಕಳ ಬಗ್ಗೆ ದೂರು ಹೇಳುವ ತಾಯಂದಿರ ಕರೆಗಳು ಅಧಿಕ. ಆದರೆ ಪಬ್‌ಜೀ ವಿಚಾರವಾಗಿ ವಿಚ್ಛೇದನಕ್ಕೆ ಬೇಡಿಕೆ ಇಟ್ಟಂಥ ಕರೆ ಇದೇ ಮೊದಲು ಎಂದು ಸಹಾಯವಾಣಿ ಮುಖ್ಯಸ್ಥ ನರೇಂದ್ರಸಿಂಗ್‌ ಗೋಹಿಲ್‌ ತಿಳಿಸಿದ್ದಾರೆ.