ಆತ್ಮಹತ್ಯಾ ದಾಳಿಕೋರ ಉಗ್ರರ ಪ್ರವೇಶ: ದಿಲ್ಲಿಯಲ್ಲಿ ಹೈ ಅಲರ್ಟ್‌

ಹೊಸದಿಲ್ಲಿ: ಜೈ‍ಷೆ-ಇ-ಮೊಹಮ್ಮದ್‌ನ ಇಬ್ಬರು ಆತ್ಮಹತ್ಯಾ ದಾಳಿಕೋರ ಉಗ್ರರು ದಿಲ್ಲಿ ಪ್ರವೇಶಿಸಿರುವುದಾಗಿ ಗುಪ್ತದಳ ಮಾಹಿತಿ ನೀಡಿದ್ದು, ದಿಲ್ಲಿಯಾದ್ಯಂತ ಕಟ್ಟೆಚ್ಚರ ವಹಿಸಲಾಗಿದೆ.

ದಿಲ್ಲಿಯ ಸಗಟು ಮಾರುಕಟ್ಟೆಗೆ ಪೂರೈಸಲಾಗುವ ಸೇಬು ಹೊತ್ತ ಟ್ರಕ್‌ನಲ್ಲಿ ಉಗ್ರರು ಬರುತ್ತಿರುವುದಾಗಿ ಗುಪ್ತದಳ ಮಾಹಿತಿ ನೀಡಿದೆ. ಪಶ್ಚಿಮ ಭಾರತದ ಕಡೆಯಿಂದ ದಿಲ್ಲಿ ನಗರ ಪ್ರವೇಶಿಸುವ ಟ್ರಕ್‌ಗಳ ಮೇಲೆ ನಿಗಾ ವಹಿಸುವಂತೆ ನೆರೆಯ ರಾಜ್ಯಗಳ ಪೊಲೀಸ್‌ ಮುಖ್ಯಸ್ಥರಿಗೂ ಸೂಚಿಸಲಾಗಿದೆ.

ಚಾಣಕ್ಯಪುರಿ, ಕನ್ನಾಟ್‌ಪ್ಲೇಸ್‌, ಇಂಡಿಯಾ ಗೇಟ್‌, ಪಾರ್ಲಿಮೆಂಟ್‌ ಸ್ಟ್ರೀಟ್‌ ಸುತ್ತಲ ಪ್ರದೇಶಗಳು ಸೇರಿದಂತೆ ಸೆಂಟ್ರಲ್‌ ಮತ್ತು ಉತ್ತರ ದಿಲ್ಲಿಗಳಲ್ಲಿ ಸಿಸಿಟಿವಿ ಕ್ಯಾಮೆರಾ ಸಹಿತ ಭಾರಿ ಭದ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ತಮ್ಮ ಸುತ್ತಮುತ್ತ ಶಂಕಿತ ವಸ್ತು ಪತ್ತೆಯಾದಲ್ಲಿ ತಿಳಿಸುವಂತೆ ಪೊಲೀಸರು ಜನರು, ವ್ಯಾಪಾರಿಗಳು, ರೈಲು, ಬಸ್‌ಗಳ ಪ್ರಯಾಣಿಕರಲ್ಲಿ ಮನವಿ ಮಾಡಿದ್ದಾರೆ.

ದಿಲ್ಲಿ ಸೇರಿದಂತೆ ಸುತ್ತಲ ಫ್ಲಾಜಾಗಳು, ದೊಡ್ಡ ದೇವಾಲಯಗಳ ವಿಶೇಷ ಕಾವಲು ವ್ಯವಸ್ಥೆಗೊಳಿಸಲಾಗಿದೆ. ಮುಂದಿನ ಕೆಲವು ವಾರ ನಿರ್ದಿಷ್ಟ ಉದ್ದೇಶ ರಹಿತ ವಾಹನಗಳ ದಿಲ್ಲಿ ಪ್ರವೇಶವನ್ನು ತಡೆಯುವಂತೆ ಪೊಲೀಸರಿಗೆ ತಿಳಿಸಲಾಗಿದೆ.

ರೈಲು ನಿಲ್ದಾಣ, ದಿಲ್ಲಿ ಮೆಟ್ರೊ ಸ್ಟೇಷನ್‌, ಬಸ್‌ ಟರ್ಮಿನಲ್‌, ರಾಯಭಾರ ಕಚೇರಿ, ಚಾಂದ್‌ನಿ ಚೌಕ್‌, ಪಹರ್‌ಗಂಜ್‌ ಮತ್ತಿತರ ಜನದಟ್ಟಣೆಯ ಮಾರುಕಟ್ಟೆ ಪ್ರದೇಶಗಳ ಸುತ್ತ ವಿಶೇಷ ನಿಗಾದೊಂದಿಗೆ ಕಟ್ಟೆಚ್ಚರ ವಹಿಸಲಾಗುತ್ತಿದೆ. ಹಿರಿಯ ಪೊಲೀಸ್‌ ಅಧಿಕಾರಿಗಳು ಮತ್ತು ಗುಪ್ತದಳ ಸಂಸ್ಥೆಗಳ ಸಭೆ ನಡೆದಿದ್ದು, ಭದ್ರತಾ ಕ್ರಮಗಳ ಕುರಿತು ಚರ್ಚಿಸಲಾಗಿದೆ.

High alert in delhi
Delhi has been put on high alert following an intelligence input that two terrorists could have entered Delhi to carry out a suicide attack.