ಪ್ರತ್ಯೇಕತಾವಾದಿಗಳ ಮಕ್ಕಳೆಲ್ಲ ವಿದೇಶದಲ್ಲಿ!

ಹೊಸದಿಲ್ಲಿ: ಕಾಶ್ಮೀರದಲ್ಲಿ ಪ್ರತ್ಯೇಕತಾವಾದದ ಬೆಂಕಿ ಹಚ್ಚುತ್ತಿರುವ ನಾಯಕರ ಮಕ್ಕಳು, ಬಂಧುಗಳಲ್ಲಿ ಹೆಚ್ಚಿನವರು ಆಗಲೇ ವಿದೇಶಗಳಲ್ಲಿ ಸೆಟ್ಲ್‌ ಆಗಿದ್ದಾರೆ. ಇಲ್ಲಿ ಇಷ್ಟೆಲ್ಲ ಹೋರಾಟ ಮಾಡುತ್ತಿರುವ ಮುಖಂಡರ ಮಕ್ಕಳು ಪರದೇಶದಲ್ಲಿ ತಣ್ಣಗಿರುವುದರ ರಹಸ್ಯವೇನು ಎನ್ನುವುದು ಕುತೂಹಲಕಾರಿ!

ಕಾಶ್ಮೀರದಲ್ಲಿ ಉಗ್ರವಾದವನ್ನು ಮಟ್ಟಹಾಕಬೇಕಾದರೆ ಮೊದಲು ಪ್ರತ್ಯೇಕತಾವಾದಿಗಳ ಬಣ್ಣ ಬಯಲು ಮಾಡಬೇಕು ಎಂಬ ತಂತ್ರದಡಿ ಗೃಹ ಸಚಿವ ಅಮಿತ್‌ ಶಾ ಈ ವ್ಯಕ್ತಿಗಳು ಮತ್ತು ಗುಂಪುಗಳ ಹಿನ್ನೆಲೆಯನ್ನು ಕೆದಕುತ್ತಿದ್ದಾರೆ. ಆಗ ತಿಳಿದುಬಂದಿದ್ದೇ ಈ ಪ್ರತ್ಯೇಕತಾವಾದಿಗಳ ಮಕ್ಕಳು, ಬಂಧುಗಳ್ಯಾರೂ ಸಂಕಷ್ಟದಲ್ಲಿ ಬೇಯುತ್ತಿಲ್ಲ, ಹೋರಾಟದಲ್ಲಿ ಭಾಗಿಯಾಗುತ್ತಿಲ್ಲ ಎಂಬ ಸಂಗತಿ!

ಹುರಿಯತ್‌ ನಾಯಕರೂ ಸೇರಿದಂತೆ 112 ಪ್ರತ್ಯೇಕತಾವಾದಿಗಳು ಮತ್ತು ಅವರ ಬೆಂಬಲಿಗರ 220 ಬಂಧುಗಳು ವಿದೇಶದಲ್ಲಿ ಆರಾಮವಾಗಿದ್ದಾರೆ ಎನ್ನುವುದು ಬಯಲಾಗಿದೆ. ಇಲ್ಲಿನ ಯುವಕರು ಮತ್ತು ಮಕ್ಕಳು ಸೇನೆಯ ಯೋಧರ ಮೇಲೆ ಕಲ್ಲುತೂರಾಟ ನಡೆಸುತ್ತಿದ್ದರೆ, ಹೋರಾಟಗಾರರ ಮಕ್ಕಳು ಆರಾಮವಾಗಿ ವಿದೇಶದಲ್ಲಿ ಓದುತ್ತಿದ್ದಾರೆ. ಸಂಸತ್ತಿನಲ್ಲಿ ಇತ್ತೀಚೆಗೆ ಕಾಶ್ಮೀರದಲ್ಲಿ ರಾಷ್ಟ್ರಪತಿ ಆಳ್ವಿಕೆ ವಿಸ್ತರಣೆ ಕೋರುವ ವೇಳೆ ಅಮಿತ್‌ ಶಾ ಅವರು ಈ ವಿವರಗಳನ್ನು ನೀಡಿದ್ದಾರೆ.

ಕಂಡವರ ಮಕ್ಕಳು ಕಲ್ಲು ಎಸೀತಿದಾರೆ, ಇವರ ಮಕ್ಕಳು ಎಲ್ಲೆಲ್ಲಿದ್ದಾರೆ ನೋಡಿ!
- ತಹ್ರೀಕ್‌-ಇ-ಹುರಿಯತ್‌ ಅಧ್ಯಕ್ಷ ಅಶ್ರಫ್‌ ಸೆಹ್ರಾಯ್‌ ಅವರ ಇಬ್ಬರು ಮಕ್ಕಳಾದ ಖಾಲಿದ್‌ ಮತ್ತು ಅಬೀದ್‌ ಅಹ್ರಫ್‌ ಸೌದಿ ಅರೇಬಿಯಾದಲ್ಲಿ ಉದ್ಯೋಗ ಮಾಡುತ್ತಿದ್ದಾರೆ.
- ಜಮಾತೆ ಇಸ್ಲಾಮಿ ಅಧ್ಯಕ್ಷ ಗುಲಾಂ ಮೊಹಮ್ಮದ ಬಟ್‌ನ ಮಗ ಸೌದಿಯಲ್ಲಿ ಡಾಕ್ಟರ್‌
- ದುಕ್ತಾರನ್‌-ಇ-ಮಿಲ್ಲತ್‌ನ ಸಿಯಾ ಅಂದ್ರಾಬಿಯ ಇಬ್ಬರು ಮಕ್ಕಳು ಮಲೇಶಿಯಾ ಮತ್ತು ಆಸ್ಪ್ರೇಲಿಯಾದಲ್ಲಿ ಓದುತ್ತಿದ್ದಾರೆ
- ಸಯ್ಯದ್‌ ಅಲಿ ಶಾ ಗಿಲಾನಿಯ ಮಗ ನೀಲಂ ಗಿಲಾನಿ ಇತ್ತೀಚೆಗಷ್ಟೇ ಎಂಬಿಬಿಎಸ್‌ ಮುಗಿಸಿದ್ದಾನೆ
- ಹುರಿಯತ್‌ ನಾಯಕ ಮಿರ್ವೈಜ್‌ ಒಮರ್‌ ಫಾರೂಕ್‌ನ ಸೋದರಿ ರಬಿಯಾ ಫಾರೂಕ್‌ ಅಮೆರಿಕದಲ್ಲಿ ಡಾಕ್ಟರ್‌
- ಬಿಲಾಲ್‌ ಲೋನ್‌ನ ಮಗಳು-ಅಳಿಯ ಲಂಡನ್‌ನಲ್ಲಿ ಸೆಟ್ಲ್‌ ಆಗಿದ್ದರೆ, ಇನ್ನೊಬ್ಬ ಮಗಳು ಆಸ್ಪ್ರೇಲಿಯಾದಲ್ಲಿ ಓದುತ್ತಿದ್ದಾಳೆ
- ಮುಸ್ಲಿಂ ಲೀಗ್‌ ನಾಯಕರಾದ ಮೊಹಮ್ಮದ್‌ ಯೂಸುಫ್‌ ಮಿರ್‌ ಮತ್ತು ಫಾರೂಕ್‌ ಗಟ್‌ಪುರಿ ಮಕ್ಕಳು ವೈದ್ಯಕೀಯ ಅಧ್ಯಯನ ಮಾಡುತ್ತಿದ್ದಾರೆ
- ವಹೀದತ್‌-ಇ-ಇಸ್ಲಾಮಿ ನಾಯಕ ನಿಸಾರ್‌ ಹುಸೇನ್‌ ರಾಥೇರ್‌ನ ಮಗಳು ಇರಾನ್‌ನಲ್ಲಿ ಉದ್ಯೋಗ ಮಾಡುತ್ತಾ ಗಂಡನೊಂದಿಗೆ ಸೆಟ್ಲ್‌ ಆಗಿದ್ದಾರೆ