ಮೂರ್ತಿ ಅಳಿಯ ಸೇರಿ ಭಾರತ ಮೂಲದ ಮೂವರಿಗೆ ಬೋರಿಸ್‌ ಸಂಪುಟದಲ್ಲಿ ಸ್ಥಾನ

ಮೂವರಿಗೂ ಪ್ರಮುಖ ಖಾತೆಗಳನ್ನು ನೀಡಿದ ನೂತನ ಪ್ರಧಾನಿ

ಲಂಡನ್‌: ಬ್ರಿಟನ್‌ನ ನೂತನ ಪ್ರಧಾನಿ ಬೋರಿಸ್‌ ಜಾನ್ಸನ್‌ ಸಂಪುಟದಲ್ಲಿ ಅತ್ಯಂತ ಮಹತ್ವದ ಮೂರು ಖಾತೆಗಳು ಭಾರತೀಯ ಮೂಲದ ಸಂಸದರಿಗೆ ದಕ್ಕಿವೆ. ಗೃಹ ಕಾರ್ಯದರ್ಶಿಯಾಗಿ ಪ್ರೀತಿ ಪಟೇಲ್‌, ವಿದೇಶಾಂಗ ವ್ಯವಹಾರಗಳ ಕಾರ್ಯದರ್ಶಿಯಾಗಿ ಅಲೋಕ್‌ ಶರ್ಮಾ ಮತ್ತು ಖಜಾನೆ ಕಾರ್ಯದರ್ಶಿ (ಹಣಕಾಸು ಸಚಿವ)ಯಾಗಿ ರಿಷಿ ಸುನಕ್‌ ನೇಮಕಗೊಂಡಿದ್ದಾರೆ.
ಬ್ರೆಕ್ಸಿಟ್‌ ಬಿರುಗಾಳಿ ನಿಭಾಯಿಸುವಲ್ಲಿ ವಿಫಲಗೊಂಡ ಥೆರೆಸಾ ಮೇ ಅವರು ಅವಧಿ ಪೂರ್ವ ಅಧಿಕಾರ ತ್ಯಜಿಸಿ ನಿರ್ಗಮಿಸಿದ್ದರಿಂದ ತೆರವಾದ ಸ್ಥಾನಕ್ಕೆ ನಡೆದ ಕನ್ಸರ್ವೇಟಿವ್‌ ಪಕ್ಷದ ಆಂತರಿಕ ಚುನಾವಣೆಯಲ್ಲಿ ಬೋರಿಸ್‌ ಜಾನ್ಸನ್‌ ಭರ್ಜರಿ ಗೆಲುವು ಸಾಧಿಸಿ, ಬುಧವಾರ ಪ್ರಧಾನಿಯಾಗಿ ಪದಗ್ರಹಣ ಮಾಡಿದ್ದರು. ಬಳಿಕ ಅವರು ತಮ್ಮ ನಂಬಿಕೆಯ ನಾಯಕರ ತಂಡಕ್ಕೆ ಪ್ರಮುಖ ಖಾತೆಗಳನ್ನು ಹಂಚಿಕೆ ಮಾಡಿದ್ದರು. ಆ ಪೈಕಿ ಮೂವರು ಭಾರತೀಯರಿಗೆ ಪ್ರಮುಖ ಖಾತೆಗಳನ್ನು ನೀಡಲಾಗಿದೆ.
ಬ್ರೆಕ್ಸಿಟ್‌ ಪಕ್ಕಾ: ಐರೋಪ್ಯ ಒಕ್ಕೂಟ ತ್ಯಜಿಸುವ ವಿಷಯದಲ್ಲಿ ಕಳೆದ ಹಲವು ವರ್ಷಗಳಿಂದ ಉಂಟಾಗಿರುವ ಗೊಂದಲ ಬ್ರಿಟನ್‌ ರಾಜಕಾರಣದಲ್ಲಿ ಬಹುದೊಡ್ಡ ತಲ್ಲಣವನ್ನೇ ಸೃಷ್ಟಿಸಿದೆ. ಬ್ರೆಕ್ಸಿಟ್‌ಗೆ ಕನ್ಸರ್ವೇಟಿವ್‌ ಪಾರ್ಟಿ ಒಳಗಡೆಯೇ ವಿರೋಧ ಇದ್ದು, ಇದನ್ನು ನಿಭಾಯಿಸುವುದೇ ಇದುವರೆಗಿನ ನಾಯಕತ್ವಕ್ಕೆ ತಲೆನೋವಾಗಿತ್ತು. ಬ್ರೆಕ್ಸಿಟ್‌ನ ಪ್ರಬಲ ಪ್ರತಿಪಾದಕರಾದ ಬೋರಿಸ್‌, ಇನ್ನು ಮುಂದೆ ಗೊಂದಲಕ್ಕೆ ಆಸ್ಪದವೇ ಇಲ್ಲ ಎಂದು ದೃಢವಾಗಿ ಸಾರಿದ್ದಾರೆ. ಅಕ್ಟೋಬರ್‌ 31ಕ್ಕೆ ಬ್ರೆಕ್ಸಿಟ್‌ ಪಕ್ಕಾ ಎಂದಿದ್ದಾರೆ. ಈ ಬಿಕ್ಕಟ್ಟಿಗೆ ಪೂರಕವಾಗಿಯೇ ಅವರು ತಮ್ಮ ಸಂಪುಟ ಸಹೋದ್ಯೋಗಿಗಳನ್ನು ಆಯ್ಕೆ ಮಾಡಿದ್ದಾರೆ. ಪ್ರೀತಿ ಪಟೇಲ್‌, ಅಲೋಕ್‌ ಶರ್ಮಾ ಮತ್ತು ರಿಷಿ ಸುನಕ್‌ ಬ್ರೆಕ್ಸಿಟ್‌ನ ಪ್ರಬಲ ಪ್ರತಿಪಾದಕರಾಗಿದ್ದು, ಹಿಂದಿನಿಂದಲೂ ಬೋರಿಸ್‌ ಹೋರಾಟಕ್ಕೆ ಸಾಥ್‌ ನೀಡಿದ್ದರು.
ಖುಷ್ವಂತ್‌ ಸಿಂಗ್‌ ಸಂಬಂಧಿ:
ಭಾರತೀಯ ಮೂಲದ ತಾಯಿ ದೀಪ್‌ ಸಿಂಗ್‌ ಮತ್ತು ಇಂಗ್ಲೆಂಡ್‌ ಮೂಲದ ತಂದೆಗೆ ಜನಿಸಿದ ಮರಿನಾ ವೀಲರ್‌ ಅವರನ್ನು ಮದುವೆಯಾಗಿದ್ದ ಬೋರಿಸ್‌ ಜಾನ್ಸನ್‌, ತಾನು ಭಾರತದ ಅಳಿಯ ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದರು. ವೀಲರ್‌ ಅವರು ಖ್ಯಾತ ಬರಹಗಾರ ದಿವಂಗತ ಖುಷ್ವಂತ್‌ ಸಿಂಗ್‌ ಅವರ ಸಂಬಂಧಿ. ದೀಪ್‌ ಸಿಂಗ್‌ ಅವರು ಇಂಗ್ಲೆಂಡ್‌ಗೆ ವಲಸೆ ಹೋಗುವ ಮೊದಲು ಖುಷ್ವಂತ್‌ ಸಿಂಗ್‌ ಅವರ ಕಿರಿಯ ಸೋದರ ದಲ್ಜಿತ್‌ ಸಿಂಗ್‌ ಅವರನ್ನು ಮದುವೆಯಾಗಿದ್ದರು. ವಿಚ್ಛೇದನದ ಬಳಿಕ ಇಂಗ್ಲೆಂಡ್‌ಗೆ ತೆರಳಿ ಅಲ್ಲಿ ಮರು ಮದುವೆಯಾಗಿದ್ದರು. ಆ ದಂಪತಿಯ ಪುತ್ರಿ ವೀಲರ್‌. ಜಾನ್ಸನ್‌-ವೀಲರ್‌ 25 ವರ್ಷಗಳ ದಾಂಪತ್ಯ ಕೂಡ ಕಳೆದ ವರ್ಷ ಮುರಿದು ಬಿದ್ದಿದೆ. ಈ ದಂಪತಿಗೆ ನಾಲ್ವರು ಮಕ್ಕಳು. ವಿಚ್ಛೇದನ ಪಡೆಯುವ ಮುನ್ನ ದಂಪತಿ ಮಕ್ಕಳ ಸಮೇತಕ್ಕೆ ಭಾರತಕ್ಕೆ ಭೇಟಿ ನೀಡಿದ್ದರು.

ರಿಷಿ ಸುನಕ್‌
ಕನ್ಸರ್ವೇಟಿವ್‌ ಪಕ್ಷದ 39 ವರ್ಷದ ಸಂಸದ ರಿಷಿ ಅವರ ಪೂರ್ವಜರ ಮೂಲ ಭಾರತ. ಇನ್ಫೋಸಿಸ್‌ ಸಂಸ್ಥಾಪಕ ನಾರಾಯಣ ಮೂರ್ತಿ ಅವರ ಪುತ್ರಿ ಅಕ್ಷತಾ ಅವರನ್ನು ಮದುವೆಯಾಗಿದ್ದಾರೆ. ಎಂಬಿಎ ಪದವೀದರ. ಹೂಡಿಕೆ ತಜ್ಞ. ಥೆರೆಸಾ ಮೇ ಸಂಪುಟದಲ್ಲೂ ಹಣಕಾಸು ಖಾತೆ ಜವಾಬ್ದಾರಿ ನಿಭಾಯಿಸಿದ್ದರು. 2015ರ ಸಂಸತ್‌ ಚುನಾವಣೆ ಗೆಲ್ಲುವ ಮೊದಲು ಸುನಕ್‌, ಬ್ರಿಟನ್‌ನ ಯಶಸ್ವಿ ಉದ್ಯಮಿಯಾಗಿ ಹೆಸರು ಮಾಡಿದ್ದರು.
ಪ್ರೀತಿ ಪಟೇಲ್‌
ಗುಜರಾತ್‌ ಮೂಲದ ಸುಶೀಲ್‌ ಮತ್ತು ಅಂಜನಾ ಪಟೇಲ್‌ ದಂಪತಿಯ ಪುತ್ರಿ. 47 ವರ್ಷದ ಪ್ರೀತಿ ಪಟೇಲ್‌ ಅರ್ಥಶಾಸ್ತ್ರ ಮತ್ತು ರಾಜ್ಯಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿ ಪಡೆದು, ಕಿರಿಯ ವಯಸ್ಸಿನಲ್ಲಿಯೇ ರಾಜಕೀಯ ಪ್ರವೇಶಿಸಿದರು. ಕ್ಯಾಮರೂನ್‌ ಮತ್ತು ಥೆರೆಸಾ ಮೇ ಸಂಪುಟಗಳಲ್ಲಿಯೂ ಇವರು ಆಯಕಟ್ಟಿನ ಖಾತೆ ನಿರ್ವಹಿಸಿ ಸೈ ಎನಿಸಿಕೊಂಡಿದ್ದರು.
ಅಲೋಕ್‌ ಶರ್ಮಾ
ಉತ್ತರ ಪ್ರದೇಶದ ಆಗ್ರಾದಲ್ಲಿ ಹುಟ್ಟಿ ಬೆಳೆದ ಅಲೋಕ್‌, ಕಿರಿಯ ವಯಸ್ಸಿನಲ್ಲಿಯೇ ಪೋಷಕರ ಜತೆ ಇಂಗ್ಲೆಂಡ್‌ಗೆ ವಲಸೆ ಹೋದವರು. ಬಿಎಸ್ಪಿ ಪದವೀದರ. ಚಾರ್ಟರ್ಡ್‌ ಅಕೌಂಟಂಟ್‌ ಕೂಡ ಆಗಿರುವ 51 ವರ್ಷದ ಅಲೋಕ್‌, 2010ರಲ್ಲಿ ಸಂಸದರಾಗಿ ಆಯ್ಕೆಯಾಗುವ ಮೊದಲು ಕಾರ್ಪೊರೇಟ್‌ ಕಂಪನಿಯೊಂದರಲ್ಲಿ ಉದ್ಯೋಗಿಯಾಗಿದ್ದರು. ಥೆರೆಸಾ ಸಂಪುಟದಲ್ಲಿ ಮೊದಲ ಬಾರಿ ಸಚಿವರಾಗಿ ಸೇವೆ ಸಲ್ಲಿಸಿದರು.