ಭಯೋತ್ಪಾದಕ ಸಂಘಟನೆ ನಂಟು ಶಂಕೆ: 4 ವಿದ್ಯಾರ್ಥಿಗಳ ಬಂಧನ

ಜಲಂಧರ್‌: ಪಾಕಿಸ್ತಾನ ಮೂಲದ ಜೈಷೆ ಮೊಹಮ್ಮದ್‌ ಉಗ್ರ ಸಂಘಟನೆಯೊಂದಿಗೆ ನಂಟು ಹೊಂದಿರುವ ಶಂಕೆಯ ಮೇರೆಗೆ ನಾಲ್ವರು ವಿದ್ಯಾರ್ಥಿಗಳನ್ನು ಬಂಧಿಸಲಾಗಿದೆ.

ಬಂಧಿತರನ್ನು ಝಹೀದ್‌ ಗುಲ್ಜಾರ್‌, ಮೊಹಮ್ಮದ್‌ ಇದ್ರಿಸ್‌ ಶಾ, ನದೀಮ್‌ ಮತ್ತು ಯೂಸುಫ್‌ ರಫೀಕ್‌ ಭಟ್‌ ಎಂದು ಗುರುತಿಸಲಾಗಿದೆ.

ಪಂಜಾಬ್‌ ಮತ್ತು ಜಮ್ಮು-ಕಾಶ್ಮೀರ ಪೊಲೀಸರು ಜಂಟಿಯಾಗಿ ನಡೆಸಿರುವ ಈ ಕಾರ್ಯಾಚರಣೆಯಲ್ಲಿ ಅಪಾರ ಪ್ರಮಾಣದ ಶಸ್ತ್ರಾಸ್ತ್ರ, ಮದ್ದುಗುಂಡು ಮತ್ತು ಸ್ಫೋಟಕಗಳನ್ನು ವಶಪಡಿಕೊಳ್ಳಲಾಗಿದೆ.

ಬುಧವಾರ ನಸುಕಿನ ವೇಳೆ ನಡೆದ ಈ ಕಾರ್ಯಾಚರಣೆಯಲ್ಲಿ ಸುಮಾರು 90 ಪೊಲೀಸರು ಭಾಗಿಯಾಗಿದ್ದರು.

ಬಂಧಿತ ವಿದ್ಯಾರ್ಥಿಗಳಿಗೆ ಜೈಷೆ ಮಾತ್ರವಲ್ಲದೆ, 'ಅನ್ಸಾರ್‌ ಗಝವತ್‌ ಉಲ್‌ ಹಿಂದ್‌' ಸಂಘಟನೆ ಜತೆಗೂ ನಂಟಿರುವುದು ಗೊತ್ತಾಗಿದೆ.

ಈ ಉಗ್ರ ಜಾಲವನ್ನು ನಿರ್ವಹಣೆ ಮಾಡುತ್ತಿದ್ದ ಮುಖ್ಯಸ್ಥನನ್ನು ಕೂಡ ಜಮ್ಮು ಕಾಶ್ಮೀರ ಪೊಲೀಸರು ಬಂಧಿಸಿದ್ದು, ಆತನನ್ನು ವಿಚಾರಣೆಗೆ ಒಳಪಡಿಸಲಾಗುತ್ತಿದೆ.