ಆರು ತಿಂಗಳಲ್ಲಿ 31 ಲಕ್ಷ ಉದ್ಯೋಗ ಸೃಷ್ಟಿ

ಹೊಸದಿಲ್ಲಿ: ಕಳೆದ ಸೆಪ್ಟೆಂಬರ್‌ನಿಂದ ಫೆ. 2018ರವರೆಗೆ 31 ಲಕ್ಷಕ್ಕೂ ಹೆಚ್ಚು ಹೊಸ ಉದ್ಯೋಗ ಸೃಷ್ಟಿಯಾಗಿದೆ ಎಂದು ಸರಕಾರ ಹೇಳಿದೆ. ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ) ಬಿಡುಗಡೆ ಮಾಡಿರುವ ವರದಿಯಲ್ಲಿ ಈ ಅಂಶ ಕಂಡುಬಂದಿದೆ. ಹೊಸದಾಗಿ ಸೇರ್ಪಡೆಯಾಗುವ ಮತ್ತು ಪ್ರಸಕ್ತ ಕಾರ್ಯನಿರ್ವಹಿಸುತ್ತಿರುವ ಉದ್ಯೋಗಿಗಳ ವಿವರವನ್ನು ಪ್ರತಿ ತಿಂಗಳು ಬಿಡುಗಡೆ ಮಾಡುವಂತೆ ಸರಕಾರ ಹೊಸ ವ್ಯವಸ್ಥೆ ಜಾರಿಗೆ ತಂದಿದ್ದು, ಇದರಿಂದ ಉದ್ಯೋಗ ಸೃಷ್ಟಿ ಮತ್ತಿತರ ಕುರಿತಾದ ಗೊಂದಲಗಳಿಗೆ ತೆರೆಬೀಳಲಿದೆ.

ನೀತಿ ಆಯೋಗವು ಬಿಡುಗಡೆ ಮಾಡುವ ಪ್ರತಿ ತಿಂಗಳ ವರದಿಯಿಂದ ಆರ್ಥಿಕತೆ, ಉದ್ಯೋಗ ಸೃಷ್ಟಿ ಮತ್ತು ಪಾಲಿಸಿ ರಚನೆಗೆ ಸಹಕಾರಿಯಾಗಲಿದ್ದು, ದೇಶದಲ್ಲಿನ ವ್ಯವಸ್ಥೆಯ ಬಗ್ಗೆ ಸ್ಪಷ್ಟ ಚಿತ್ರಣ ದೊರೆಯಲಿದೆ. ನೀತಿ ಆಯೋಗ ಇದೇ ಮೊದಲ ಬಾರಿಗೆ ಬಿಡುಗಡೆ ಮಾಡಿದ ವರದಿ ಪ್ರಕಾರ ಕಳೆದ ಆರು ತಿಂಗಳಿನಲ್ಲಿ 31.1 ಲಕ್ಷ ಹೊಸ ಸದಸ್ಯರು ಇಪಿಎಫ್‌ಒಗೆ ಸೇರ್ಪಡೆಯಾಗಿದ್ದು, ನಿಖರ ಸಂಖ್ಯೆ ಇದಕ್ಕೂ ಹೆಚ್ಚಿರಬಹುದು ಎಂದಿದೆ.

ಬಿಡುಗಡೆಯಾದ ವರದಿ ಪ್ರಕಾರ, ಇಪಿಎಫ್‌ಒ, ಉದ್ಯೋಗಿಗಳ ರಾಜ್ಯ ವಿಮಾ ಸಂಸ್ಥೆ (ಇಎಸ್‌ಐಸಿ) ಮತ್ತು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಪಿಎಫ್‌ಆರ್‌ಡಿಎ) ಸಂಸ್ಥೆಗಳು ಸರ್ಕಾರದೊಂದಿಗೆ ಹೊಸ ಸದಸ್ಯರ ವಿವರ ಹಂಚಿಕೊಂಡಿವೆ. ಅದರಂತೆ ನೀತಿ ಆಯೋಗ ವರದಿ ಪ್ರಕಟಿಸಿದ್ದು, ಪ್ರತಿ ತಿಂಗಳೂ ಸೇರ್ಪಡೆಯಾಗುವ ಸದಸ್ಯರ ಸಂಖ್ಯೆ ಗೊತ್ತಾಗಲಿದೆ.

ಪಿಎಫ್‌ಆರ್‌ಡಿಎ ಅಡಿ ನ್ಯೂ ಪೆನ್ಶನ್‌ ಸ್ಕೀಂ ಪ್ರಕಾರ 2017ರ ಸೆಪ್ಟೆಂಬರ್‌ನಿಂದ ಫೆ. 2018ರವರೆಗೆ 4.2 ಲಕ್ಷ ಹೊಸ ಪೇ ರೋಲ್‌ಗಳು ರಚನೆಯಾಗಿವೆ. ಅದು ಕೂಡ ಟೈರ್‌-1 ಖಾತೆಯಡಿ ಬರುವ ಸದಸ್ಯರ ಸಂಖ್ಯೆ ಮಾತ್ರವಾಗಿದೆ. ಎನ್‌ಪಿಎಸ್‌ ಪ್ರಸಕ್ತ 50 ಲಕ್ಷ ರಾಜ್ಯ ಮತ್ತು ಕೇಂದ್ರ ಉದ್ಯೋಗಿಗಳ ಖಾತೆಯನ್ನು ನಿರ್ವಹಿಸುತ್ತಿದೆ. ಇಎಸ್‌ಐಸಿ ನೀಡಿರುವ ದತ್ತಾಂಶ ಪ್ರಕಾರ ಇಪಿಎಫ್‌ಒ ಮತ್ತು ಪಿಎಫ್‌ಆರ್‌ಡಿಎಯ ಖಾತೆದಾರರ ಸಂಖ್ಯೆಯಲ್ಲೂ ಏರಿಕೆಯಾಗಿದೆ ಎಂದಿದೆ.

ಕಳೆದ ಆರು ತಿಂಗಳಿನ ವಿವರ ಗಮನಿಸಿದಾಗ ಪ್ರತಿ ತಿಂಗಳೂ ಉದ್ಯೋಗ ಹೆಚ್ಚಳವಾಗಿರುವುದು ಕಂಡುಬಂದಿದೆ. ಇದು ಪಾಲಿಸಿ ರಚನೆಗೆ ಸಹಕಾರಿಯಾಗಲಿದೆ ಎಂದು ಸ್ಟೇಟ್‌ ಬ್ಯಾಂಕ್ ಆಫ್ ಇಂಡಿಯಾದ ಮುಖ್ಯ ಆರ್ಥಿಕ ತಜ್ಞೆ ಸೌಮ್ಯ ಕಾಂತಿ ಘೋಷ್‌ ತಿಳಿಸಿದ್ದಾರೆ. ವಾರ್ಷಿಕ 1.5 ಕೋಟಿ ಉದ್ಯೋಗಿಗಳು ಹೊಸದಾಗಿ ಸೇರ್ಪಡೆಯಾಗುತ್ತಿರುವುದು ಭಾರತವು ಜಗತ್ತಿನ ವೇಗದ ಆರ್ಥಿಕತೆ ಹೊಂದಿರುವ ರಾಷ್ಟ್ರವಾಗಿ ಬೆಳೆಯುತ್ತಿರುವುದನ್ನು ತೋರಿಸುತ್ತದೆ ಎನ್ನಲಾಗಿದೆ.