ದೇವರು ಕೊಟ್ಟ ವರವೆಂದು ಸ್ವೀಕರಿಸಿ 38 ವರ್ಷಕ್ಕೆ 20 ಮಕ್ಕಳ ಹೆತ್ತ ತಾಯಿ!

ಮುಂಬಯಿ: ದೇಶದಲ್ಲಿ ಜನಸಂಖ್ಯೆ ನಿಯಂತ್ರಣದ ವ್ಯಾಪಕ ಚರ್ಚೆ ನಡೆದಿರುವಾಗಲೇ ಮಹಾರಾಷ್ಟ್ರದ ಅಲೆಮಾರಿ ಸಮುದಾಯದ ಮಹಿಳೆಯೊಬ್ಬರು 20ನೇ ಬಾರಿ ಗರ್ಭ ಧರಿಸಿ ಸುದ್ದಿಯಾಗಿದ್ದಾರೆ! ಬೀಡ್‌ ಜಿಲ್ಲೆಯ 38 ವರ್ಷದ ಲಂಕಾಬಾಯಿ ಖರಾಟ್‌ ಈ ಅಚ್ಚರಿಗೆ ಕಾರಣವಾಗಿರುವ ಮಹಾತಾಯಿ. ಇವರು ಈ ಹಿಂದೆ 19 ಬಾರಿ ಗರ್ಭಿಣಿಯಾಗಿದ್ದು, ಮೂರು ಸಲ ಗರ್ಭಪಾತವಾಗಿದೆ. ಜನಿಸಿದ 16 ಮಕ್ಕಳ ಪೈಕಿ ಐದು ಶಿಶುಗಳು ಹೆರಿಗೆಯಾದ ಕೆಲವೇ ಗಂಟೆಗಳಲ್ಲಿ ಕೊನೆಯುಸಿರೆಳೆದಿವೆ. ಬದುಕುಳಿದಿರುವ 11 ಮಕ್ಕಳು ಆರೋಗ್ಯದಿಂದ ಇದ್ದಾರೆ. ಲಂಕಾಬಾಯಿ ಈಗ ಪುನಃ ಏಳು ತಿಂಗಳ ಗರ್ಭಿಣಿ. ಗರ್ಭಧಾರಣೆ ಲೆಕ್ಕ ಹಾಕಿದರೆ ಇದು ಅವರ 20ನೇ ಮಗು! ಸರಾಸರಿ ವರ್ಷಕ್ಕೊಂದು ಮಗುವನ್ನು ಆಕೆ ಹೆರುತ್ತಿದ್ದಾರೆ.

''ಗರ್ಭದಲ್ಲಿರುವ 20ನೇ ಮಗು ಕೂಡ ಆರೋಗ್ಯವಾಗಿದೆ. ತಾಯಿ ಆರೋಗ್ಯವೂ ಚೆನ್ನಾಗಿದೆ. ಹಿಂದಿನ ಹೆರಿಗೆಗಳ ಪೈಕಿ ಮೊದಲನೆಯದ್ದು ಮಾತ್ರ ಆಸ್ಪತ್ರೆಯಲ್ಲಿ ಆಗಿದೆ. ಉಳಿದ ಎಲ್ಲವೂ ಮನೆಯಲ್ಲಿ ಸಹಜ ಹೆರಿಗೆ. ನಿರಂತರ ಹೆರಿಗೆಯಿಂದ ಅವರ ಗರ್ಭಕೋಶ ಈಗ ತುಂಬ ಹಿಗ್ಗಿದ್ದು ಮುಂದಿನ ಹೆರಿಗೆ ಕಷ್ಟವಾಗಬಹುದು. ಆದ್ದರಿಂದ ಮನೆಯಲ್ಲಿದ್ದು ಸಹಜ ಹೆರಿಗೆ ಮಾಡಿಸಿಕೊಳ್ಳುವ ಬದಲು ಆಸ್ಪತ್ರೆಗೆ ದಾಖಲಾಗಬೇಕು,'' ಎಂದು ವೈದ್ಯರು ಲಂಕಾಬಾಯಿಗೆ ಸಲಹೆ ಮಾಡಿದ್ದಾರೆ.

ಬೀಡ್‌ ಜಿಲ್ಲೆಯ ಮಜಲ್ಗಾಂವ್‌ ತಹಶೀಲ್‌ನ ಕೇಶಾಪುರಿ ಪ್ರದೇಶದ ಹಾಡಿಯೊಂದರ ನಿವಾಸಿಯಾದ ಲಂಕಾಬಾಯಿ, ಹೊಟ್ಟೆ ಬಟ್ಟೆಗೆ ನೆಚ್ಚಿದ್ದು ದಿನಗೂಲಿಯನ್ನು. ಇವರದ್ದು 'ಗೋಪಾಲ್‌' ಹೆಸರಿನ ಅಲೆಮಾರಿ ಸಮುದಾಯ. ಸಾಮಾನ್ಯವಾಗಿ ಭಿಕ್ಷೆ ಈ ಸಮುದಾಯದ ಕುಲಕಸುಬು. ಇತ್ತೀಚೆಗೆ ಕೆಲವರು ದಿನಗೂಲಿ ಮಾಡಿಕೊಂಡು ಬದುಕು ಸಾಗಿಸುತ್ತಿದ್ದಾರೆ. ಇಂತಹ ಕಡು ಬಡತನದಲ್ಲೂ ಕೌಟುಂಬ ಕಲ್ಯಾಣದ ಬಗ್ಗೆ ಆಸಕ್ತಿ ತೋರದ ಲಂಕಾಬಾಯಿ, 'ಮಕ್ಕಳು ದೇವರು ಕೊಟ್ಟ ವರ' ಎಂದು ಭಾವಿಸಿದ್ದಾರೆ.