214 ಕೇಜಿ ತೂಕ ಇಳಿಸಿಕೊಂಡ 42ರ ಬೆಡಗಿ!

ಮುಂಬಯಿ: ನಾಲ್ಕು ವರ್ಷ, ಎರಡು ದೊಡ್ಡ ಶಸ್ತ್ರ ಚಿಕಿತ್ಸೆಗಳು, 214 ಕೇಜಿ ದೇಹ ತೂಕ ಮಂಗಮಾಯ! ಇದು ಮುಂಬಯಿನ ವಸಾಯಿ ನಿವಾಸಿ 42 ವರ್ಷದ ಅಮಿತಾ ರಜನಿ ಅವರು ಸಾಧಿಸಿರುವ ಫಿಟ್‌ನೆಸ್‌ ಗುಟ್ಟು.
ಜೀವನ ಶೈಲಿ, ಆಹಾರ ಪದ್ಧತಿ, ಅನುವಂಶಿಕತೆ... ಏನಕೇನ ಕಾರಣಗಳು ಸೇರಿ 300 ಕೇಜಿ ದೇಹ ತೂಕ ಹೊಂದಿ ಹಾಸಿಗೆ ಹಿಡಿದಿದ್ದ ರಜನಿ, ಇತ್ತೀಚೆಗೆ ಬ್ಯಾರಿಯಾಟ್ರಿಕ್‌ ಅಥವಾ ತೂಕ ಇಳಿಕೆ ಶಸ್ತ್ರ ಚಿಕಿತ್ಸೆ ಮಾಡಿಸಿಕೊಂಡು 86 ಕೇಜಿಗೆ ಇಳಿದು ಫಿಟ್‌ನೆಸ್‌ ಸಾಧಿಸಿದ್ದಾರೆ. ಈಗ ಯಾರ ಹಂಗೂ ಇಲ್ಲದೇ ನಡೆದಾಡುವ ಖುಷಿ ಅನುಭವಿಸುತ್ತಿದ್ದಾರೆ.
ಸರ್ಜರಿಗೆ ಮೊದಲು ಅವರು ಏಷ್ಯಾದ ಅತಿತೂಕದ ದಢೂತಿ ಮಹಿಳೆ ಎನ್ನುವ ಹೆಸರು ಪಡೆದಿದ್ದರು. ಈಗ ಅವರ ತೂಕ ಇಳಿದಿದೆ. ಆರೋಗ್ಯವೂ ಸುಧಾರಿಸಿದೆ ಎನ್ನುತ್ತಾರೆ ಶಸ್ತ್ರ ಚಿಕಿತ್ಸೆ ನೆರವೇರಿಸಿದ ವೈದ್ಯ ಶಶಾಂಕ್‌ ಶಾ.

ಘನ ಘೋರ: 300 ಕೆ.ಜಿ ದೇಹ ತೂಕ ಬೆಳೆದು ಹಾಸಿಗೆ ಹಿಡಿದಿದ್ದಾಗ ಅನುಭವಿಸಿದ ಯಾತನೆಯನ್ನು ರಜನಿ ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ. ''ಜೀವನ ಗೊಂದಲದ ಗೂಡಾಗಿತ್ತು. ನಡೆದಾಡಲು, ಬಟ್ಟೆ ಬದಲಿಸಲು, ಅಷ್ಟೆ ಯಾಕೆ ಹಾಸಿಗೆಯಿಂದ ಮೇಲೇಳಲು ಅನ್ಯರ ನೆರವು ಬೇಕಾಗಿತ್ತು. ಎಂಟು ವರ್ಷ ಹಾಸಿಗೆ ಹಿಡಿದು ನರಳಿದೆ. ಈ ಅವಧಿಯಲ್ಲಿ ಒಂದು ಬಾರಿಯೂ ಮನೆಯಿಂದ ಹೊರ ಹೋಗಲಿಲ್ಲ. ಸೂರ್ಯನನ್ನು ಕಂಡಿರಲಿಲ್ಲ. ಎಳೆಯ ಕಂದಮ್ಮಗಳು ನನ್ನ ದಡೂತಿ ಗಾತ್ರ ಕಂಡು ಕಿರುಚಿಕೊಳ್ಳುತ್ತಿದ್ದವು. ಇದರಿಂದ ಖಿನ್ನತೆಗೆ ಒಳಗಾಗಿದ್ದೆ,'' ಎಂದರು.

ಕಾಯಿಲೆಗಳ ಗೂಡು: ದಢೂತಿತನದ ಬಾಧೆ ಒಂದೆಡೆಯಾದರೆ, ಅದರೊಂದಿಗೆ ಬಂದ ಕಿಡ್ನಿ ಸಮಸ್ಯೆ, ಟೈಪ್‌-2 ಮಧುಮೇಹ ಮತ್ತು ಉಸಿರಾಟ ಸಮಸ್ಯೆಗಳು ಬದುಕನ್ನು ಇನ್ನಷ್ಟು ನರಕ ಮಾಡಿದ್ದವು ಎಂದು ಹೇಳಿಕೊಂಡಿದ್ದಾರೆ.

ಡಾ.ಶಾ ಭೇಟಿ ಬಳಿಕ ತಮ್ಮ ಬದುಕಿಗೆ ಹೊಸ ಭರವಸೆ ದಕ್ಕಿತು. ಹೊಟ್ಟೆಯಲ್ಲಿ ಜಮೆಯಾಗಿದ್ದ ಬೊಜ್ಜು ತೆಗೆದು, ಜಠರ ಕುಗ್ಗಿಸಿದ ಬಳಿಕ ತೂಕ ಇಳಿಯಿತು. 30 ದಿನಗಳ ಆಸ್ಪತ್ರೆಯ ನಿಗಾ ಮುಗಿದ ಬಳಿಕ ಮನೆಗೆ ಮರಳಿದೆ. ಸ್ವತಂತ್ರವಾಗಿ ನಡೆದಾಡತೊಡಗಿದೆ. ಇಡೀ ದೇಶ ಸುತ್ತಾಡಿದೆ ಎಂದು ಖುಷಿ ಹಂಚಿಕೊಂಡಿದ್ದಾರೆ ರಜನಿ.