ಈಗಲೂ ಶೇ.45ರಷ್ಟು ಭಾರತೀಯರು ಲಂಚ ನೀಡುತ್ತಿದ್ದಾರಂತೆ!

ಹೊಸದಿಲ್ಲಿ: ತಮ್ಮ ಕೆಲಸ ಮಾಡಿಕೊಳ್ಳಲು ಶೇ.45 ರಷ್ಟು ಭಾರತೀಯರು ಸರಕಾರಿ ಅಧಿಕಾರಿಗಳಿಗೆ ಲಂಚ ನೀಡಿರುವ ಆಘಾತಕಾರಿ ವಿಷಯವನ್ನು ಟ್ರಾನ್ಸ್‌ಪರೆನ್ಸಿ ಇಂಟರ್‌ನ್ಯಾಷನಲ್ ಸಮೀಕ್ಷೆಯಿಂದ ಬಹಿರಂಗಗೊಂಡಿದೆ.

ಈ ಕುರಿತು 11 ರಾಜ್ಯಗಳಲ್ಲಿ ಸಮೀಕ್ಷೆ ನಡೆಸಲಾಗಿದೆ. ಕಳೆದ ವರ್ಷ ಶೇ.43 ರಷ್ಟು ಭಾರತೀಯರು ಲಂಚ ನೀಡಿರುವುದಾಗಿ ತಿಳಿದುಬಂದಿತ್ತು.

ಸಮ್ಮೀಕ್ಷೆಗೊಳಪಡಿಸಿದ ಸುಮಾರು 34,696 ಜನರ ಪೈಕಿ ಶೇ.37 ರಷ್ಟು ಜನ ಲಂಚಾವತಾರ ಹೆಚ್ಚಿದೆ ಎಂದು ಅಭಿಪ್ರಾಯ ಪಟ್ಟಿದ್ದರೆ, ಶೇ.14 ರಷ್ಟು ಜನ ಲಂಚದ ಹಾವಳಿ ಕಡಿಮೆಯಾಗಿದೆ ಎಂದು ಅಭಿಪ್ರಾಯ ವ್ತಕ್ತಪಡಿಸಿದ್ದಾರೆ.

ಹಿಂದೆ ಇದ್ದ ಸ್ಥಿತಿಯೇ ಈಗಲೂ ಇದೇ ಎಂದು ಶೇ.45 ರಷ್ಟು ಜನ ಅಭಿಪ್ರಾಯಪಟ್ಟಿದ್ದಾರೆ. ಮಧ್ಯಪ್ರದೇಶ ಹಾಗೂ ಪಶ್ಚಿಮ ಬಂಗಾಳದ ಪರಿಸ್ಥಿತಿ ತೀರ ಹದಗೆಟಿದ್ದು, ಈ ರಾಜ್ಯಗಳ ಶೇ.71 ರಷ್ಟು ಜನ ಲಂಚದ ಪಿಡುಗು ಅಧಿಕವಾಗಿದೆ ಎಂದಿದ್ದಾರೆ.

ಮಹಾರಾಷ್ಟ್ರದ ಶೇ.18 ರಷ್ಟು ಜನ ಲಂಚದ ಕಾಟ ಹೆಚ್ಚಿದೆ ಎಂದು ಹೇಳಿದ್ದರೆ, ಶೇ. 64 ರಷ್ಟು ಜನ ಲಂಚಗುಳಿತನ ಕಡಿಮೆಯಾಗಿದೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

ರಾಷ್ಟ್ರ ರಾಜಧಾನಿ ದಿಲ್ಲಿಯ ಶೇ. 33 ರಷ್ಟು ಜನ ಲಂಚ ಪ್ರಕರಣಗಳು ಹೆಚ್ಚುತ್ತಿವೆ ಎಂದಿದ್ದು, ಶೇ. 38 ರಷ್ಟು ಜನ ಲಂಚ ಪ್ರಕರಣಗಳು ಯಥಾಸ್ಥಿತಿಯಲ್ಲಿವೇ ಎಂದಿದ್ದಾರೆ. ಶೇ. 28 ರಷ್ಟು ಜನ ಲಂಚ ಪ್ರಕರಣಗಳ ಸಂಖ್ಯೆ ಗಣನೀಯವಾಗಿ ಕಡಿಮೆಯಾಗಿವೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

'ಸ್ಥಳೀಯ ಮಟ್ಟದಲ್ಲೇ ಹೆಚ್ಚಿನ ಭ್ರಷ್ಟಾಚಾರ ನಡೆಯುತ್ತಿದೆ' ಎಂದು ಟ್ರಾನ್ಸ್‌ಪರೆನ್ಸಿ ಇಂಟರ್‌ನ್ಯಾಷನಲ್ ಇಂಡಿಯಾದ ಪಂಕಜ್ ಕುಮಾರ್ ಅಭಿಪ್ರಾಯ ಪಟ್ಟಿದ್ದಾರೆ.