48 ಸಂಸದರು, ಶಾಸಕರು ಮಹಿಳಾ ಶೋಷಕರು!

ಬಿಜೆಪಿ ನಾಯಕರ ಮೇಲೆ ಗರಿಷ್ಠ ಕೇಸ್‌, ಶಿವಸೇನೆ ದ್ವಿತೀಯ!

ಹೊಸದಿಲ್ಲಿ: ಹೆಚ್ಚುತ್ತಿರುವ ಅತ್ಯಾಚಾರ ಪ್ರಕರಣಗಳ ಬಗ್ಗೆ ದೇಶಾದ್ಯಂತ ಆಕ್ರೋಶ ಹೆಚ್ಚುತ್ತಿರುವ ನಡುವೆಯೇ ರಾಜಕಾರಣಿಗಳ ಮಹಿಳಾ ದೌರ್ಜನ್ಯಕ್ಕೆ ಸಂಬಂಧಿಸಿದ ವರದಿಯೊಂದು ಬಿಡುಗಡೆಯಾಗಿ ಬೆಚ್ಚಿ ಬೀಳಿಸಿದೆ.

ಪ್ರಜಾಸತ್ತಾತ್ಮಕ ಸುಧಾರಣೆಗಳಿಗಾಗಿ ಸಂಘಟನೆ (ಎಡಿಆರ್‌) ಪ್ರಕಟಿಸಿದ ವರದಿಯಲ್ಲಿ ದೇಶದ ಸುಮಾರು 48 ಸಂಸದರು ಮತ್ತು ಶಾಸಕರ ಮೇಲೆ ಮಹಿಳಾ ದೌರ್ಜನ್ಯ ಪ್ರಕರಣಗಳು ದಾಖಲಾಗಿರುವುದು ಬೆಳಕಿಗೆ ಬಂದಿದೆ. ಇವೆಲ್ಲವೂ ಅವರೇ ತಮ್ಮ ನಾಮಪತ್ರ ಸಲ್ಲಿಕೆ ವೇಳೆ ನೀಡಿದ ಅಧಿಕೃತ ದಾಖಲೆಯಲ್ಲಿ ಘೋಷಿಸಿಕೊಂಡವು.

ದೌರ್ಜನ್ಯ ಪ್ರಕರಣ ದಾಖಲಾಗಿರುವ ರಾಜಕಾರಣಿಗಳಲ್ಲಿ ಬಿಜೆಪಿಯವರು (12) ಹೆಚ್ಚಿದ್ದು, ಶಿವಸೇನೆ (7) ಎರಡನೇ ಸ್ಥಾನದಲ್ಲಿದೆ.


ಒಟ್ಟು ಸಂಸದರು ಮತ್ತು ಶಾಸಕರ ಪೈಕಿ 1530 ಮಂದಿ (33%) ವಿರುದ್ಧ ಕ್ರಿಮಿನಲ್‌ ಪ್ರಕರಣಗಳಿವೆ. ಅವರ ಪೈಕಿ 48 ಮಂದಿಯ ಮೇಲೆ ಮಹಿಳಾ ದೌರ್ಜನ್ಯ ಪ್ರಕರಣಗಳಿವೆ. 48 ಮಂದಿಯಲ್ಲಿ 45 ಮಂದಿ ಶಾಸಕರು, ಮೂವರು ಸಂಸದರು.

ಮಹಿಳಾ ದೌರ್ಜನ್ಯದ ಬಗ್ಗೆ ದೊಡ್ಡ ದೊಡ್ಡ ಮಾತನಾಡುವ ರಾಜಕೀಯ ಪಕ್ಷಗಳೇ ದೌರ್ಜನ್ಯ ಪ್ರಕರಣಗಳಲ್ಲಿ ಭಾಗಿಯಾಗಿದ್ದೇವೆ ಎಂದು ಘೋಷಿಸಿಕೊಂಡ ನಾಯಕರಿಗೇ ಟಿಕೆಟ್‌ ನೀಡಿವೆ ಎನ್ನುವುದನ್ನು ವರದಿ ಉಲ್ಲೇಖಿಸಿದೆ.

ಪ್ರಕರಣಗಳು ಏನೇನು?

ಅತ್ಯಾಚಾರ, ಮಾನಭಂಗ ಯತ್ನ, ಮನೆಯಲ್ಲಿ ಕಿರುಕುಳ, ಅಪಹರಣ, ಮದುವೆಯಾಗುವ ಉದ್ದೇಶದಿಂದ ಅಪಹರಣ, ಮಾರಾಟ ಯತ್ನ.

ಪಕ್ಷವಾರು ಲೆಕ್ಕ

ಬಿಜೆಪಿ 12

ಶಿವಸೇನೆ 07

ತೃಣಮೂಲ 06

ಟಿಡಿಪಿ 05

ಕಾಂಗ್ರೆಸ್‌, ಬಿಜೆಡಿ 04

ಜೆಎಂಎಂ, ಆರ್‌ಜೆಡಿ 04

ಡಿಎಂಕೆ 02

ಸಿಪಿಎಂ 01

ರಾಜ್ಯವಾರು ಲೆಕ್ಕ

ಮಹಾರಾಷ್ಟ್ರ 12

ಪಶ್ಚಿಮ ಬಂಗಾಳ 11

ಒಡಿಶಾ, ಆಂಧ್ರ 05

ಕಾಶ್ಮೀರ, ಜಾರ್ಖಂಡ್‌. ಉತ್ತರಾಖಂಡ 03

ಬಿಹಾರ, ತ.ನಾ. 02

ಗುಜರಾತ್‌, ಕರ್ನಾಟಕ, ಮ.ಪ್ರದೇಶ, ಉ.ಪ್ರದೇಶ, ಕೇರಳ 01

ಪಕ್ಷೇತರರೂ ಅಧಿಕ

ಕಳೆದ ಐದು ವರ್ಷಗಳ ಅವಧಿಯಲ್ಲಿ ಮಾನ್ಯತೆ ಪಡೆದ ರಾಜಕೀಯ ಪಕ್ಷಗಳು 327 ಸ್ತ್ರೀಪೀಡಕ ನಾಯಕರಿಗೆ ಟಿಕೆಟ್‌ ನೀಡಿವೆ. 118 ಮಂದಿ ಪಕ್ಷೇತರರು ಲೋಕಸಭೆ, ರಾಜ್ಯಸಭೆ, ಅಸೆಂಬ್ಲಿ ಚುನಾವಣೆಯ ಘೋಷಣೆಯಲ್ಲಿ ತಾವು ಎದುರಿಸುತ್ತಿರುವ ಮಹಿಳಾ ದೌರ್ಜನ್ಯ ಪ್ರಕರಣದ ವಿವರ ನೀಡಿದ್ದಾರೆ.