ಟ್ರಾಫಿಕ್ ದಂಡ ತಪ್ಪಿಸಿಕೊಳ್ಳಬೇಕೇ? ಸರಳವಾದ 'ಪಂಚ ಸೂತ್ರ' ಪಾಲನೆ ಮಾಡಿ.. ಅಷ್ಟೇ ಸಾಕು!

ಹೊಸ ದಿಲ್ಲಿ: ಮೋಟಾರು ವಾಹನ ಕಾಯಿದೆಗೆ ತಿದ್ದುಪಡಿ ಬಳಿಕ ಜಾರಿಯಾಗಿರುವ ಭಾರಿ ದಂಡ ನೀತಿಯು ವಾಹನ ಸವಾರರನ್ನು ಬೆಸ್ತು ಬೀಳಿಸಿದೆ. ಕೆಲವೆಡೆ ವಾಹನದ ಮೌಲ್ಯಕ್ಕಿಂತಲೂ ದಂಡವೇ ಅಧಿಕವಾದ ಪ್ರಕರಣಗಳೂ ವರದಿಯಾಗಿವೆ. ಈ ಹಿನ್ನೆಲೆಯಲ್ಲಿವಾಹನ ಸವಾರರು ದಂಡ ತಪ್ಪಿಸಿಕೊಳ್ಳಲು ಅನುಸರಿಸಬೇಕಾದ ಪಂಚ ಸೂತ್ರಗಳು ಇಲ್ಲಿವೆ:

1. ಸುರಕ್ಷತೆ: ಹೆಲ್ಮೆಟ್‌ ಮತ್ತು ಸೀಟ್‌ ಬೆಲ್ಟ್‌ ಧರಿಸುವುದರಿಂದ ಪ್ರಾಣದ ಜತೆಗೆ ಹಣವನ್ನೂ ಉಳಿಸಿಕೊಳ್ಳಬಹುದು. ಮೊದಲು ಹೆಲ್ಮೆಟ್‌ ಹಾಕದಿದ್ದರೆ ಕೇವಲ 100 ರೂ. ದಂಡವಿತ್ತು. ಆದರೆ ಈಗ ದಂಡದ ಮೊತ್ತ 1,000 ರೂ. ಹೆಲ್ಮೆಟ್‌/ಸೀಟ್‌ಬೆಲ್ಟ್‌ ಇಲ್ಲದೆ ವಾಹನ ಚಾಲನೆಗೆ 3 ತಿಂಗಳು ಲೈಸೆನ್ಸ್‌ ರದ್ದು ಸಹ ಮಾಡಬಹುದು. ಹೀಗಾಗಿ ನಿಮ್ಮ ಮತ್ತು ನಿಮ್ಮ ಹಣದ ಸುರಕ್ಷತೆಯತ್ತ ಗಮನ ಹರಿಸಿ.

2. ಚಾಲನಾ ಪರವಾನಗಿ: ವಾಹನ ತಡೆದ ಬಳಿಕ ಟ್ರಾಫಿಕ್‌ ಪೊಲೀಸರು ಚಾಲಕರನ್ನು ಮೊದಲು ಕೇಳುವುದೇ ಡಿ.ಎಲ್‌. ಚಾಲಕನಾದವನು ಡಿಎಲ್‌ ಮೂಲಪ್ರತಿ ಅಥವಾ ಡಿಜಿಟಲ್‌ ಪ್ರತಿಯನ್ನು ಹೊಂದಿರುವುದು ಕಡ್ಡಾಯ. ಇಲ್ಲವಾದರೆ, 5,000 ರೂ.ವರೆಗೂ ಭಾರಿ ದಂಡ ಬೀಳಲಿದೆ. ಮೊದಲು ಈ ದಂಡ ಕೇವಲ 500 ರೂ. ಇತ್ತು. ಲೈಸೆನ್ಸ್‌ ಅನರ್ಹತೆ ಬಳಿಕವೂ ವಾಹನ ಚಾಲನೆ ಮಾಡಿ ಸಿಕ್ಕಿಬಿದ್ದರೆ ದಂಡ 10,000 ರೂ.!

3. ಇನ್ಶೂರೆನ್ಸ್‌: ಯಾವುದೇ ವಾಹನಕ್ಕೆ ಥರ್ಡ್‌ ಪಾರ್ಟಿ ವಿಮೆ ಕಡ್ಡಾಯ. ಸ್ವಂತ ಹಾನಿ ವಿರುದ್ಧದ ವಿಮೆಯು ಮಾಲೀಕರ ಆಯ್ಕೆಗೆ ಬಿಟ್ಟಿದ್ದು. ಇನ್ಶೂರೆನ್ಸ್‌ ಇಲ್ಲದೆ ವಾಹನ ಚಾಲನೆಗೆ ಮೊದಲ ಬಾರಿಗೆ 2,000 ರೂ. ಪುನರಾವರ್ತಿತ ಅಪರಾಧಕ್ಕೆ 4,000 ರೂ. ದಂಡ ವಿಧಿಸಲಾಗುವುದು. ಮೂರು ತಿಂಗಳ ಜೈಲು ಶಿಕ್ಷೆಗೂ ಅವಕಾಶವಿದೆ. ದಂಡ ತೆರುವ ಮೊತ್ತಕ್ಕೆ ವಿಮೆಯನ್ನೇ ಮಾಡಿಸಬಹುದು!

4. ಅಜಾಗರೂಕ ಚಾಲನೆ: ಇತ್ತೀಚೆಗೆ ಯುವಕರು ವ್ಹೀಲಿಂಗ್‌, ರೇಸಿಂಗ್‌ನಂತಹ ಹುಚ್ಚಾಟದಲ್ಲಿ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಇಂತಹ ಅಪಾಯಕಾರಿ ಚಾಲನೆ ಮೂಲಕ ಪಾದಾಚಾರಿಗಳು ಮತ್ತು ಇತರೆ ಪ್ರಯಾಣಿಕರ ಜೀವಕ್ಕೂ ಕುತ್ತು ತರುತ್ತಿದ್ದಾರೆ. ಇದಕ್ಕೆ ಕಡಿವಾಣ ಹಾಕಲು ಅಪಾಯಕಾರಿ ಚಾಲನೆಗೆ ದಂಡದ ಪ್ರಮಾಣವನ್ನು 1,000 ರೂ.ನಿಂದ 5,000 ರೂ.ಗೆ ಏರಿಸಲಾಗಿದೆ. ಅದೇ ರೀತಿ ಕುಡಿದು ಚಾಲನೆ ಮಾಡಿದವರ ವಿರುದ್ಧದ ದಂಡ ಪ್ರಮಾಣವನ್ನು 10,000 ರೂ.ಗೆ ಏರಿಸಲಾಗಿದೆ.

5. ಅಪ್ರಾಪ್ತರಿಂದ ಚಾಲನೆ: ಅಪ್ರಾಪ್ತರು ವಾಹನ ಚಾಲನೆ ಮಾಡಿ ಸಿಕ್ಕಿಬಿದ್ದರೆ, ಅವರ ಪಾಲಕರು ಅಥವಾ ವಾಹನ ಮಾಲೀಕರು 25,000 ದಂಡ ಅಥವಾ ಜೈಲು ಶಿಕ್ಷೆಗೆ ಗುರಿಯಾಗುವ ಅಪಾಯವಿದೆ. ವಾಹನದ ನೋಂದಣಿಯನ್ನೂ ಒಂದು ವರ್ಷ ರದ್ದು ಮಾಡಬಹುದು. ಅಪ್ರಾಪ್ತರಿಗೂ ಸೂಕ್ತ ಕಾನೂನಿನ್ವಯ ಶಿಕ್ಷೆ ವಿಧಿಸಲಾಗುವುದು. ಹೀಗಾಗಿ ಪೋಷಕರು ಅಪ್ರಾಪ್ತರಿಗೆ ವಾಹನ ಕೊಡುವ ಸಾಹಸಕ್ಕೆ ಕೈ ಹಾಕಬಾರದು.

ಇಷ್ಟು ದಾಖಲೆಗಳಿದ್ದರೆ ನೀವು ಸೇಫ್‌ -

1- ಚಾಲನಾ ಪರವಾನಗಿ
2 - ನೋಂದಣಿ ಪ್ರಮಾಣ ಪತ್ರ
3 - ಮಾಲಿನ್ಯ ತಪಾಸಣಾ ಪ್ರಮಾಣಪತ್ರ
4 - ಚಾಲ್ತಿಯಲ್ಲಿರುವ ವಾಹನ ವಿಮಾ ಪಾಲಿಸಿ
5 - ಡಿಜಿ ಲಾಕರ್‌ ಮೂಲಕವೂ ತೋರಿಸುವ ದಾಖಲೆಗಳೂ ಅಧಿಕೃತ

‘ಟ್ರಾಫಿಕ್ ಸಿಂಗಂ’ ಭಯಕ್ಕೆ ನಿದ್ರೆಯಲ್ಲೂ ಹೆಲ್ಮೆಟ್ ಧರಿಸಿದ ಸವಾರರು!