ವಿಷಮಿಶ್ರಿತ ಆಹಾರ ನೀಡಿ 50 ಬೀದಿ ನಾಯಿಗಳ ಹತ್ಯೆ

ಚೆನ್ನೈ: ತಮಿಳುನಾಡಿನ ಕಿಜಮುರ್‌ ಗ್ರಾಮದಲ್ಲಿ ವಿಷಮಿಶ್ರಿತ ಆಹಾರ ನೀಡಿ 50 ಬೀದಿ ನಾಯಿಗಳನ್ನು ಸಾಯಿಸಲಾಗಿದೆ.

ಸಾಕಿರುವ ಕುರಿ ಮತ್ತು ಆಡುಗಳ ಮೇಲೆ ದಾಳಿ ನಡೆಸುತ್ತಿರುವುದಕ್ಕಾಗಿ ಗ್ರಾಮಸ್ಥರು ನಾಯಿಗಳಿಗೆ ವಿಷಮಿಶ್ರಿತ ಆಹಾರ ನೀಡಿದ್ದರು. ಮೃತಪಟ್ಟ ನಾಯಿಗಳಿಗೆ ಸೀಮೆ ಎಣ್ಣೆ ಸುರಿದು ಸುಡಲಾಗಿದೆ.

ಗ್ರಾಮಸ್ಥರು ಪ್ರಾಣಿ ರಕ್ಷಣೆ ಕಾರ್ಯಕರ್ತ ಪಿ. ಅಶ್ವತ್ಥ್‌ ಅವರಿಗೆ ಮಾಹಿತಿ ನೀಡಿದ್ದರಿಂದ ನಾಲ್ಕು ದಿನಗಳ ಬಳಿಕ ಪ್ರಕರಣ ಬಯಲಾಗಿದೆ.

ಗ್ರಾಮದಲ್ಲಿ ಬೀದಿ ನಾಯಿಗಳ ಹಾವಳಿ ಹೆಚ್ಚಿದ್ದು, ಅವುಗಳ ದಾಳಿಯಿಂದ ಗಾಯಗೊಂಡ ಜಾನುವಾರುಗಳು ಮೃತಪಟ್ಟಿವೆ ಎಂದು ಗ್ರಾಮಸ್ಥರು ದೂರಿದ್ದಾರೆ. ಗ್ರಾಮ ಪಂಚಾಯತ್ ಅಧ್ಯಕ್ಷರು ಮತ್ತು ಉಪಾಧ್ಯಕ್ಷರು ನಾಯಿಗಳ ಹತ್ಯೆ ನಡೆದಿರುವುದನ್ನು ನಿರಾಕರಿಸಿದ್ದಾರೆ. ಆದರೆ 50 ಕ್ಕೂ ಹೆಚ್ಚು ನಾಯಿಗಳನ್ನು ಹತ್ಯೆ ಮಾಡಿರುವುದಕ್ಕೆ ಸಾಕ್ಷ್ಯ ಲಭಿಸಿದೆ ಎಂದು ಅಶ್ವತ್ಥ್ ಹೇಳಿದ್ದಾರೆ.

ಪೊಲೀಸರು ಆರಂಭದಲ್ಲಿ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿಲ್ಲ. ಗ್ರಾಮಸ್ಥರನ್ನೇ ಬೆಂಬಲಿಸಿದ್ದರು. ಆದರೆ ಅರ್ಧ ಸುಟ್ಟು ಅಳಿದುಳಿದ ನಾಯಿಗಳ ಅವಶೇಷಗಳನ್ನು ಸೇರಿಸಿ ತಾನು ಸುಟ್ಟು ಹಾಕಿದೆ ಎಂದು ಅವರು ಹೇಳಿದ್ದಾರೆ.