ಶೇ.7.5ರಷ್ಟು ಭಾರತೀಯರು ಮನೋರೋಗಿಗಳು: WHO ವರದಿ

ಮುಂಬಯಿ: ದೇಶದಲ್ಲಿ ಸುಮಾರು ಶೇ.7.5ರಷ್ಟು ಮಂದಿ ಖಿನ್ನತೆಯಿಂದ ಬಳಲುತ್ತಿದ್ದಾರೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ವರದಿ ಮಾಡಿದೆ.

ಖಿನ್ನತೆ ರೋಗಿಗಳಿಗೆ ಸಂಬಂಧಿಸಿದಂತೆ ಗುರುವಾರದಂದು ವಿಶ್ವ ಆರೋಗ್ಯ ಸಂಸ್ಥೆ ತನ್ನ ವರದಿ ಬಿಡುಗಡೆ ಮಾಡಿದ್ದು, ಇದರಲ್ಲಿ ದೇಶದಲ್ಲಿ ಶೇ.7.5ರಷ್ಟು ಮಂದಿ ಆತಂಕ, ಖಿನ್ನತೆಯಂತಹ ಖಾಯಿಲೆಯಿಂದ ಬಳಲುತ್ತಿದ್ದಾರೆ ಎಂದು ವರದಿ ಮಾಡಿದೆ.

ಖಿನ್ನತೆಯ ಹಲವು ಭಾಗಗಳಾದ, ದುಃಖ, ಸಂತೋಷ, ನಷ್ಟ, ಹಸಿವು, ಸುಸ್ತು ಭಾವನೆ, ಆತಂಕ, ಸಾಮಾನ್ಯ ಆತಂಕ, ಅಸ್ವಸ್ಥತೆ, ಭಯ ಇನ್ನೂ ಹಲವಾರು ಮನೋರೋಗ ಲಕ್ಷಣಗಳಿಗೆ ಸರ್ವೇ ಮಾಡಿ ವರದಿ ರಚಿಸಲಾಗಿದೆ.

ಅಕ್ಟೋಬರ್‌ನಲ್ಲಿ ನಿಮ್ಹಾನ್ಸ್‌ ಕೂಡಾ ನೀಡಿದ್ದ ವರದಿಯಲ್ಲಿ ಭಾರತದಲ್ಲಿ 20 ಮಂದಿಯಲ್ಲಿ ಒಬ್ಬ ಖಿನ್ನತೆ ಹಾಗೂ ಮಾನಸಿಕ ರೋಗಗಳಿಂದ ಬಳಲುತ್ತಾನೆ ಎಂದು ಉಲ್ಲೇಖಿಸಿತ್ತು. ಅಲ್ಲದೇ 2005 ರಿಂದ 2015ರ ಅವಧಿಯಲ್ಲಿ ಪ್ರಪಂಚದಾದ್ಯಂತ ಸುಮಾರು ಶೇ.18ರಷ್ಟು ಮಂದಿ ಮಾನಸಿಕ ರೋಗಗಳಿಗೆ ತುತ್ತಾಗಿದ್ದಾರೆ ಎಂದು ವಿಶ್ವಸಂಸ್ಥೆ ವರದಿ ಮಾಡಿತ್ತು.

ಆರೋಗ್ಯ ಸಂಸ್ಥೆಯ ವರದಿ ಪ್ರಕಾರ, ದೇಶದಲ್ಲಿ ಈ ಪ್ರಮಾಣದಲ್ಲಿ ಮಾನಸಿಕ ರೋಗಿಗಳಿದ್ದರೂ , ಅವರಿಗೆ ಚಿಕಿತ್ಸೆ ನೀಡಲು ಕೇವಲ 4 ಸಾವಿರಕ್ಕೂ ಕಡಿಮೆ ಮನೋರೋಗ ತಜ್ಞರು ಇರುವುದಾಗಿ ಹೇಳಿದೆ.