ಅರುಣಾಚಲ ಪ್ರದೇಶದಲ್ಲಿ ಭಾರಿ ಭೂಕುಸಿತ, 7 ಮಂದಿ ಜೀವಂತ ಸಮಾಧಿ

ಇಟಾನಗರ: ಅರುಣಾಚಲ ಪ್ರದೇಶದಲ್ಲಿ ಧಾರಾಕಾರ ಮಳೆಯಿಂದ ಸಂಭವಿಸಿದ ಭೂಕುಸಿತಗಳಲ್ಲಿ ಎಂಟು ತಿಂಗಳ ಶಿಶು ಸೇರಿದಂತೆ ಏಳು ಮಂದಿ ಜೀವಂತ ಸಮಾಧಿಯಾಗಿದ್ದಾರೆ.

ಮೊದಲ ಘಟನೆ ಪಾಪುಮ್‌ಪೇರ್‌ ಜಿಲ್ಲೆಯ ಟಿಗ್ಡೊ ಗ್ರಾಮದಲ್ಲಿ ಶುಕ್ರವಾರ ನಸುಕಿನ 2.30ರ ಸುಮಾರಿಗೆ ನಡೆದಿದೆ. ತಾನಾ ನೇಕಾ ಎನ್ನುವವರಿಗೆ ಸೇರಿದ ಮನೆ ಭೂ ಕುಸಿತದಿಂದ ನೆಲಸಮಗೊಂಡಿದೆ. ತಾನಾ ಅವರ ಇಬ್ಬರು ಪುತ್ರರು, ಸೊಸೆ ಮತ್ತು 8 ತಿಂಗಳ ಮೊಮ್ಮಗ ಮೃತಪಟ್ಟಿದ್ದಾರೆ. ಸಮೀಪದಲ್ಲಿ ಮತ್ತೊಂದು ನಿವಾಸದಲ್ಲಿ ತಾನಾ ಅವರು ಪತ್ನಿ ಜತೆ ವಾಸವಿದ್ದರು. ಹೀಗಾಗಿ ಅವರು ಪಾರಾಗಿದ್ದಾರೆ.

ಮೊದಿರೊಜೊ ಎಂಬಲ್ಲಿ ಬೆಳಗ್ಗೆ 11.30ರ ಸುಮಾರಿಗೆ ಮನೆ ಕುಸಿದು ಮಹಿಳೆ ಹಾಗೂ ಆಕೆಯ ಇಬ್ಬರು ಹೆಣ್ಣುಮಕ್ಕಳು ಮೃತಪಟ್ಟಿದ್ದಾರೆ. ಸಿಎಂ ಪೆಮಾ ಖಂಡು ಅವರು ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದ್ದು, ತಲಾ 4 ಲಕ್ಷ ರೂ. ಪರಿಹಾರ ನೀಡುವುದಾಗಿ ಘೋಷಿಸಿದ್ದಾರೆ. ಮುಂದಿನ ಹಲವು ದಿನಗಳವರೆಗೆ ರಾಜ್ಯದಲ್ಲಿ ಮಳೆಯ ಆರ್ಭಟ ಮುಂದುವರಿಯಲಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ.

ಒಲಿಗೆ ವರದಾನವಾದ ಪ್ರವಾಗ!

ನೇಪಾಳದಲ್ಲಿಯೂ ಭಾರಿ ಮಳೆಯಾಗುತ್ತಿದ್ದು, ಪ್ರಮುಖ ನದಿಗಳು ಅಪಾಯದ ಮಟ್ಟ ಮೀರಿ ಹರಿಯುತ್ತಿವೆ. 24 ಗಂಟೆ ಅವಧಿಯಲ್ಲಿ ಸಂಭವಿಸಿದ ಭೂಕುಸಿತಗಳಿಗೆ 12 ಮಂದಿ ಬಲಿಯಾಗಿದ್ದು, 30ಕ್ಕೂ ಹೆಚ್ಚು ಜನರು ಕಣ್ಮರೆಯಾಗಿದ್ದಾರೆ. ನೈಸರ್ಗಿಕ ಪ್ರಕೋಪವು ಪ್ರಧಾನಿ ಕೆ.ಪಿ.ಶರ್ಮಾ ಒಲಿ ಅವರಿಗೆ ವರದಾನವಾಗಿ ಪರಿಣಮಿಸಿದೆ.

ದೇಶದಲ್ಲಿ ಪ್ರವಾಹ ಪರಿಸ್ಥಿತಿ ಇರುವುದರಿಂದ ಪಕ್ಷದ ಸ್ಥಾಯಿ ಸಮಿತಿ ಸಭೆಯನ್ನು ಮುಂದಿನ ವಾರ ನಡೆಸಲು ಆಡಳಿತಾರೂಢ ನೇಪಾಳ ಕಮ್ಯೂನಿಸ್ಟ್‌ ಪಾರ್ಟಿ ತೀರ್ಮಾನಿಸಿದೆ. ಚೀನಾ ಕುಮ್ಮಕ್ಕಿನಿಂದ ಭಾರತ ವಿರೋಧಿ ನಿಲುವು ತಾಳಿರುವ ಒಲಿ ರಾಜೀನಾಮೆ ನೀಡಬೇಕೆಂದು ಸ್ವಪಕ್ಷೀಯರೇ ಪಟ್ಟು ಹಿಡಿದಿದ್ದಾರೆ.