ಆಧಾರ್‌ ಲಿಂಕ್ಡ್‌ ಟಿಕೆಟ್‌: ತಡೆರಹಿತ ವಿಮಾನ ಪ್ರಯಾಣ ಮುಂದಿನ ವರ್ಷ ಜಾರಿ

ಹೊಸದಿಲ್ಲಿ: ಮುಂದಿನ ವರ್ಷದಿಂದ (2018) ಕೋಲ್ಕತಾ, ಅಹಮದಾಬಾದ್‌ ಮತ್ತು ವಿಜಯವಾಡದ ವಿಮಾನ ಪ್ರಯಾಣಿಕರು ಟಿಕೆಟ್‌ ಬುಕಿಂಗ್‌ ವೇಳೆ ಟಿಕೆಟ್‌ಗೆ ಆಧಾರ್‌ ಜೋಡಣೆ ಮಾಡಿದಲ್ಲಿ ಯಾವುದೇ ಅಡೆತಡೆಯಿಲ್ಲದೆ ಪ್ರಯಾಣಿಸಬಹುದು.

ಭಾರತೀಯ ವಿಮಾನ ನಿಲ್ದಾಣಗಳ ಪ್ರಾಧಿಕಾರ (ಎಎಐ) ಸರಕಾರದ ಮಹತ್ವಾಕಾಂಕ್ಷೆಯ 'ಡಿಜಿ ಯಾತ್ರಾ' ಯೋಜನೆಯನ್ನು ಪ್ರಾಯೋಗಿಕ ನೆಲೆಯಲ್ಲಿ ಈ ಮೂರು ವಿಮಾನ ನಿಲ್ದಾಣಗಳಲ್ಲಿ ಮುಂದಿನ ವರ್ಷಾರಂಭದಲ್ಲೇ ಜಾರಿಗೊಳಿಸುತ್ತಿದೆ. ನಂತರ ಈ ಆಧಾರ್‌ ಆಧರಿತ ತಡೆರಹಿತ ಪ್ರಯಾಣದ ಅನುಭವವನ್ನು ಇತರ ವಿಮಾನ ನಿಲ್ದಾಣಗಳಿಗೂ ವಿಸ್ತರಿಸಲಿದೆ.

ಆಧಾರ್‌ ಆಧರಿತ ವ್ಯವಸ್ಥೆಯಲ್ಲಿ, ಪ್ರಯಾಣಿಕರ ಬಯೋಮೆಟ್ರಿಕ್‌ ವಿವರಗಳನ್ನು ಬಳಸಿಕೊಂಡು ವಿಮಾನ ನಿಲ್ದಾಣದ ಟರ್ಮಿನಲ್‌ಗಳಲ್ಲಿ ಹಾಗೂ ಗೇಟ್‌ಗಳಲ್ಲಿ ಪರಿಶೀಲನೆ ನಡೆಸಲಾಗುತ್ತದೆ. ನಂತರ ವಿಮಾನ ಹೊರಡುವುದಕ್ಕೆ ಸ್ವಲ್ಪ ಹೊತ್ತಿನ ಮುಂಚೆ ಬೋರ್ಡಿಂಗ್‌ ಗೇಟ್‌ಗೆ ಬಿಡಲಾಗುತ್ತದೆ. ಈ ಮೂರು ಪ್ರಕ್ರಿಯೆಗಳಿಂದಾಗಿ ಗುರುತಿನ ಚೀಟಿ, ಮುದ್ರಿತ ಟಿಕೆಟ್‌ ಮತ್ತು ಬೋರ್ಡಿಂಗ್‌ ಕಾರ್ಡ್‌ಗಳನ್ನು ತೋರಿಸುವ/ಪರಿಶೀಲನೆ ನಡೆಸುವ ಶ್ರಮ ತಪ್ಪುತ್ತದೆ.

'ಪ್ರಯಾಣಿಕರು ಟಿಕೆಟ್‌ ಬುಕಿಂಗ್‌ ವೇಳೆ ಆಧಾರ್‌ ನಂಬರ್‌ ನೀಡಿದಲ್ಲಿ, ವಿಮಾನ ನಿಲ್ದಾಣದ ಪ್ರವೇಶ ದ್ವಾರದಲ್ಲಿ ಇ-ಗೇಟ್‌ನಲ್ಲಿ ಟಿಕೆಟ್‌ನ ಬಾರ್‌ಕೋಡ್‌ ಮತ್ತು ಆಧಾರ್‌ ಮಾಹಿತಿಯ ಪರಿಶೀಲನೆ ನಡೆಯುತ್ತದೆ. ಪ್ರಯಾಣಿಕ ಬಯೋಮೆಟ್ರಿಕ್‌ ನೀಡಿದ ತಕ್ಷಣ ಆತನ ಟಿಕೆಟ್‌ ಹಾಗೂ ಪ್ರಯಾಣದ ಸಂಪೂರ್ಣ ವಿವರ ಕಂಪ್ಯೂಟರ್ ತೆರೆಯ ಮೇಲೆ ಕಾಣಿಸುತ್ತದೆ. ಯಶಸ್ವಿಯಾಗಿ ದೃಢೀಕರಿಸಿದ ಬಳಿಕ ಇ-ಗೇಟ್‌ ತೆರೆಯುತ್ತದೆ' ಎಂದು ಎಎಐ ಮುಖ್ಯಸ್ಥ ಗುರುಪ್ರಸಾದ್‌ ಮೊಹಾಪಾತ್ರ ತಿಳಿಸಿದರು.

'ನಂತರ ಪ್ರಯಾಣಿಕರು ಕ್ಯೂಆರ್‌ ಕೋಡ್‌ ಅಥವಾ ಬಯೋಮೆಟ್ರಿಕ್‌ ಮೂಲಕ ಚೆಕ್‌-ಇನ್‌, ಭದ್ರತಾ ತಪಾಸಣೆ ಮತ್ತು ಬೋರ್ಡಿಂಗ್‌ ಸೇವೆಗಳನ್ನು ಪಡೆಯಬಹುದು. ಆಧಾರ್‌ ಸಂಖ್ಯೆ ನೀಡದ ಪ್ರಯಾಣಿಕರನ್ನು ಸಿಐಎಸ್‌ಎಫ್‌ ಸಿಬ್ಬಂದಿಗಳು ತಪಾಸಣೆ ನಡೆಸಿ ಹಳೆಯ ಪದ್ಧತಿಯಂತೆ ಒಳಬಿಡುತ್ತಾರೆ. ಡಿಜಿ ಯಾತ್ರಾ ಸೇವೆಯಿಂದ ಮ್ಯಾನ್ಯುಯಲ್‌ ತಪಾಸಣೆ ಮೂಲಕ ಆಗುವ ವಿಳಂಬವನ್ನು ತಪ್ಪಿಸಬಹುದು. ಡಿಜಿ ಯಾತ್ರಾ ಸ್ವಯಂ ಸೇವೆಯ ವಿಧಾನವಾಗಿದೆ' ಎಂದು ಮೊಹಾಪಾತ್ರ ವಿವರಿಸಿದರು.