ಕೇವಲ ಮಿಸ್‌ಕಾಲ್‌ ಸಾಕು ನಿಮ್ಮ ಜೀವನ ಬದಲಿಸಲು...

ಮುಂಬಯಿ: ನಿಷ್ಕಲ್ಮಶ ಪ್ರೀತಿಗೆ ಯಾವುದೇ ರೂಪವಾಗಲೀ, ಅಂತಸ್ತಾಗಲೀ ಅಡ್ಡಿಯಾಗುವುದಿಲ್ಲ, ಇದಕ್ಕೆ ಉದಾಹರಣೆಯೆಂದರೆ ಆಸಿಡ್ ದಾಳಿಗೆ ಒಳಗಾಗಿದ್ದ ಲಲಿತಾ ಬೆನ್ಬನ್ಸಿ ಕಥೆ.

2012ರಲ್ಲಿ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಲಲಿತಾ ಮೇಲೆ ಸಹೋದರ ಮುಖಕ್ಕೆ ಆಸಿಡ್ ಹಾಕಿದ್ದ. ಲಲಿತಾರ ಮುಖ ಬಹುತೇಕ ಸುಟ್ಟು ಹೋಗಿತ್ತು. ಲಲಿತಾಗೆ ಮುಂಬಯಿ ಆಸ್ಪತ್ರೆಯಲ್ಲಿ 17 ಶಸ್ತ್ರಚಿಕಿತ್ಸೆ ಮಾಡಲಾಗಿತ್ತು.

ಕೆಲ ತಿಂಗಳ ಹಿಂದೆ ರಾಹುಲ್ ಎಂಬ ವ್ಯಕ್ತಿಯಿಂದ ಮಿಸ್‌ ಕಾಲ್‌ ಬಂದಿತ್ತು, ಬಳಿಕ ಇದೇ ಕರೆ ಇಬ್ಬರ ನಡುವೆ ಪ್ರೀತಿ ಚಿಗುರಲು ಕಾರಣವಾಯ್ತು. ಪರಸ್ಪರ ಭೇಟಿಯಾಗಿ, ಮಾತುಕತೆ ನಡೆಸಿ ಮದುವೆಯಾಗಲು ಇಬ್ಬರೂ ನಿರ್ಧರಿಸಿದ್ದರು. ಮೊದಲು ರಿಜಿಸ್ಟರ್ ಮ್ಯಾರೇಜ್ ಆದ ದಂಪತಿ ಮುಂಬೈನಲ್ಲಿ ರಿಸೆಪ್ಶನ್ ಏರ್ಪಡಿಸಿದ್ದರು. ಮಂಗಳವಾರ ಲಲಿತಾ ರಾಹುಲ್‌ರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಈ ಮದುವೆಗೆ ಆಸಿಡ್ ದಾಳಿಗೊಳಗಾಗಿದ್ದ ಇನ್ನೂ ಅನೇಕ ಮಹಿಳೆಯರು ರಿಸೆಪ್ಶನ್ ನಲ್ಲಿ ಪಾಲ್ಗೊಂಡಿದ್ದರು.



ವಿಶೇಷವೆಂದರೆ ಮುಂಬಯಿನಲ್ಲಿ ನಡೆದ ಮದುವೆಗೆ ಬಾಲಿವುಡ್ ನಟ ವಿವೇಕ್ ಓಬೆರಾಯ್ ಕೂಡಾ ಒಂದು ಫ್ಲಾಟ್‌ ಅನ್ನು ಗಿಫ್ಟ್‌ ಆಗಿ ನೀಡಿದ್ದಾರೆ. ಅಲ್ಲದೇ ಅವರ ಚಿಕಿತ್ಸೆಯ ಖರ್ಚನ್ನೂ ನೀಡುವುದಾಗಿ ಭರವಸೆ ಒದಗಿಸಿದ್ದಾರೆ.