ಶೆಹ್ಲಾ ರಶೀದ್‌ ಬಂಧನಕ್ಕೆ 10 ದಿನ ಮುನ್ನವೇ ನೋಟಿಸ್‌ ನೀಡಿ: ದಿಲ್ಲಿ ಕೋರ್ಟ್

ಹೊಸದಿಲ್ಲಿ: ದೇಶದ್ರೋಹ ಪ್ರಕರಣದಲ್ಲಿ ಆರೋಪಿಯಾಗಿರುವ ಜಮ್ಮು-ಕಾಶ್ಮೀರ ಪೀಪಲ್ಸ್‌ ಮೂವ್‌ಮೆಂಟ್‌ ನಾಯಕಿ, ಸಾಮಾಜಿಕ ಹೋರಾಟಗಾರ್ತಿ, ಜವಾಹರಲಾಲ್ ನೆಹರೂ ವಿಶ್ವವಿದ್ಯಾಲಯ (ಜೆಎನ್‍ಯು) ವಿದ್ಯಾರ್ಥಿ ಸಂಘಟನೆಯ ಮಾಜಿ ಉಪಾಧ್ಯಕ್ಷೆ ಶೆಹ್ಲಾ ರಶೀದ್‌ ಬಂಧನ ಅಗತ್ಯ ಬಿದ್ದಲ್ಲಿ 10 ದಿನ ಮುಂಚಿತವಾಗಿಯೇ ಅವರಿಗೆ ಬಂಧನ ಕುರಿತು ನೋಟಿಸ್‌ ನೀಡುವಂತೆ ದಿಲ್ಲಿ ಪೊಲೀಸ್‌ ವಿಶೇಷ ವಿಭಾಗಕ್ಕೆ ದಿಲ್ಲಿಯ ಪಟಿಯಾಲ ಹೌಸ್‌ ಕೋರ್ಟ್‌ ಸೂಚಿಸಿದೆ.



ರಶೀದ್‌ ಸಲ್ಲಿಸಿದ್ದ ನಿರೀಕ್ಷಣಾ ಜಾಮೀನು ಅರ್ಜಿಯನ್ನು ಕೂಡ ಇದೇ ವೇಳೆ ಕೋರ್ಟ್‌ ತಿರಸ್ಕರಿಸಿದೆ. ಭಾರತೀಯ ಸೇನೆ ವಿರುದ್ಧ ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಆರೋಪ ಮಾಡಿದ ಹಿನ್ನೆಲೆ­ಯಲ್ಲಿ ಶೆಹ್ಲಾ ವಿರುದ್ಧ ಸೆ.10ರಂದು ಪೊಲೀಸರು ಎಫ್‌ಐಆರ್‌ ದಾಖಲಿಸಿಕೊಂಡಿದ್ದರು. ಸುಪ್ರೀಂ ಕೋರ್ಟ್‌ ವಕೀಲ ಅಲೋಕ್‌ ಶ್ರೀವಾಸ್ತವ ಅವರು ಶೆಹ್ಲಾಅವರ ವಿರುದ್ಧ ದೂರು ದಾಖಲಿಸಿ ಬಂಧನಕ್ಕೆ ಆಗ್ರಹಿಸಿದ್ದರು.



370ನೇ ವಿಧಿ ರದ್ದತಿ ನಂತರ ಜಮ್ಮು-ಕಾಶ್ಮೀರದಲ್ಲಿನ ಸ್ಥಿತಿಗತಿಗಳ ಬಗ್ಗೆಯೂ ಶೆಹ್ಲಾಅವರು ಅನೇಕ ಆಧಾರರಹಿತ ಆರೋಪಗಳನ್ನು ಹೊರಿಸಿ ವಿವಾದಕ್ಕೆ ಗುರಿಯಾಗಿದ್ದರು. ಶೆಹ್ಲಾಅವರ ಆರೋಪಗಳನ್ನು ಭಾರತೀಯ ಸೇನೆ ಅಲ್ಲಗಳೆದಿತ್ತು.