ಹಾಜಿ ಅಲಿ ದರ್ಗಾ ಪ್ರವೇಶ: ತೃಪ್ತಿಗೆ ತಡೆ

ಹೊಸದಿಲ್ಲಿ: ದೇಗುಲಗಳ ಪ್ರವೇಶಕ್ಕೆ ಹೋರಾಡಿ ಗೆದ್ದ ತೃಪ್ತಿ ದೇಸಾಯಿ ಗುರುವಾರ ಹಾಜಿ ಅಲಿ ದರ್ಗಾ ಪ್ರವೇಶಿಸಿದರೂ, ಮಹಿಳೆಯರಿಗೆ ನಿರ್ಬಂಧ ಇರುವ ಪ್ರದೇಶ ತಲುಪುವಲ್ಲಿ ವಿಫಲರಾಗಿದ್ದಾರೆ.

ಕಳೆದ ತಿಂಗಳು ದರ್ಗಾ ಪ್ರವೇಶಿಸಲು ವಿಫಲರಾಗಿದ್ದ ತೃಪ್ತಿ ಈ ಬಾರಿ ದರ್ಗಾದ ಒಳಗೆ ಕಾಲಿಟ್ಟರೂ, ಮಹಿಳೆಯರಿಗೆ ನಿರ್ಬಂಧ ಇರುವ ಪ್ರದೇಶ ಪ್ರವೇಶಿಸಲು ಆಗಿಲ್ಲ. ಮುಂದಿನ ಬಾರಿ ತೃಪ್ತಿ ಈ ಕಾರ್ಯದಲ್ಲಿ ಯಶಸ್ವಿಯಾಗಬಹುದು.

'ಮುಂದಿನ ಬಾರಿ ಖಂಡಿತ ಒಳಗೆ ಪ್ರವೇಶಿಸುತ್ತೇವೆ. ಇದು ಲಿಂಗ ಸಮಾನತೆಯ ಹೋರಾಟ. ಮಹಿಳೆಯರಿಗೆ ಅವಕಾಶ ಇರುವ ಪ್ರದೇಶಕ್ಕೆ ಹೋಗಿ ಪ್ರಾರ್ಥನೆ ಸಲ್ಲಿಸಿ ಬಂದಿದ್ದೇನೆ,'ಎಂದು ದರ್ಗಾದಿಂದ ಹೊರಬಂದ ನಂತರ ತೃಪ್ತಿ ಹೇಳಿದ್ದಾರೆ.
ಏಪ್ರಿಲ್‌ 28ರಂದು ತೃಪ್ತಿ ದೇಸಾಯಿ ಹಾಗೂ ಅವರ ಬೆಂಬಲಿಗರು ದರ್ಗಾ ಪ್ರವೇಶಿಸದಂತೆ ಪ್ರತಿಭಟನಾಕಾರರು ತಡೆದಿದ್ದರು. ತೃಪ್ತಿ ದರ್ಗಾಕ್ಕೆ ಭೇಟಿ ನೀಡುವ ವೇಳೆ ಅಲ್ಲಿ ಬಿಗಿ ಭದ್ರತೆ ನಿಯೋಜಿಸಲಾಗಿತ್ತು. ಈ ಬಾರಿ ಪೊಲೀಸರು ಸಹಕರಿಸಿದರು ಎಂದು ತೃಪ್ತಿ ಹೇಳಿದ್ದಾರೆ.

ಶನಿ ಶಿಂಗ್ಣಾಪುರ ಹಾಗೂ ತ್ರೈಬಂಕೇಶ್ವರ ದೇಗುಲಗಳಲ್ಲಿ ಮಹಿಳೆಯರು ಪ್ರವೇಶಕ್ಕೆ ಇದ್ದ ತಡೆಯನ್ನು ತೆರವುಗೊಳಿಸುವಲ್ಲಿ ಭೂಮಾತಾ ಬ್ರಿಗೇಡ್‌ ಮುಖ್ಯಸ್ಥೆ ಯಶಸ್ವಿಯಾಗಿದ್ದಾರೆ.