ಅತ್ಯಾಚಾರ ಆರೋಪಿಗಳಿಗೆ ವಕೀಲರಿಂದ ಥಳಿತ

ಚೆನ್ನೈ: 12 ವರ್ಷದ ಬಾಲಕಿ ಮೇಲೆ ನಿರಂತರ ಏಳು ತಿಂಗಳು ಅತ್ಯಾಚಾರ ಎಸಗಿದ ಪ್ರಕರಣದ 17 ಅರೋಪಿಗಳಿಗೆ ಮಹಿಳಾ ನ್ಯಾಯಾಲಯದ ಆವರಣದಲ್ಲೇ 50ಕ್ಕೂ ಹೆಚ್ಚುವಕೀಲರು ಥಳಿಸಿದ್ದಾರೆ. ಮಂಗಳವಾರ ಅವರನ್ನು ನ್ಯಾಯಾಲಯದ ಪ್ರಕ್ರಿಯೆ ಪೂರ್ಣಗೊಳಿಸುವ ಸಲುವಾಗಿ ಅಲ್ಲಿಗೆ ಕರೆತರಲಾಗಿತ್ತು.

ಬಾಲಕಿ ವಾಸವಿದ್ದ ಅಪಾರ್ಟ್‌ಮೆಂಟ್‌ನಲ್ಲಿ ಅಲ್ಲಿನ ಸೆಕ್ಯುರಿಟಿ ಗಾರ್ಡ್‌ಗಳು, ಲಿಫ್ಟ್ ಆಪರೇಟರ್ ಮತ್ತು ಪ್ಲಂಬರ್ ಕೂಡ ಶ್ರವಣ ದೋಷವಿದ್ದ ಬಾಲಕಿಯನ್ನು ಬೆದರಿಸಿ ಅತ್ಯಾಚಾರ ಎಸಗುತ್ತಿದ್ದರು.

ಏಳನೇ ತರಗತಿ ಓದುತ್ತಿದ್ದ ಬಾಲಕಿಗೆ ಡ್ರಗ್ಸ್ ನೀಡಿ ಪ್ರಜ್ಞೆ ತಪ್ಪಿಸಿ ಕೃತ್ಯ ಎಸಗುತ್ತಿರುವುದು ತನಿಖೆಯ ವೇಳೆ ಪತ್ತೆಯಾಗಿತ್ತು.

ವಕೀಲರು ಹಲ್ಲೆ ನಡೆಸುತ್ತಿದ್ದಂತೆ ಕೌಟುಂಬಿಕ ನ್ಯಾಯಾಲಯದ ನ್ಯಾ. ಧರ್ಮನ್‌, ಮದ್ರಾಸ್ ಹೈಕೋರ್ಟ್‌ ಅಡ್ವೋಕೇಟ್ಸ್‌ ಅಸೋಶಿಯೇಶನ್ ಅಧ್ಯಕ್ಷ ಮೋಹನಕೃಷ್ಣನ್ ಮತ್ತು ಅ. ಕಣ್ಣದಾಸನ್ ಮತ್ತು ಜಂಟಿ ಪೊಲೀಸ್ ಆಯುಕ್ತರು ಆರೋಪಿಗಳ ಸುರಕ್ಷತೆಗೆ ಕ್ರಮ ಕೈಗೊಂಡರು. ಜತೆಗೆ ಸಾಮೂಹಿಕ ಅತ್ಯಾಚಾರ ಪ್ರಕರಣದ ಆರೋಪಿಗಳ ಪರ ಯಾರೂ ವಾದ ಮಾಡದಂತೆ ವಕೀಲರ ಸಂಘವು ನಿರ್ಧರಿಸಿದೆ.

ಸಾಮೂಹಿಕ ಅತ್ಯಾಚಾರ ಪ್ರಕರಣದಲ್ಲಿ ಬಂಧನಕ್ಕೊಳಗಾದ ಎಲ್ಲರ ಮೇಲೂ ಪೋಕ್ಸೋ ಕಾಯ್ದೆ ಅಡಿ ತಮಿಳುನಾಡು ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.