ಆಫ್ರಿಕಾದ ರವಾಂಡದಲ್ಲಿ ಫೇರ್‌ನೆಸ್ ಕ್ರೀಂಗೆ ನಿಷೇಧ

ಹೊಸದಿಲ್ಲಿ: ಪೂರ್ವ ಆಫ್ರಿಕಾದ ರವಾಂಡದಲ್ಲಿ ಅಲ್ಲಿನ ಸರಕಾರ ಎಲ್ಲ ರೀತಿಯ ಫೇರ್‌ನೆಸ್‌ ಕ್ರೀಂ, ಬ್ಲೀಚಿಂಗ್ ಕ್ರೀಂ ಮತ್ತು ಚರ್ಮಕ್ಕೆ ಬಿಳುಪು ತರುವ ಕ್ರೀಂಗಳನ್ನು ನಿಷೇಧಿಸಿದೆ.

ಆರೋಗ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ ಮತ್ತು ಅನಾವಶ್ಯಕ ಖರ್ಚು ತರುತ್ತದೆ ಎಂಬ ಕಾರಣಕ್ಕೆ ನಿಷೇಧ ಜಾರಿಮಾಡಿದ್ದು, ದೇಶದೆಲ್ಲೆಡೆ ವಿಶೇಷ ಜಾಗೃತಿ ಆಂದೋಲನ ಕೈಗೊಳ್ಳಲಿದೆ.

ರವಾಂಡದ ಆರೋಗ್ಯ ಸಚಿವಾಲಯ, ಆಹಾರ ಮತ್ತು ಔಷಧ ಪ್ರಾಧಿಕಾರ ಮತ್ತು ರವಾಂಡ ಸ್ಟ್ಯಾಂಡರ್ಡ್ಸ್‌ ಮಂಡಳಿ ಜಂಟಿಯಾಗಿ ಕಾಸ್ಮೆಟಿಕ್, ತ್ವಚೆ ಬಿಳಿಯಾಗಿಸುವ ಮತ್ತು ಮುಖದ ಅಂದ ಹೆಚ್ಚಿಸುವ ಫೇರ್‌ನೆಸ್ ಕ್ರೀಂ ವಿರುದ್ಧ ಸಮರ ಸಾರಿವೆ.

ಜತೆಗೆ ಈಗಾಗಲೇ ರವಾಂಡದ ಪೊಲೀಸ್ ಕ್ರೀಂ ನಿಯಂತ್ರಣಕ್ಕೆ ಮುಂದಾಗಿದ್ದು, 5000ಕ್ಕೂ ಅಧಿಕ ನಿಷೇಧಿತ ಬ್ಲೀಚಿಂಗ್ ಉತ್ಪನ್ನಗಳನ್ನು ವಶಕ್ಕೆ ಪಡೆದಿವೆ.

ಸೌಂದರ್ಯ ಉತ್ಪನ್ನ ಮಾರಾಟ ಮಳಿಗೆ ಮತ್ತು ಬ್ಯೂಟಿ ಪಾರ್ಲರ್‌ಗಳಿಗೆ ದಾಳಿ ನಡೆಸಿ ಲೋಶನ್, ಆಯಿಲ್, ಸೋಪ್‌ ಮತ್ತು ಸ್ಪ್ರೇಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಭಾರತ ಏನು ಕಲಿಯಬೇಕು?ರವಾಂಡದಲ್ಲಿ ಸೌಂದರ್ಯವರ್ಧಕ ಉತ್ಪನ್ನಗಳಿಗೆ ನಿಷೇಧ ಹೇರಿರುವುದನ್ನು ಗಮನಿಸಿದರೆ, ಭಾರತ ಕಲಿಯಬೇಕಿರುವುದು ಬಹಳಷ್ಟಿದೆ. ದೇಶದಲ್ಲಿ 450 ಮಿಲಿಯನ್ ಡಾಲರ್‌ಗೂ ಅಧಿಕ ಮೌಲ್ಯದ ಫೇರ್‌ನೆಸ್ ಕ್ರೀಂ ಮಾರುಕಟ್ಟೆಯಿದೆ. ದೇಶದಲ್ಲಿ ತ್ವಚೆಯನ್ನು ಬಿಳಿಯಾಗಿಸುವ ಕ್ರೀಂಗಳ ಮಾರಾಟ ಅತಿಹೆಚ್ಚಿನ ಪ್ರಮಾಣದಲ್ಲಿದೆ.