ಹಸಿರು ಪಟಾಕಿ ಎಲ್ಲಿದೆ? ಎಲ್ಲಿ ಸಿಗುತ್ತೆ?

ಮುಂಬಯಿ: ದೀಪಾವಳಿ ಸಮೀಪಿಸುತ್ತಿದ್ದಂತೆ ಪಟಾಕಿ ಮಾರಾಟ ಮತ್ತು ಬಳಕೆ ಕುರಿತ ಚರ್ಚೆಗಳು ಆರಂಭವಾಗಿದ್ದು, ಪರಿಸರ ಸ್ನೇಹಿ ಹಸಿರು ಪಟಾಕಿಗಳನ್ನು ಬಳಕೆ ಮಾಡಿ ಎಂದು ಸುಪ್ರೀಂಕೋರ್ಟ್ ನಿರ್ದೇಶನ ನೀಡಿದೆ.

ಆದರೆ ಚರ್ಚೆಗೆ ಗ್ರಾಸವಾಗಿರುವ ಹಸಿರು ಪಟಾಕಿ ಎಲ್ಲಿ ಲಭ್ಯ ಎಂಬ ಪ್ರಶ್ನೆಗೆ ಮಾತ್ರ ಯಾರಲ್ಲೂ ಉತ್ತರವಿಲ್ಲ. ಪಟಾಕಿ ಸಿಡಿಸಲು ನಿರ್ಬಂಧ ಮತ್ತು ಸಮಯದ ಮಿತಿ ನಿಗದಿಪಡಿಸಿ ಸುಪ್ರೀಂಕೋರ್ಟ್ ಆದೇಶ ಹೊರಡಿಸಿದೆ.

ಆದರೆ ಹಸಿರು ಪಟಾಕಿ ಮಾತ್ರ ಮುಂಬಯಿಯ ಯಾವುದೇ ಮಳಿಗೆಯಲ್ಲಿ ಸದ್ಯಕ್ಕೆ ದೊರೆಯುತ್ತಿಲ್ಲ. ಪಟಾಕಿ ಸಿಡಿಸಿದಾಗ ಅದರಿಂದ ಹೆಚ್ಚಿನ ಪ್ರಮಾಣದ ಹೊಗೆ ಮತ್ತು ಶಬ್ಧ ಉಂಟಾದರೆ ಅದರಿಂದ ಮಾಲಿನ್ಯ ಉಂಟಾಗುತ್ತದೆ. ಅಂತಹ ಪಟಾಕಿ ಬಳಸಬಾರದು, ಅದರ ಬದಲು ಹೊಗೆ ಮತ್ತು ಶಬ್ಧ ರಹಿತ ಹಸಿರು ಪಟಾಕಿ ಬಳಕೆ ಮಾಡಿ ಎಂದು ಸುಪ್ರೀಂಕೋರ್ಟ್ ಹೇಳುತ್ತಿದೆ. ಆದರೆ ಹಸಿರು ಪಟಾಕಿ ಮತ್ತು ಸಾಮಾನ್ಯ ಪಟಾಕಿ ಮಧ್ಯೆ ವ್ಯತ್ಯಾಸ ಹುಡುಕಲು ಕಷ್ಟವಿದೆ.

ಈ ಸಮಸ್ಯೆಗೆ ಪರಿಹಾರ ಹುಡುಕಲು ಐಐಟಿಯ ವಿದ್ಯಾರ್ಥಿಗಳು ಸಂಶೋಧನೆಯಲ್ಲಿ ತೊಡಗಿದ್ದಾರೆ. ದೀಪಾವಳಿ ಹಬ್ಬಕ್ಕೆ ಎರಡು ವಾರಗಳಷ್ಟೇ ಉಳಿದಿವೆ. ಈಗಾಗಲೇ ದೊಡ್ಡ ಮಟ್ಟದ ಪಟಾಕಿ ದಾಸ್ತಾನು ಮಳಿಗೆಗಳು ಮತ್ತು ಡೀಲರ್‌ಗಳನ್ನು ತಲುಪಿದೆ. ಅಂಗಡಿಗಳಲ್ಲಿ ಪಟಾಕಿ ಮಾರಾಟ ಆರಂಭವಾಗಿದೆ. ಆದರೆ ಶೇ. 80 ಪಟಾಕಿ ಪ್ಯಾಕ್‌ಗಳಲ್ಲಿ ಅದರಲ್ಲಿರಬಹುದಾದ ರಾಸಾಯನಿಕ ಬಗ್ಗೆ ಮಾಹಿತಿಯಿಲ್ಲ.

ಆದರೆ ದೆಹಲಿಯಲ್ಲಿ ಪಟಾಕಿಗೆ ನಿಷೇಧ ಹೇರುವ ಸಾಧ್ಯತೆ ಬಗ್ಗೆ ಅರಿವಿದ್ದರಿಂದ ದೆಹಲಿಯಲ್ಲಿ ಪಟಾಕಿ ಮಾರಾಟಕ್ಕೆ ಹೆಚ್ಚಿನ ಒಲವು ಕಂಡುಬಂದಿಲ್ಲ. ಜತೆಗೆ ಪಟಾಕಿ ಮಾರಾಟಕ್ಕೆ ಸಂಪೂರ್ಣ ನಿಷೇಧವಾದರೆ ಅದರಿಂದ ಸಮಸ್ಯೆಯಾಗುವ ಸಾಧ್ಯತೆಯಿದೆ.

ಸಿಎಸ್‌ಐಆರ್ ಶೋಧನೆ

ಹಸಿರು ಪಟಾಕಿ ಬಳಕೆ ಕುರಿತು ಸಿಎಸ್‌ಐಆರ್‌ನ ತಜ್ಞರು ಸಂಶೋಧನೆ ನಡೆಸಿದ್ದು, ಸುಪ್ರೀಂಕೋರ್ಟ್ ಮಾನದಂಡಗಳನ್ನು ಅವು ಪಾಲಿಸುತ್ತವೆ ಎಂದಿದ್ದಾರೆ. ಮಾಲಿನ್ಯ ಕಡಿಮೆ ಮಾಡಿ ಧೂಳನ್ನು ಹೀರಿಕೊಳ್ಳುವ, ಹೊಗೆ ಬಿಡದ ಪಟಾಕಿ ತಯಾರಿಸುವ ಫಾರ್ಮುಲಾ ಬಗ್ಗೆ ಅವರು ಸಂಶಧೋನೆ ನಡೆಸುತ್ತಿದ್ದಾರೆ.

ಜತೆಗೆ ಎಲೆಕ್ಟ್ರಾನಿಕ್ ಪಟಾಕಿಗಳೂ ಬಳಕೆಗೆ ಲಭ್ಯವಿದೆ. ಭಾರತ ಮಾತ್ರವಲ್ಲದೆ ನೆದರ್ಲೆಂಡ್, ಸಿಂಗಾಪುರ, ಜರ್ಮನಿ, ಇಂಗ್ಲೆಂಡ್, ಆಸ್ಟ್ರೇಲಿಯಾ ಹಾಗು ಚೀನಾದಲ್ಲಿ ಪಟಾಕಿ ಬಳಕೆಗೆ ಸಂಬಂಧಿಸಿ ಕಠಿಣ ಕಾನೂನು ಜಾರಿಯಲ್ಲಿದೆ.

ಮೂಲ ವರದಿ: ಮಹಾರಾಷ್ಟ್ರ ಟೈಮ್ಸ್