ಮಡದಿಯ ವಾಟ್ಸ್‌ಆ್ಯಪ್‌ ಚಾಟ್‌ ನೋಡಿದ ಗಂಡ: ವಿಚ್ಛೇದನಕ್ಕೆ ಅರ್ಜಿ

ಹೊಸದಿಲ್ಲಿ: ಮಡದಿ ಎಲ್ಲ ಹೊತ್ತಿನಲ್ಲಿ ವಾಟ್ಯ್‌ಆ್ಯಪ್‌ನಲ್ಲಿ ಚಾಟ್‌ ಮಾಡುತ್ತಾಳೆ. ಸ್ನೇಹಿತರ ಜತೆ ಅಶ್ಲೀಲ ಚಿತ್ರ, ವೀಡಿಯೋಗಳನ್ನು ಶೇರ್ ಮಾಡುತ್ತಿದ್ದಾಳೆ. ನನಗೆ ವಿಚ್ಛೇದನ ನೀಡುವಂತೆ ಪತಿ ಕೋರ್ಟ್‌ ಮೊರೆ ಹೋಗಿದ್ದಾನೆ.

2017 ಮೇನಲ್ಲಿ ಮದುವೆಯಾದ ದಂಪತಿ, ಅಂದಿನಿಂದ ದಾಂಪತ್ಯದಲ್ಲಿ ಹೊಂದಾಣಿಕೆ ಇಲ್ಲ. ಪತ್ನಿ ಸದಾ ಕಾಲ ವಾಟ್ಸ್‌ಆ್ಯಪ್‌ನಲ್ಲಿ ತನ್ನ ಸ್ನೇಹಿತರ ಜತೆಯಲ್ಲೇ ಮಾತನಾಡುತ್ತಿರುತ್ತಾಳೆ. ನನ್ನನ್ನು ಕಡೆಗಣಿಸುತ್ತಿದ್ದಾಳೆ. ಮದುವೆ ಸಮಯದಲ್ಲಿ ಅವಳಿಂದ ಯಾವುದೇ ರೀತಿಯಲ್ಲಿ ವರದಕ್ಷಿಣೆಗಳನ್ನು ಪಡೆದಿರಲಿಲ್ಲ. ಹಾಗಿದ್ದರೂ ಆಕೆ ತನ್ನೊಂದಿಗೆ ಸಮಯ ಕಳೆಯುತ್ತಿಲ್ಲ ಎಂದು ಪತಿ ಆರೋಪಿಸಿದ್ದಾನೆ.

ಪತಿಯ ದೂರಿನ ಮೇರೆಗೆ ವಿಚಾರಣೆ ಕೈಗೆತ್ತಿಕೊಂಡಿರುವ ನ್ಯಾಯಾಲಯ, ಪತ್ನಿಯನ್ನು ಕರೆಸಿ, ವಿಚಾರಣೆ ನಡೆಸಿದ್ದು, ಪತಿ ಆರೋಪದಲ್ಲಿ ಸತ್ಯಾಂಶಗಳಿಲ್ಲ ಎಂದು ಆಕೆ ವಾದಿಸಿದ್ದಾಳೆ. ದಂಪತಿಗಳನ್ನು ಕೌನ್ಸೆಲಿಂಗ್‌ಗೆ ಕಳುಹಿಸಿರುವ ನ್ಯಾಯಾಲಯ, ದಂಪತಿಗಳ ಮಾನಸಿಕ ಸ್ಥಿತಿ ಬಗ್ಗೆ ಅರಿತು ವರದಿ ನೀಡುವಂತೆ ಸೂಚಿಸಿದೆ.

ಪ್ರತಿ ತಿಂಗಳ ವೇತನವನ್ನು ಪತ್ನಿ ಕದಿಯುತ್ತಿದ್ದಾಳೆ. ಪ್ರತಿ ನಿಮಿಷವೂ ವಾಟ್ಸ್‌ಆ್ಯಪ್‌ನಲ್ಲಿ ಬ್ಯುಸಿಯಾಗಿರುವುದರಿಂದ ನನ್ನ ಜತೆ ಮಾತನಾಡಲೂ ಬರುವುದಿಲ್ಲ. ಸ್ನೇಹಿತರ ಗುಂಪುಗಳಲ್ಲಿ ಅಶ್ಲೀಲ ಚಿತ್ರ, ವೀಡಿಯೋಗಳನ್ನು ಕಳುಹಿಸುತ್ತಿರುವುದಾಗಿ ದೂರಿನಲ್ಲಿ ತಿಳಿಸಿದ್ದಾರೆ ಎಂದು ವಕೀಲ ಮನೀಶ್‌ ಭಡೋರಿಯ ಹೇಳಿದ್ದಾರೆ.

ಈ ಹಿಂದೆ ಹಳೆಯ ಎಲ್ಲ ಸ್ನೇಹಿತರನ್ನು ಮರೆತು, ಹೊಸ ಜೀವನ ಆರಂಭಿಸುವಂತೆ ಆಕೆಯ ಅಪ್ಪ ಅಮ್ಮನ ಸಮ್ಮುಖದಲ್ಲೇ ಮಾತುಕತೆ ನಡೆಸಲಾಗಿತ್ತು ಎಂದು ಪತಿ ತನ್ನ ದೂರಿನಲ್ಲಿ ಹೇಳಿದ್ದಾನೆ.