127 ರೂ ಗ್ಯಾಸ್‌ ಸಬ್ಸಿಡಿ ಪಡೆಯಲು 810ರೂ. ಖರ್ಚು !

ಅಹ್ಮದಾಬಾದ್‌: ಇಲ್ಲಿನ ಗಾಂಧಿಬಜಾರ್‌ನ ನಿವಾಸಿಯೊಬ್ಬರು 127.46 ರೂ. ಗ್ಯಾಸ್‌ ಸಬ್ಸಿಡಿ ನೀಡದ ಅಂಗಡಿಯ ವಿರುದ್ಧ ಕೋರ್ಟ್‌ನಲ್ಲಿ ದಾವೆ ಹೂಡಿ ಜಯಶಾಲಿಯಾಗಿದ್ದರೂ, ಈ ಹಣವನ್ನು ಪಡೆಯಲು ಮಾಡಿದ ಖರ್ಚು 810ರೂಪಾಯಿ!.

ಗಾಂಧಿಬಜಾರ್‌ನ ಸ್ಥಳೀಯ ಗ್ಯಾಸ್‌ ಏಜೆನ್ಸಿಯೊಂದರಲ್ಲಿ ಒಂದು ವರ್ಷದ ಹಿಂದೆ ಭಾಸ್ಕರೈ ಮುಲ್ಶಂಕರ್‌ ವೈಧ್‌ ಎಂಬವರು ಗ್ಯಾಸ್‌ ಖರೀದಿಸಿದ್ದರು. ಆದರೆ ಏಜೆನ್ಸಿಯವರು ವೈಧ್‌ ಅವರ ಸಬ್ಸಿಡಿ ಹಣವನ್ನು ನೀಡದೆ ಸತಾಯಿಸಿದ್ದರು. ಇದರಿಂದ ಸಿಟ್ಟಿಗೆದ್ದ ವೈಧ್‌ ಏಜೆನ್ಸಿ ವಿರುದ್ಧ ಗ್ರಾಹಕ ವ್ಯಾಜ್ಯ ಇತ್ಯರ್ಥ ವೇದಿಕೆಗೆ ದೂರು ಸಲ್ಲಿಸಿದ್ದರು.

ಪ್ರಕರಣದ ವಿಚಾರಣೆ ವೇಳೆ ಏಜೆನ್ಸಿಯವರು ವೈಧ್‌ ಗ್ಯಾಸ್‌ ಸಬ್ಸಿಡಿ ಪಡೆಯಲು ಆಧಾರ್‌ ಲಿಂಕ್‌ ಮಾಡಿಸದ ಹಿನ್ನೆಲೆಯಲ್ಲಿ ಸಬ್ಸಿಡಿ ನೀಡುವುದಿಲ್ಲ ಎಂದು ವಾದಿಸಿದ್ದರು. ಆದರೆ ವೈಧ್‌ ಆಧಾರ್‌ ಕಾರ್ಡ್‌ ಲಿಂಕ್‌ ಮಾಡಿರುವ ದಾಖಲೆಗಳನ್ನು ತೋರಿಸಿದ್ದಾರೆ. ಅಲ್ಲದೇ ಏಜೆನ್ಸಿ ತಮ್ಮ ಹೇಳಿಕೆಗೆ ಯಾವುದೇ ಪುರಾವೆಯನ್ನು ನೀಡಿರಲಿಲ್ಲ.

ವಯಸ್ಸಾಗಿರುವ ವೈಧ್‌ ವಿಚಾರಣೆ ವೇಳೆ ತಮಗಾದ ಕಿರುಕುಳಕ್ಕೆ ರೂ 200, ವಿಚಾರಣೆಗೆ ಹಾಜರಾಗಲು 300 ರೂ, ದೂರವಾಣಿ ಕರೆಗಳಿಗೆ ರೂ 200 ಮತ್ತು ದಾಖಲೆಗಳ ಜೆರಾಕ್ಸ್‌ ಪ್ರತಿಗಳಿಗೆ 110ರೂ. ಹಾಗೂ ಸಬ್ಸಿಡಿ ಹಣ 127.46 ನೀಡುವಂತೆ ಕೇಳಿಕೊಂಡಿದ್ದಾರೆ.

ಅಂತಿಮವಾಗಿ ವಿಚಾರಣೆ ನಡೆಸಿರುವ ನ್ಯಾಯಾಲಯ ವೈಧ್‌ ಕೇಳಿರುವ 937 ರೂ. ನೊಂದಿಗೆ 450 ರೂ ದಾವೆ ಖರ್ಚನ್ನೂ ಭರಿಸುವಂತೆ ಆದೇಶಿಸಿದೆ.