ಬಂಗಾಳದ ಅಜ್ಜಿ, ಮೊಮ್ಮಗಳನ್ನು ಕುಟುಂಬಕ್ಕೆ ಸೇರಿಸಿದ ಅಹ್ಮದಾಬಾದ್ ಪೊಲೀಸರು

ಅಹ್ಮದಾಬಾದ್‌: ನಗರದಲ್ಲಿ ಕುಟುಂಬ ಸದಸ್ಯರ ಗುಂಪಿನಿಂದ ತಪ್ಪಿಸಿಕೊಂಡಿದ್ದ ಪಶ್ಚಿಮ ಬಂಗಾಳದ ಅಜ್ಜಿ ಮತ್ತು ಮೊಮ್ಮಗಳನ್ನು ಇಲ್ಲಿನ ಪೊಲೀಸರು ಮರಳಿ ಕುಟುಂಬಕ್ಕೆ ಸೇರಿಸಿದ್ದಾರೆ.

ತಪ್ಪಿಸಿಕೊಂಡಿದ್ದ ಅಜ್ಜಿ ಮತ್ತು ಮೊಮ್ಮಗಳಿಗೆ ಬಂಗಾಳಿ ಭಾಷೆ ಬಿಟ್ಟು ಬೇರೇನೂ ಗೊತ್ತಿಲ್ಲ. ಹೀಗಾಗಿ ಅವರ ಕುಟುಂಬ ಸದಸ್ಯರ ಪತ್ತೆಗೆ ಪೊಲೀಸರು ಬಹಳಷ್ಟು ಪ್ರಯಾಸಪಟ್ಟರು. ಕೊನೆಗೂ ಕುಟುಂಬದವರು ದೂರು ದಾಖಲಿಸುವ ಮೊದಲೇ ಪೊಲೀಸರು ಅವರಿಬ್ಬರನ್ನೂ ಕುಟುಂಬ ಸದಸ್ಯರ ಜತೆ ಸೇರಿಸುವಲ್ಲಿ ಯಶಸ್ವಿಯಾಗಿದ್ದಾರ.

56 ವರ್ಷದ ಹಸೀನಾ ಬೀಬಿ ಮತ್ತು 11 ವರ್ಷದ ಸೋನಾಲಿ ಎಲ್ಲಿಸ್‌ಬ್ರಿಡ್ಜ್ ಪ್ರದೇಶದಲ್ಲಿ ಅಡ್ಡಾಡುತ್ತಿದ್ದರು. ಅಲ್ಲಿನ ಪೊಲೀಸರಿಗೆ ಮಹಿಳಾ ಸಹಾಯವಾಣಿಯಿಂದ ಕರೆ ಬಂದಿತ್ತು. ಪತ್ತೆ ಕಾರ್ಯಾಚರಣೆ ಕೈಗೊಂಡ ಪೊಲೀಸರು ಚಂಡೋಲಾ ಪ್ರದೇಶದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಬಂಗಾಳಿ ವಲಸಿಗರು ಇರುವ ಪ್ರದೇಶಕ್ಕೆ ಕರೆದೊಯ್ದರು. ಅಲ್ಲಿದ್ದ ಒಬ್ಬರು ಪೊಲೀಸರಿಗೆ ಈ ಕುಟುಂಬದವರು ಇರುವ ಪ್ರದೇಶವನ್ನು ತೋರಿಸಿದರು. ಕೊನೆಗೆ ಅಲ್ಲಿದ್ದವರು ಇಬ್ಬರನ್ನೂ ಗುರುತಿಸಿ ಕುಟುಂಬಕ್ಕೆ ಸೇರಿಸಿದರು.