ಏಮ್ಸ್‌ನಲ್ಲಿ ಅಗ್ನಿ ಅವಘಡ

ಹೊಸದಿಲ್ಲಿ: ಅಖಿಲ ಭಾರತ ವೈದ್ಯ ವಿಜ್ಞಾನ ಸಂಸ್ಥೆ (ಏಮ್ಸ್‌)ಯಲ್ಲಿ ಶನಿವಾರ ಅಗ್ನಿ ಅವಘಡ ಸಂಭವಿಸಿದ್ದು, ಕೆಲ ಕಾಲ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು. ತುರ್ತು ಚಿಕಿತ್ಸಾ ಘಟಕದ ಬಳಿ ಈ ಅವಘಡ ಘಟಿಸಿತು. ವೈದ್ಯರ ಕೊಠಡಿಗಳು ಮತ್ತು ಲ್ಯಾಬ್‌ಗಳು ಇರುವ ವಿಭಾಗದಲ್ಲಿ ಈ ಅವಘಡ ಸಂಭವಿಸಿದೆ. ಈ ವಿಭಾಗದಲ್ಲಿ ರೋಗಿಗಳು ಇಲ್ಲದ್ದರಿಂದ ಯಾವುದೇ ಜೀವ ಹಾನಿ ಆಗಿಲ್ಲ. ಸ್ಥಳಕ್ಕೆ ಧಾವಿಸಿದ 34 ಅಗ್ನಿ ಶಾಮಕ ವಾಹನಗಳು ತ್ವರಿತವಾಗಿ ಬೆಂಕಿ ನಂದಿಸಿ ನಷ್ಟದ ಪ್ರಮಾಣ ತಗ್ಗಿಸಿದವು. ಆದರೂ ಸಮೀಪದ ವಾರ್ಡ್‌ಗಳಿಂದ ರೋಗಿಗಳನ್ನು ಸುರಕ್ಷಿತ ಕಡೆಗಳಿಗೆ ಸ್ಥಳಾಂತರಿಸುವ ಜತೆಗೆ ಕಟ್ಟಡದ ವಿದ್ಯುತ್‌ ಸಂಪರ್ಕವನ್ನೂ ಕಡಿತಗೊಳಿಸಲಾಯಿತು. ಈ ಅಗ್ನಿ ಅವಘಡಕ್ಕೆ ಶಾರ್ಟ್‌ ಸಕ್ರ್ಯೂಟ್‌ ಕಾರಣ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.