ಆಸ್ಪತ್ರೆಯಿಂದ ಪರಿಕ್ಕರ್‌ ಡಿಸ್‌ಚಾರ್ಜ್‌

ಪಣಜಿ: ಮೇದೋಜೀರಕ ಗ್ರಂಥಿ ಕ್ಯಾನ್ಸರ್‌ಗೆ ಚಿಕಿತ್ಸೆ ಪಡೆಯುತ್ತಿರುವ ಗೋವಾ ಮುಖ್ಯಮಂತ್ರಿ ಮನೋಹರ್‌ ಪರಿಕ್ಕರ್‌ ಅವರು ಮಂಗಳವಾರ ಸಂಜೆ ಗೋವಾ ಮೆಡಿಕಲ್‌ ಕಾಲೇಜು ಆಸ್ಪತ್ರೆಯಿಂದ ಡಿಸ್‌ಚಾರ್ಜ್‌ ಆಗಿದ್ದಾರೆ.

ಪರಿಕ್ಕರ್‌ ಅವರ ಆರೋಗ್ಯ ಸ್ಥಿರವಾಗಿದ್ದು, ಅವರು ಚೇತರಿಸಿಕೊಂಡಿದ್ದಾರೆ. ಮನೆಯಲ್ಲೇ ಚಿಕಿತ್ಸೆ ಮುಂದುವರಿಸಲಾಗುವುದು ಎಂದು ವೈದ್ಯರು ಹೇಳಿದ್ದಾರೆ.

ಶನಿವಾರ ಆರೋಗ್ಯದಲ್ಲಿ ವ್ಯತ್ಯಾಸವಾದ ಬಳಿಕ ಅವರನ್ನು ಗೋವಾ ಮೆಡಿಕಲ್‌ ಕಾಲೇಜಿಗೆ ದಾಖಲಿಸಲಾಗಿತ್ತು.

ರಕ್ತ ವಾಂತಿ ವದಂತಿ: ಪರಿಕ್ಕರ್‌ ಅವರು ಸ್ವಲ್ಪ ಪ್ರಮಾಣದ ರಕ್ತವನ್ನೂ ವಾಂತಿ ಮಾಡಿದ್ದಾರೆ ಎಂದು ವರದಿಗಳು ಹೇಳಿವೆ. ಆದರೆ ಇದನ್ನು ನಿರಾಕರಿಸಿರುವ ಗೋವಾ ಆರೋಗ್ಯ ಸಚಿವರು ಆರೋಗ್ಯ ಉತ್ತಮವಾಗಿದೆ ಎಂದಿದ್ದಾರೆ.

ಆಸ್ಪತ್ರೆಯಿಂದ ಡಿಸ್‌ಚಾರ್ಜ ಆದ ಬೆನ್ನಲ್ಲೇ ಮಾಜಿ ರಕ್ಷಣಾ ಸಚಿವರೂ ಆಗಿರುವ ಪರಿಕ್ಕರ್‌ ಪಾಕ್‌ ಉಗ್ರರ ಮೇಲೆ ವಾಯುಪಡೆ ದಾಳಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಯೋಧರನ್ನು ಅಭಿನಂದಿಸಿದ್ದಾರೆ.

''ಇಂತಹ ಸಾಹಸದ ಕಾರ್ಯಾಚರಣೆಗಾಗಿ ಭಾರತೀಯ ವಾಯುಪಡೆಗೆ ಸೆಲ್ಯೂಟ್‌. ವಾಯುಪಡೆಯ ಅಸಾಧಾರಣ ದಾಳಿ ಸಾಮರ್ಥ್ಯ‌ಕ್ಕೆ ಇದು ನಿದರ್ಶನ,'' ಎಂದು ಪರಿಕ್ಕರ್‌ ಬಣ್ಣಿಸಿದ್ದಾರೆ. ಸೇನೆಯ ಮೇಲೆ ವಿಶ್ವಾಸ ಇರಿಸಿದ್ದಕ್ಕಾಗಿ ಪ್ರಧಾನಿ ಮೋದಿ ಅವರನ್ನೂ ಪರಿಕ್ಕರ್‌ ಶ್ಲಾಘಿಸಿದ್ದಾರೆ.