ಹೊಸದಿಲ್ಲಿ: ಗಣರಾಜ್ಯೋತ್ಸವ ಪ್ರಯುಕ್ತ ವಾಯುಪಡೆಯ ಪೆರೇಡ್‌ ತಾಲೀಮಿಗಾಗಿ ದಿಲ್ಲಿಯ ವಿಮಾನಯಾನ ಪ್ರದೇಶವನ್ನು ಜ.18ರಿಂದ 26ರವರೆಗೆ ಪ್ರತಿದಿನ ಎರಡು ಗಂಟೆಗಳ ಕಾಲ ವಾಣಿಜ್ಯ ವಿಮಾನಗಳ ಹಾರಾಟಕ್ಕೆ ನಿರ್ಬಂಧಿಸಲಾಗಿದೆ.
ಇದರಿಂದ ದಿಲ್ಲಿಯ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣ(ಐಜಿಐ)ಕ್ಕೆ ಆಗಮಿಸುವ ಹಾಗೂ ಇಲ್ಲಿಂದ ನಿರ್ಗಮಿಸುವ ಸುಮಾರು 1000 ವಿಮಾನಗಳ ಹಾರಾಟಕ್ಕೆ ಅಡಚಣೆಯಾಗಲಿದ್ದು, ಹಾರಾಟ ರದ್ದುಪಡಿಸುವ ಇಲ್ಲವೇ ಬೇರೆ ಸಮಯಕ್ಕೆ ಮರು ನಿಗದಿಗೊಳಿಸುವ ಅನಿವಾರ್ಯತೆ ಎದುರಾಗಿದೆ. ಸುಮಾರು 500 ದೇಶೀಯ ವಿಮಾನಗಳನ್ನು ರದ್ದುಪಡಿಸಬಹುದು. ಹಾಗೆಯೇ 500 ಅಂತಾರಾಷ್ಟ್ರೀಯ ವಿಮಾನಗಳ ಸಮಯ ಬದಲಿಸಬೇಕಾಗುತ್ತದೆ ಎಂದು ಏರ್‌ಪೋರ್ಟ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಈ ಒಂದು ವಾರದ ಅವಧಿಯಲ್ಲಿ ಬೆಳಗ್ಗೆ 10.35ರಿಂದ ಮಧ್ಯಾಹ್ನ 12.15ರವರೆಗೆ ಯಾವುದೇ ಟೇಕಾಫ್‌ ಅಥವಾ ಲ್ಯಾಂಡಿಂಗ್‌ಗೆ ಅವಕಾಶ ಇರುವುದಿಲ್ಲ ಎಂದು ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರ ಪ್ರಕಟಣೆ ಹೊರಡಿಸಿದೆ.
ಐಜಿಐನಲ್ಲಿ ಬೆಳಗಿನ ಅವಧಿಯಲ್ಲಿ ಪ್ರತಿ ಒಂದು ಗಂಟೆಗೆ ಸುಮಾರು 67 ವಿಮಾನಗಳು ಹಾರಾಡುತ್ತವೆ. ಹೀಗಾಗಿ, ದಿನಕ್ಕೆ ಸುಮಾರು 100 ನಿಮಿಷಗಳ ಅವಧಿ ವಿಮಾನಯಾನ ಪ್ರದೇಶವನ್ನು ನಿರ್ಬಂಧಿಸುವುದರಿಂದ ಪ್ರತಿದಿನ 100 ವಿಮಾನಗಳ ಹಾರಾಟ ವ್ಯತ್ಯಯವಾಗಲಿದೆ.