ಮೋಸ್ಟ್‌ ವಾಂಟೆಡ್‌ ಅಲ್‌ ಕೈದಾ ಭಯೋತ್ಪಾದಕ ಮುಜಾಹಿರಿ ಅರೆಸ್ಟ್

ಜಮ್‌ಶೆಡ್‌ ಪುರ: ಭಾರತದಲ್ಲಿ ಪಾಕ್‌ ಪೋಷಿತ ಉಗ್ರ ಸಂಘಟನೆ ಅಲ್‌ ಕೈದಾಕ್ಕೆ ಭದ್ರ ನೆಲೆ ಕಲ್ಪಿಸುವ ಹೊಣೆ ಹೊತ್ತಿದ್ದ ಮೋಸ್ಟ್‌ ವಾಂಟೆಡ್‌ ಉಗ್ರ ಕಲಿಮುದ್ದೀನ್‌ ಮುಜಾಹಿರಿಯನ್ನು ಜಾರ್ಖಂಡ್‌ ಪೊಲೀಸರು ಬಂಧಿಸಿದ್ದಾರೆ.

ಟಾಟಾ ನಗರದ ರೈಲು ನಿಲ್ದಾಣದಲ್ಲಿಉಗ್ರ ನಿಗ್ರಹ ವಿಭಾಗದ ಪೊಲೀಸರು ಮುಜಾಹಿರಿಯನ್ನು ಪತ್ತೆ ಮಾಡಿ ಸೆರೆ ಹಿಡಿದಿದ್ದಾರೆ.

ಭಾರತದಲ್ಲಿ ಯುವಕರಿಗೆ ಭಯೋತ್ಪಾದಕ ಸಂಘಟನೆಗಳಿಗೆ ಸೇರುವಂತೆ ಪ್ರಚೋದಿಸುವುದು. ಬಳಿಕ ಅವರನ್ನು ಪಾಕ್‌ಗೆ ತರಬೇತಿಗಾಗಿ ಕಳುಹಿಸುವುದು ಉಗ್ರ ಮುಜಾಹಿರಿಯ ಕೃತ್ಯವಾಗಿತ್ತು. ಜಮ್‌ಶೆಡ್‌ಪುರ ಮೂಲದವನಾದ ಮುಜಾಹಿರಿ ಕಳೆದ ಮೂರು ವರ್ಷಗಳಿಂದ ತಲೆಮರೆಸಿಕೊಂಡಿದ್ದ. ಉತ್ತರಪ್ರದೇಶ, ಗುಜರಾತ್‌, ಪಶ್ಚಿಮ ಬಂಗಾಳಕ್ಕೆ ವೇಷ ಮರೆಸಿಕೊಂಡು ಸಂಚರಿಸಿ ಯುವಕರನ್ನು ಭೇಟಿ ಮಾಡುತ್ತಿದ್ದ. ಉಗ್ರರ ದಾಳಿಗೆ ನೆರವು ನೀಡಿದ ಹಾಗೂ ಸಂಚು ರೂಪಿಸಿದ ಹಲವು ಪ್ರಕರಣಗಳು ಈತನ ವಿರುದ್ಧ ದಾಖಲಾಗಿವೆ ಎಂದು ಎಡಿಜಿಪಿ ಎಂ.ಎಲ್‌. ಮೀನಾ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಬಾಂಗ್ಲಾದೇಶ, ದಕ್ಷಿಣ ಆಫ್ರಿಕಾ, ಸೌದಿ ಅರೇಬಿಯಾ ಮತ್ತು ಇತರ ವಿದೇಶಗಳಿಗೂ ಉಗ್ರ ಮುಜಾಹಿರಿ ನಕಲಿ ಪಾಸ್‌ಪೋರ್ಟ್‌ ಹಾಗೂ ವೀಸಾ ಮೂಲಕ ಭೇಟಿ ನೀಡಿದ್ದಾನೆ. ಅಲ್ಲಿನ ಯುವಕರನ್ನು ಅಲ್‌ ಕೈದಾಗೆ ಸೇರುವಂತೆ ಪ್ರಚೋದಿಸಿದ್ದಾನೆ ಎಂದು ಎನ್‌ಐಎ ಮೂಲಗಳು ತಿಳಿಸಿವೆ. ಈತನ ಸಹಚರರಾಗಿದ್ದ ಮೊಹಮ್ಮದ್‌ ಅಬ್ದುಲ್‌ ರಹನ್‌ ಅಲಿಯಾಸ್‌ ಹೈದರ್‌ ಅಲಿಯಾಸ್‌ ಕಟ್ಕಿ, ಅಬ್ದುಲ್‌ ಸಮಿ ಅಲಿಯಾಸ್‌ ಉಜ್ಜೇರ್‌ ಅಲಿಯಾಸ್‌ ಹಸನ್‌ ಸದ್ಯ ತಿಹಾರ್‌ ಜೈಲಿನಲ್ಲಿ ಬಂಧಿತರಾಗಿದ್ದಾರೆ.