ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ಜನಪ್ರಿಯ ಬಾನುಲಿ ಕಾರ್ಯಕ್ರಮ 'ಮನ್ ಕೀ ಬಾತ್'ನ 100ನೇ ಆವೃತ್ತಿಗಾಗಿ ವಿಶೇಷ ವಿನ್ಯಾಸದ ಲೋಗೊ (ಲಾಂಛನ) ಹಾಗೂ ಜಿಂಗಲ್ಗಳನ್ನು ರೂಪಿಸಲು ಸಾರ್ವಜನಿಕರಿಗೆ ಆಕಾಶವಾಣಿ ಆಹ್ವಾನಿಸಿದೆ.
ಲೋಗೊಗಳನ್ನು JPEG/ JPG/ PNG/ SVG ಫಾಮ್ರ್ಯಾಟ್ಗಳಲ್ಲಿ ಅಪ್ಲೋಡ್ ಮಾಡಬಹುದು. ಪೋರ್ಟ್ರೇಟ್ (ಉದ್ದ) ಅಥವಾ ಲ್ಯಾಂಡ್ಸ್ಕೇಪ್ (ಅಡ್ಡ) ಆಕಾರದಲ್ಲಿ ಲೋಗೊಗಳನ್ನು ವಿನ್ಯಾಸ ಮಾಡಬಹುದಾಗಿದೆ. ಇವು ವೆಬ್ಸೈಟ್, ಸಾಮಾಜಿಕ ಮಾಧ್ಯಮಗಳಲ್ಲಿ ಬಳಸುವಂತಿರಬೇಕು. ಪತ್ರಿಕಾ ಹೇಳಿಕೆಗಳು, ಲೇಖನ ಸಾಮಗ್ರಿಗಳು, ಸ್ಮರಣಿಕೆಗಳು ಸೇರಿದಂತೆ ಇತರ ಪ್ರಚಾರ ಸಾಮಗ್ರಿಗಳಲ್ಲಿ ಸುಲಭವಾಗಿ ಬಳಸುವ ರೀತಿಯಲ್ಲಿರಬೇಕು.
ಈ ಲೋಗೊಗಳು ಕನಿಷ್ಠ 300 ಡಿಪಿಐನೊಂದಿಗೆ ಅಧಿಕ ರೆಸಲ್ಯೂಷನ್ ಹೊಂದಿರಬೇಕು. ವರ್ಣರಂಜಿತ ಲೋಗೋ ಗಾತ್ರವು 5 ಸೆಂಮೀ *5 ಸೆಂಮೀದಿಂದ 60 ಸೆಂಮೀ* 60 ಸೆಂಮೀವರೆಗೂ ಇರಬಹುದು. ಅದನ್ನು ಡಿಜಿಟಲ್ ಪ್ಲಾಟ್ಫಾರ್ಮ್ನಲ್ಲಿಯೇ ಸಿದ್ಧಪಡಿಸಿರಬೇಕು. ಭಾರತದಲ್ಲಿರುವವರು ಮಾತ್ರವಲ್ಲದೆ, ಹೊರದೇಶದಲ್ಲಿರುವವರು ಕೂಡ ಇದರಲ್ಲಿ ಭಾಗವಹಿಸಬಹುದು.
ವಿನ್ಯಾಸ ಪೂರ್ಣಗೊಂಡ ಲೋಗೊಗಳನ್ನು ಸರಕಾರಕ್ಕೆ ಕಳುಹಿಸಲು ಫೆ 1 ಕೊನೆಯ ದಿನವಾಗಿದೆ. ವಿಜೇತರಿಗೆ 1 ಲಕ್ಷ ರೂ. ಮೌಲ್ಯದ ಬಹುಮಾನ ನೀಡಲಾಗುವುದು ಎಂದು ಆಕಾಶವಾಣಿ ವೆಬ್ಸೈಟ್ನಲ್ಲಿ ಪ್ರಕಟಿಸಲಾಗಿದೆ.