ಬಿಹಾರ: ಬಹುಮತದತ್ತ ಎನ್‌ಡಿಎ, ನಿತೀಶ್‌-ಅಮಿತ್‌ ಶಾ ಹಲೋ ಹಲೋ, ಸಿಎಂ ಸ್ಥಾನದ ಬಗ್ಗೆ ನಡೀತಾ ಚರ್ಚೆ?

ಹೊಸದಿಲ್ಲಿ: ಬಿಹಾರ ವಿಧಾನಸಭೆ ಚುನಾವಣೆಯ ಮತ ಎಣಿಕೆ ಇನ್ನೂ ಪ್ರಗತಿಯಲ್ಲಿದ್ದು, ಬಹುತೇಕ ಎಲ್ಲೆಡೆ ಟ್ರೆಂಡ್‌ ಬಂದಿದೆ.

ಆಡಳಿತಾರೂಢ ಮೈತ್ರಿಕೂಟ ಎನ್‌ಡಿಎ ಪರವಾಗಿ ಮತ್ತೆ ಮತದಾರ ಒಲವು ತೋರಿದ್ದಾನೆ. ಆದರೂ ಎನ್‌ಡಿಎಗೆ ಸ್ಪಷ್ಟ ಬಹುಮತ ದೊರೆಯುವುದೋ ಇಲ್ಲವೋ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

elections

ಮತ ಎಣಿಕೆಯ ಬೆನ್ನಲ್ಲೇ ಗೃಹ ಸಚಿವ ಅಮಿತ್‌ ಶಾ ಬಿಹಾರ ಮುಖ್ಯಮಂತ್ರಿ ಅಮಿತ್‌ ಶಾ ಜತೆ ಮಾತುಕತೆ ನಡೆಸಿರುವುದು ಸಾಕಷ್ಟು ಕುತೂಹಲಕ್ಕೆ ಕಾರಣವಾಗಿದೆ. ಮುಂದಿನ ಮುಖ್ಯಮಂತ್ರಿ ಯಾರಾಗಬೇಕೆಂಬ ಕುರಿತು ಚರ್ಚೆ ನಡೆದಿರುವ ಸಾಧ್ಯತೆ ಇದೆ ಎಂಬ ಮಾತುಗಳು ಕೇಳಿಬಂದಿದೆ.

ಮಹಾಘಟ ಬಂಧನ ವಿರುದ್ಧ ಎನ್‌ಡಿಎಗೆ ಅತಿ ಕಡಿಮೆ ಅಂತರದ ಮುನ್ನಡೆ ದೊರೆತಿದೆ. ಈ ಕುರಿತು ಅಮಿತ್‌ ಶಾ ಮತ್ತು ನಿತೀಶ್‌ ಕುಮಾರ್‌ ಸಮಲೋಚನೆ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ.

ಎನ್‌ಡಿಎ ಅಧಿಕಾರಕ್ಕೆ ಬರಬೇಕಾದರೆ ಮ್ಯಾಜಿಕ್‌ ಸಂಖ್ಯೆ 122 ತಲುಪಬೇಕು. ಎನ್‌ಡಿಎಗೆ ಎಲ್‌ಜೆಪಿ ಬೆಂಬಲ ನೀಡುತ್ತದೆ ಎಂದು ಅಂದಾಜಿಸಲಾಗಿದೆ. ಆದರೆ ಜೆಡಿಯು ಹಲವು ಕಡೆ ಸೋಲಲು ಎಲ್‌ಜೆಪಿಯೇ ಕಾರಣವಾಗಿರುವುದು ಸಂಕಷ್ಟಕ್ಕೆ ಸಿಲುಕಿಸಿದಂತಾಗಿದೆ.

ಬಿಹಾರ ಚುನಾವಣೆಯನ್ನು ಎನ್‌ಡಿಎ ಮೈತ್ರಿಕೂಟದ ಪ್ರಮುಖ ಪಕ್ಷಗಳಾದ ಬಿಜೆಪಿ, ಜೆಡಿಯು ಜಂಟಿಯಾಗಿ ಎದುರಿಸಿದೆ. ಒಂದು ವೇಳೆ ಎನ್‌ಡಿಎಗೆ ಬಹುಮತ ಬಂದರೆ ನಿತೀಶ್‌ ಕುಮಾರ್‌ ಮುಖ್ಯಮಂತ್ರಿ ಆಗಲಿದ್ದಾರೆ ಎಂದು ಈಗಾಗಲೇ ಬಿಜೆಪಿ ಹಿರಿಯ ನಾಯಕರು ಅಭಯ ನೀಡಿದ್ದಾರೆ. ಇದರ ಬೆನ್ನಲ್ಲೇ ಕೇಂದ್ರ ಸಚಿವ ಅಮಿತ್‌ ಶಾ ದೂರವಾಣಿ ಕರೆ ಮಾಡಿ ನಿತೀಶ್‌ ಕುಮಾರ್‌ ಜತೆ ಮಾತನಾಡಿದ್ದು ಭಾರಿ ಚರ್ಚೆಗೆ ಕಾರಣವಾಗಿದೆ.

ಎನ್‌ಡಿಎಗೆ ಅದರಲ್ಲೂ ಬಿಜೆಪಿ ಈ ಬಾರಿ ಚುನಾವಣೆಯಲ್ಲಿ ಅತಿ ಹೆಚ್ಚು ಸ್ಥಾನಗಳನ್ನು ಪಡೆದಿರುವ ಹಿನ್ನೆಲೆಯಲ್ಲಿ ಬಿಜೆಪಿಗೇ ಸಿಎಂ ಸ್ಥಾನ ಒಲಿಯಲಿ ಎಂಬ ಕೂಗು ಕೇಳಿ ಬಂದಿದೆ.