ಫಡ್ನವಿಸ್‌ ಪತ್ನಿಗೆ ಟ್ವೀಟಿಗರ ತರಾಟೆ

ಮುಂಬಯಿ: ಪ್ರಧಾನಿ ನರೇಂದ್ರ ಮೋದಿ ಅವರ 69ನೇ ಹುಟ್ಟುಹಬ್ಬದ ಕುರಿತು ಮಹಾರಾಷ್ಟ್ರದ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್‌ ಅವರ ಪತ್ನಿ ಅಮೃತಾ ಫಡ್ನವಿಸ್‌ ಮಾಡಿದ ಟ್ವೀಟ್‌ಗೆ ಟೀಕೆ ವ್ಯಕ್ತವಾಗಿದೆ. ಮೋದಿ ಅವರು ರಾಷ್ಟ್ರಪಿತವಾಗಿದ್ದು ಯಾವಾಗ ಎಂದು ಟ್ವೀಟಿಗರು ಅಮೃತಾ ವಿರುದ್ಧ ಹರಿಹಾಯ್ದಿದ್ದಾರೆ. ಮಂಗಳವಾರ ಮೋದಿ ಅವರ ಜನ್ಮದಿನದ ಹಿನ್ನೆಲೆಯಲ್ಲಿಅಮೃತಾ ಅವರು, ''ಸಮಾಜ ಸುಧಾರಣೆಗೆ ಹಗಲಿರುಳು ಶ್ರಮಿಸುವಂತೆ ನಮ್ಮನ್ನು ಪ್ರೇರೇಪಿಸುವ ರಾಷ್ಟ್ರಪಿತ ನರೇಂದ್ರ ಮೋದಿಜೀ ಅವರೇ ನಿಮಗೆ ಹುಟ್ಟುಹಬ್ಬದ ಶುಭಾಶಯಗಳು' ಎಂದು ಟ್ವೀಟ್‌ ಮಾಡಿ ಶುಭ ಕೋರಿದ್ದರು. ಟ್ವೀಟ್‌ನಲ್ಲಿಅಮೃತಾ ಅವರು ಬಳಸಿದ 'ಫಾದರ್‌ ಆಫ್‌ ಅವರ್‌ ಕಂಟ್ರಿ' ಪದವನ್ನು ಬಳಸಿಕೊಂಡು ಅನೇಕ ನೆಟ್ಟಿಗರು, ''ಮೋದಿಜಿ ನಿಮಗೆ ರಾಷ್ಟ್ರಪಿತ ಇರಬಹುದು. ಆದರೆ ನಮಗಲ್ಲ. ನಮಗೊಬ್ಬರೇ ರಾಷ್ಟ್ರಪಿತ ಇರುವುದು. ಅವರು ಮಹಾತ್ಮ ಗಾಂಧೀಜಿ,'' ಎಂದು ಟ್ವೀಟಿಸುವ ಮೂಲಕ ಫಡ್ನವಿಸ್‌ರ ಪತ್ನಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಅಮೃತಾ ಅವರು ಮಾಡಿದ್ದ ಟ್ವೀಟ್‌ಗೆ 4,800ಕ್ಕೂ ಹೆಚ್ಚು ಲೈಕ್‌ಗಳು ಬಂದಿದ್ದವು.