ಹಾವು ಕಡಿತ ಪ್ರಕರಣ ಏರಿಕೆ: ನಾಗದೇವನ ಪ್ರಸನ್ನಗೊಳಿಸಲು ಮುಂದಾದ ಆಂಧ್ರ ಸರಕಾರ

ಹೈದರಾಬಾದ್: ಕೃಷ್ಣಾ ಜಿಲ್ಲೆಯ ದಿವಿಸೀಮಾದಲ್ಲಿ ಹಾವಿನ ಕಡಿತದ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಆಂಧ್ರ ಸರಕಾರ ನಾಗದೇವತೆಗಳನ್ನು ಶಾಂತಗೊಳಿಸಲು 'ಸರ್ಪ ಶಾಂತಿ ಯಜ್ಞ' ನಡೆಸಲು ಸಿದ್ಧತೆ ನಡೆಸಿದೆ.

ಕಳೆದೆರಡು ತಿಂಗಳಲ್ಲಿ ಹಾವಿನ ಕಡಿತದಿಂದ ಗ್ರಾಮದಲ್ಲಿ ಇಬ್ಬರು ಸಾವನ್ನಪ್ಪಿದ್ದು, ನೂರಾರು ಜನ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಪ್ರತಿ ವಿಷ ಮತ್ತು ಹಾವಿನ ವಿಷ ನಿರೋಧಕ ರಾಸಾಯನಿಕಗಳನ್ನು ಪೂರೈಸುವುದರ ಜತೆ ಹಾವಿನ ಕಡಿತದಿಂದ ತಪ್ಪಿಸಿಕೊಳ್ಳುವುಗುದು ಹೇಗೆ ಎಂಬ ಜಾಗೃತಿಯನ್ನು ಸಹ ಮೂಡಿಸಲಾಗುತ್ತಿದೆ. ಅದರ ಜತೆಗೆ ಆತಂಕಕ್ಕೆ ಒಳಗಾಗಿರುವ ಸಾರ್ವಜನಿಕರಿಗೆ ಧೈರ್ಯ ತುಂಬಲು ದತ್ತಿ ಇಲಾಖೆ ದೇವರ ಪೂಜೆಯ ಮೊರೆ ಹೋಗಿದೆ. ಆಗಸ್ಟ್ 29ರಂದು ಮೋಪಿದೇವಿಯ ಶ್ರೀ ಸುಬ್ರಹ್ಮಣ್ಯ ದೇವಾಲಯದಲ್ಲಿ ಯಜ್ಞವನ್ನು ಆಯೋಜಿಸಲಾಗಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಜಿಲ್ಲಾಧಿಕಾರಿ ಬಿ. ಲಕ್ಷ್ಮಿಕಾಂತಮ್ , "ದತ್ತಿ ಇಲಾಖೆಯೊಂದಿಗೆ ಸ್ಥಳೀಯರು ಸೇರಿ 'ಸರ್ಪ ಯಾಗ' ನಡೆಸುತ್ತಿದ್ದಾರೆ, ಇದು ಭಯಭೀತಗೊಂಡಿರುವ ಸ್ಥಳೀಯರಲ್ಲಿ ಮನೋಸ್ಥೈರ್ಯವನ್ನು ತುಂಬಲಿದೆ", ಎಂದಿದ್ದಾರೆ.