ಜೂಮ್‌ ಆ್ಯಪ್ ನಿಷೇಧಿಸುವಂತೆ ಸುಪ್ರೀಂ ಕೋರ್ಟ್‌ಗೆ ಮನವಿ, ಕೇಂದ್ರಕ್ಕೆ ನೋಟಿಸ್‌

ಹೊಸದಿಲ್ಲಿ: ಭದ್ರತೆ ಮತ್ತು ಗೌಪ್ಯತೆ ಕಾರಣದಿಂದ ಅಮೆರಿಕಾ ಮೂಲದ ಕಂಪನಿ 'ಜೂಮ್‌ ಆ್ಯಪ್'‌ ಬಳಕೆಯನ್ನು ನಿಷೇಧಿಸುವಂತೆ ಕೋರಿ ಸುಪ್ರೀಂ ಕೋರ್ಟ್‌ನಲ್ಲಿ ಸಲ್ಲಿಸಲಾಗಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಾಲಯ ಪ್ರತಿಕ್ರಿಯೆ ನೀಡುವಂತೆ ಕೇಂದ್ರ ಸರಕಾರಕ್ಕೆ ನೋಟೀಸ್‌ ನೀಡಿದೆ.

ಮುಖ್ಯ ನ್ಯಾಯಮೂರ್ತಿ ಎಸ್‌.ಎ. ಬೊಬ್ಡೆ ನೇತೃತ್ವದ ತ್ರಿಸದಸ್ಯ ಪೀಠ ಶುಕ್ರವಾರ ಕೇಂದ್ರಕ್ಕೆ ನೋಟಿಸ್‌ ಜಾರಿಗೊಳಿಸಿದ್ದು, ಮುಂದಿನ 4 ವಾರಗಳ ನಂತರ ವಿಚಾರಣೆಯನ್ನು ನಡೆಸಲಾಗುವುದು ಎಂದು ತಿಳಿಸಿದೆ.

ಜೂಮ್‌ ಅಪ್ಲಿಕೇಶನ್‌ನ ಬಳಕೆಯನ್ನು ನಿಷೇಧಿಸುವಂತೆ ಹರ್ಶ್‌ ಚುಗ್‌ ಪಿಐಎಲ್‌ ಸಲ್ಲಿಸಿದ್ದರು. ಅಪ್ಲಿಕೇಶನ್‌ ಎಲ್ಲ ಆ್ಯಪ್ ಸ್ಟೋರ್‌ಗಳಲ್ಲಿ ಉಚಿತವಾಗಿ ಲಭ್ಯವಿದೆ ಮತ್ತು ಫೋನ್‌ಗಳು, ಲ್ಯಾಪ್‌ಟಾಪ್‌ಗಳು, ಟ್ಯಾಬ್ಲೆಟ್‌ಗಳಲ್ಲಿ ಬಳಸಬಹುದು. ವಿಡಿಯೋ ಕರೆಗಳು, ಸಭೆಗಳು, ಸೆಮಿನಾರ್‌ಗಳು ಮತ್ತು ಹೋಸ್ಟ್‌ ಮಾಡುವ ಉದ್ದೇಶಗಳಿಗಾಗಿ, ಜೂಮ್‌ ಹೆಚ್ಚು ಬಳಕೆ ಆಗುತ್ತಿದೆ. ಹಲವು ಸಂದರ್ಭಗಳಲ್ಲಿ ಜೂಮ್‌ ಅಪ್ಲಿಕೇಶನ್‌ನಲ್ಲಿ ಸುರಕ್ಷತೆ ಮತ್ತು ಗೌಪ್ಯತೆ ಉಲ್ಲಂಘನೆಯಾದ ವರದಿಗಳು ಹೊರಬಂದಿವೆ. ಈ ಹಿನ್ನೆಲೆಯಲ್ಲಿ ಆ್ಯಪ್‌ ಬಳಕೆ ನಿಷೇಧಿಸಲು ಮನವಿ ಮಾಡಲಾಗಿದೆ.

ಬಳಕೆದಾರರ ದತ್ತಾಂಶ ಸಂಗ್ರಹಣೆಯಲ್ಲಿ ಜೂಮ್‌ ಆ್ಯಪ್‌ ತೊಡಗಿಸಿಕೊಂಡಿದೆ. ಅಪರಿಚಿತ ಮತ್ತು ಅನಧಿಕೃತ ವ್ಯಕ್ತಿಗಳು ಕೆಲವೊಮ್ಮೆ ಜೂಮ್‌ ನಲ್ಲಿ ಅಸಭ್ಯ ಚಟುವಟಿಕೆಗಳನ್ನು ಮಾಡುತ್ತಾರೆ. ಅಪ್ಲಿಕೇಶನ್‌ನಲ್ಲಿ ದೋಷವಿದೆ. ಉದ್ದೇಶಪೂರ್ವಕವಾಗಿ ವೈಯಕ್ತಿಕ ಡೇಟಾವನ್ನು ಸೋರಿಕೆ ಮಾಡಲು ಜೂಮ್‌ ಸಹಾಯ ಮಾಡುತ್ತಿದೆ ಎಂದು ಅರ್ಜಿದಾರರು ಆರೋಪಿಸಿದ್ದಾರೆ.

ಸಾಂಕ್ರಾಮಿಕ ರೋಗವನ್ನು ಲಾಭದ ದೃಷ್ಟಿಯಿಂದ ಬಳಸಿಕೊಳ್ಳುತ್ತಿರುವ ಆ್ಯಪ್‌ ಜನರ ಆದ್ಯತೆಗೆ ಬದಲಾಗಿ ಲಾಭದಲ್ಲಿ ಕಾರ್ಯ ನಿರ್ವಹಿಸುತ್ತಿದೆ. ಸಂವಿಧಾನದ 21 ನೇ ಪರಿಚ್ಛೇದ ಅಡಿಯಲ್ಲಿ ಗೌಪ್ಯತೆ ಹಕ್ಕನ್ನು ಆ್ಯಪ್‌ ಉಲ್ಲಂಘಿಸುತ್ತಿರುವ ಕಾರಣ ಆ್ಯಪ್‌ ಬಳಕೆ ನಿಷೇಧಿಸಲು ಕೋರಲಾಗಿದೆ.